ខេត្តសៀមរាប ៖ ស្ត្រីម្នាក់បានដាក់ពាក្យប្តឹង ទៅលើប្រពន្ធ លោកវរសេនីយ៍ឯក ណុប សារ៉ាក់ អធិការនគរបាលស្រុកសូទ្រនិគម ទៅតុលាការ ដើម្បីទាមទារប្រាក់ជំងឺចិត្តចំនួន៥.០០០ដុល្លារ ពីបទចោទប្រកាន់បរិហារបង្កាច់កេរ្តិ៍ឈ្មោះ កាលពីពេលថ្មីៗនេះ។ យោងទៅតាមពាក្យបណ្តឹងឈ្មោះ ឈុំ ង៉ិ ហៅស៊ី ម៉ុន ភេទស្រី អាយុ៥២ឆ្នាំ នៅភូមិគោកមន ឃុំដំដែក ស្រុកសូទ្រនិគម ចុះថ្ងៃទី១៧ ខែសីហាឆ្នាំ២០១៨។
ដែលបានចុះលេខចូល ដោយស្ថាបន័តុលាការ បង្ហាញថា រឿងនេះផ្តើមចេញពីការប្រើ អំណាចទៅចាក់សោផ្ទះពលរដ្ឋម្នាក់ នាពេលកន្លងទៅរឿងជំពាក់លុយ។ ក្នុងពាក្យបណ្តឹងរបស់ជន រងគ្រោះ បានបញ្ជាក់ថា កាលពីរសៀលថ្ងៃទី១៥ ខែកុម្ភៈ ឆ្នាំ២០១៨ ឈ្មោះ ផល មាលាផល ហៅពៅ (ភរិយាអធិការស្រុក) បាននាំសមត្ថកិច្ច២ទៅ៣នាក់យកសោទៅចាក់ផ្ទះរបស់ប្រជាពលរដ្ឋម្នាក់ឈ្មោះ ស្រី ណែត ត្រូវជាប្អូនបង្កើតរបស់ស្រីអូន ដែលជំពាក់លុយប្រពន្ធអធិការស្រុក ហើយបានរត់ចោលស្រុក។
ប៉ុន្តែផ្ទះនោះត្រូវបានទុកដាក់នៅជាមួយប្អូនបង្កើត ដើម្បីឱ្យជួយមើលដែលរស់នៅក្នុងស្រុកសូទ្រនិគម ក្នុងគោលបំណងឃាំងមិនឱ្យយកអីវ៉ាន់ចេញពីក្នុងផ្ទះ ព្រោះជំពាក់លុយហើយយក(សោថ្មី មកចាក់បន្ថែមពីលើសោម្ចាស់ផ្ទះ)។ ផ្ទះជនរងគ្រោះនោះ ស្ថិតនៅមុខផ្សារថ្នល់ចែក ស្រុកសូទ្រនិគម បើកសម្អាងការ។ លុះពេលម្ចាស់(ជនរងគ្រោះ)មកពីផ្សារដល់មុខផ្ទះក៏ឃើញហេតុការភ្លាម ក៏ភ័យខ្លាច ទើបហៅឈ្មោះ ស៊ី ម៉ុន ដែលជាអ្នកស្គាល់គ្នាឱ្យជួយ ខណៈនោះ ស៊ី ម៉ុន ដែលជាម្ចាស់បណ្តឹង ក៏បានជួយរារាំងមិនឱ្យចាក់សោ តែហាមពួកគេមិនឈ្នះ ក៏ហៅអ្នកកាសែតឱ្យជួយថតផ្តិតរូបភាពទុក ដើម្បីជាភស្តុតាង ទើបសមត្ថកិច្ចដកថយ ក្រោមបញ្ជាឈ្មោះ ផល មាលាផល ដែលត្រូវជាប្រពន្ធ របស់អធិការស្រុកសូទ្រនិគមនោះ។
រីឯស្ត្រីឈ្មោះ ឈុំ ង៉ិ ហៅស៊ីម៉ុន ដែលជាអ្នកប្តឹង ប្រពន្ធអធិការ ស្រុកបានបញ្ជាក់ថា លុះនៅថ្ងៃបន្ទាប់ ផល មាលាផល ដែលត្រូវជាប្រពន្ធរបស់អធិការស្រុកសូទ្រនិគម ប្រាប់បងស្រីរបស់ស្រីណែត ថា ស៊ីម៉ុន ជាអ្នកទៅរករឿងយកអីវ៉ាន់ពីម្ចាស់ផ្ទះទាំងនោះវិញ។ ដោយហេតុផលនេះ ទើបអ្នកសស្រី ឈុំ ង៉ិ ហៅស៊ីម៉ុន សម្រេចដាក់ពាក្យប្តឹងទៅតុលាការ ចោទប្រកាន់ ពីបទបរិហារបង្កាច់កេរ្តិ៍ឈ្មោះ ទាមទារសំណងជំងឺចិត្ត ៥.០០០ដុល្លារ និងសុំឱ្យតុលាការផ្តន្ទាទោស។
ជុំវិញករណីនេះ លោកវរសេនីយ៍ឯក ណុប សារ៉ាក់ អធិការនគរបាលស្រុកសូទ្រនិគមបានប្រាប់ តាមទូរស័ព្ទ នៅវេលាម៉ោង៥ល្ងាច ថ្ងៃទី២៨ ខែសីហា ឆ្នាំ២០១៨នេះថា រឿងនេះ មិនមានការពាក់ព័ន្ធនឹងរូបលោកឡើយ។តាមពិតរឿងនេះកើតយូរហើយ តាំងពីអំឡុងខែកុម្ភៈមកម្លេះ។ ចំណែកលោកស្រី ផល មាលាផល ប្រពន្ធអធិការស្រុកសូទ្រនិគម ក៏បានបញ្ជាក់ផងដែរថា លោកស្រីមិនបានចាក់សោទ្វាតទេ រួចក៏បានដាក់ពាក្យបណ្តឹង ទៅលើឈ្មោះ ឈុំ ង៉ិ ហៅ ស៊ីម៉ុន ភេទស្រី អាយុ៥២ឆ្នាំ នៅភូមិគោកមន ឃុំដំដែក ស្រុកសូទ្រនិគម ទៅតុលាការពីបទបរិហារកេរ្តិ៍ ដែលបានទៅចាក់សោរផ្ទះឈ្មោះ ស្រីណែត (ជាកូនបំណុល)។
ឯសមត្ថកិច្ចដែលប្រពន្ធលោក អធិការសុំទៅប៉ុន្មាននាក់នោះ គឺគ្រាន់ការពារកុំឱ្យអ្នកណាយកអីវ៉ាន់ចេញពីផ្ទះកូនបំណុលនោះតែ ប៉ុណ្ណោះ។ ទោះបីជាយ៉ាងនេះក្តីលោកឧត្តមសេនីយ៍ត្រី ភឹង ចិន្តារ៉េត ស្នងការរង នគរបាលខេត្តសៀមរាប បានឱ្យដឹងនាវេលាម៉ោង៤ និង៥០នាទីល្ងាច ថ្ងៃទី២៨នេះថា រឿងនេះលោកដឹងហើយ ប៉ុន្តែលោកបានឱ្យខាងជំនាញ បញ្ជូនទៅតុលាការយូរហើយ ណាមួយផុតដៃរបស់លោកផង៕
ចែករំលែកព័តមាននេះ