ទីក្រុងសេអ៊ូល ៖ មន្ត្រីកូរ៉េខាងត្បូងបាននិយាយកាលពីថ្ងៃចន្ទមកថា វីរុសផ្តាសាយជ្រួកអាហ្វ្រិកត្រូវបានប្រទះឃើញក្នុងអាហារដែលយកពីប្រទេសចិនកាលពីដើមខែនេះ ប៉ុន្តែលទ្ធភាពក្នុងការរីកសាយនៅទាប ព្រោះអាហារទាំងនោះត្រូវបានចម្អិនរួច ។
រដ្ឋមន្ត្រី Hong Nam-ki ប្រធានការិយាល័យសម្របសម្រូលគោលនយោបាយរដ្ឋាភិបាលបានមានប្រសាសន៍ដូច្នេះក្នុងអំឡុងពេលកិច្ចប្រជុំអន្តរភ្នាក់ងារមួយ បន្ទាប់ពីមានការប្រទះឃើញវីរុសនេះក្នុងគាវនិងអាហារផ្សេងៗដែលត្រូវបានយកចូលនៅថ្ងៃទី៣ ខែសីហា តាមយន្តហោះពីទីក្រុង Shenyang នៃប្រទេសចិនមក ។
លោក Hong បាននិយាយថា ៖« លទ្ធផលនៃការសាកល្បងលើផលិតផលសត្វចិញ្ចឹមយកចូលដោយភ្ញៀវទេសចរម្នាក់បានបញ្ជាក់ឲ្យដឹងថា វាជាវីរុសផ្តាសាយជ្រូកអាហ្វ្រិក។ វានឹងត្រូវការរយៈពេលប៉ុន្មានថ្ងៃបន្ថែមទៀតដើម្បីដឹងច្បាស់ពីពូជវីរុសនេះ ប៉ុន្តែវានឹងកើតមានឡើងក្នុងពេលឆាប់ៗ »។
យ៉ាងណាក្តី មន្ត្រីក្រសួងកសិកម្មបាននិយាយថា វិរុសនេះប្រហែលជាមិនអាចរីកសាយទេព្រោះវីរុសទាំងនេះអាចនឹងងាប់អស់ទៅហើយពេលយកចូលប្រទេស ហើយអាហារទាំងនេះត្រូវបានចម្អិនរួចជាស្រេចផងដែរ ។
កិច្ចប្រជុំកាលពីថ្ងៃចន្ទមានការចូលរួមដោយមន្ត្រីមកពីក្រសួងកសិកម្ម ក្រសួងមហាផ្ទៃ ក្រសួងការបរទេស ក្រសួងបរិស្ថាន និងភ្នាក់ងារដទៃដែលជាប់ពាក់ព័ន្ធ ដើម្បីពិនិត្យមើលស្ថានការណ៍ និងពិភាក្សាលើវិធានការដោះស្រាយនឹងជំងឺនេះ ។
លោក Hong បានបន្ថែមទៀតថា ៖«ជំងឺផ្តាសាយជ្រូកអាហ្វ្រិកកំពុងតែរីកសាយក្នុងប្រទេសចិន ព្រោះតែប្រទេសចិនមានការផ្លាស់ប្តូរមនុស្សនិងផលិតផលជាច្រើន វីរុសនេះអាចចូលមកកាន់ប្រទេសបាន ។ ពួកយើងត្រូវតែពង្រឹងការពិនិត្យរោគឆ្លងបន្ថែមតាមព្រំដែន »។
យ៉ាងណាក្តី វីរុសនេះមិនប៉ះពាល់ដល់មនុស្សទេ ប៉ុន្តែវាភាគច្រើនផ្តល់គ្រោះថ្នាក់ខ្លាំងដល់សត្វជ្រូក ។ មកដល់ពេលនេះ មិនទាន់មានថ្នាំព្យាបាល ឬវ៉ាក់សាំងការពារត្រូវបានបង្កើតឡើងសម្រាប់វីរុសនេះឡើយ ហើយការរីកសាយអាចនឹងបង្កការប៉ះពាល់យ៉ាងធ្ងន់ធ្ងរដល់វិស័យចិញ្ចឹមសត្វក្នុងប្រទេសផងដែរ ៕
ចែករំលែកព័តមាននេះ