ខេត្តកណ្តាល ៖ នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ដោយមានការសម្របសម្រួល ពីលោក ឯក ស៊ុនរស្មី ព្រះរាជអាជ្ញាររងអមសាលាដំបូងខេត្តកណ្តាល បានឆ្មក់ចុះបង្ក្រាបទីតាំងរោង សិប្បកម្មផលិតបារីខុសច្បាប់មួយកន្លែងដ៏ធំនៅក្រុងតាខ្មៅ…
ខេត្តកណ្តាល ៖ នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ដោយមានការសម្របសម្រួល ពីលោក ឯក ស៊ុនរស្មី ព្រះរាជអាជ្ញាររងអមសាលាដំបូងខេត្តកណ្តាល បានឆ្មក់ចុះបង្ក្រាបទីតាំងរោង សិប្បកម្មផលិតបារីខុសច្បាប់មួយកន្លែងដ៏ធំនៅក្រុងតាខ្មៅ បានជាច្រើនតោន។ ហេតុការណ៍នេះ បានកើតឡើងនៅថ្ងៃអង្គារ ២រោច ខែស្រាពណ៍ ឆ្នាំច សំរឹទ្ធិស័ក ពុទ្ធសករាជ២៥៦២ ត្រូវនឹងថ្ងៃទី២៨ ខែសីហា ឆ្នាំ២០១៨ វេលាម៉ោង១២ និង៥៥នាទីថ្ងៃត្រង់ នៅចំណុចឃ្លាំងជួលរបស់លោក គង់ សុវណ្ណារ៉ា ភេទប្រុស អាយុ៣៧ឆ្នាំ លើផ្លូវលេខ២០១ ភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ។
នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃបានឲ្យដឹងថា នេះដោយផ្អែកពាក្យបណ្តឹងរបស់ក្រុម ហ៊ុន ខ្មែរធី បងប្អូនអ៊ីម៉ិច ចុះបញ្ជីក្រោមលេខ០០២០៤៨៨ ចុះថ្ងៃទី១០ ខែតុលា ឆ្នាំ២០១៦ មាន វិញ្ញាបនបត្របញ្ជាក់ ចុះឈ្មោះក្នុងបញ្ជីពាណិជ្ជកម្មលេខ MOC-97673026ពណ ចបព ចុះថ្ងៃទី១០ ខែតុលា ឆ្នាំ២០១៦ មានការិយាល័យកណ្តាលស្ថិតនៅ អគារលេខ១០០k ផ្លូវលេខ៥៨ប ភូមិទួលគោគ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ តំណាងដោយលោកស្រី សាត ដានេ ភេទស្រី ជនជាតិខ្មែរ កាត់អត្តសញ្ញាណប័ណ្ណសញ្ជាតិខ្មែរលេខ 010626144 ចុះថ្ងែទី៣១ ខែសីហា ឆ្នាំ២០០៧។
ក្រោយពីបានឆែកឆេរកឃើញបទល្មើសខាងលើ សមត្ថកិច្ចយើងចាប់ដកហូតយកតែសម្បកកញ្ចប់បារី ម៉ាក ESSE និងនាំជនជាតិចិនពីរនាក់មកសាកសួរនៅស្នងការរដ្ឋាននគរបាលខេត្តកណ្តាល។ ចំណែកនារីម៉ាកផ្សេងទៀត និងសម្ភារ វត្ថុធាតុដើមដែលបម្រើការក្នុងការផលិតបារី ត្រូវបានតំណាងអយ្យការអមសាលាដំបូងសម្រេចឃ្លុំបេបិទបណ្តោះអាសន្នរង់ចាំអនុវត្តនីតិវិធីបន្តតាមផ្លូវច្បាប់។ ដោយបានការសម្របសម្រួលពីលោកព្រះរាជអាជ្ញារង ឯក ស៊ុនរស្មី និងលោកឧត្តមសេនីយ៍ទោ ឡុង ស្រេង អនុប្រធាននាយដ្ឋានប្រឆាំងបទល្មើសសេដ្ឋកិច្ចលោក វរសេនីយ៍ឯក លី សុជាតិ នាយការិយាល័យប្រឆាំងបទល្មើសសេដ្ឋកិច្ចខេត្តកណ្តាល។
បានចុះទៅត្រួតពិនិត្យក្នុងឃ្លាំងខាងលើបានរកឃើញផលិតផលបារីក្លែងក្លាយ និងមានការពាក់ព័ន្ធជាមួយជនជាតិចិនចំនួនពីរនាក់។ ១.ឈ្មោះ XU CHUI YAO ថ្ងៃខែឆ្នាំកំណើត 05.11.1997 កាន់លិខិតឆ្លងដែនលេខ E74484273 សុពលភាព04.05.2016ដល់ 03.05.2026 ទិដ្ឋាការលេខ EI00670270 សុពលភាព 28.09.2017 ដល់02.10.2018 ថ្ងៃចូលកម្ពុជា 28.09.2017 ទី២-ឈ្មោះ JIANG SHAO CONG ថ្ងៃខែឆ្នាំកំណើត15.08.1994 កាន់លិខិតឆ្លងដែនលេខ E89027406 សុពលភាព01.11.2016ដល់31.10.2026 ទិដ្ឋាការលេខEI00912039 សុពលភាព 19.06.2018ដល់30.06.2019 ថ្ងៃចូលកម្ពុជា19.06.2018 ហើយខាងនាយកដ្ឋានប្រឆាំងបទល្មើសសេដ្ឋកិច្ចកំពុងតែសាកសួរតាមនីតិវិធីបន្តទៀត៕
ចែករំលែកព័តមាននេះ