ខេត្តកំពង់ឆ្នាំង ៖ បើទោះបីមកដល់ពេលនេះកសិករនៅភូមិត្រពាំងស្បូវ ឃុំស្រែថ្មី ស្រុករលាប្អៀរ នៅមិនទាន់ប្រមូលផលពីការដាំទំពាំងបារាំង យ៉ាងណាក្តី ក៏ប៉ុន្តែការបណ្ដុះកូនទំពាំងបារាំងរបស់កសិករបានទទួលផលជាវិជ្ជមានល្អប្រសើរ ព្រោះមានអតិថិជនកុម្ម៉ង់ទិញយ៉ាងច្រើន ។…
ខេត្តកំពង់ឆ្នាំង ៖ បើទោះបីមកដល់ពេលនេះកសិករនៅភូមិត្រពាំងស្បូវ ឃុំស្រែថ្មី ស្រុករលាប្អៀរ នៅមិនទាន់ប្រមូលផលពីការដាំទំពាំងបារាំង យ៉ាងណាក្តី ក៏ប៉ុន្តែការបណ្ដុះកូនទំពាំងបារាំងរបស់កសិករបានទទួលផលជាវិជ្ជមានល្អប្រសើរ ព្រោះមានអតិថិជនកុម្ម៉ង់ទិញយ៉ាងច្រើន ។
នេះក៏ដោយសារបន្ទាប់ពីការផ្សព្វផ្សាយរបស់សារព័ត៌មានកោះសន្តិភាព កាលពីពេលកន្លងទៅធ្វើឲ្យអ្នកដែលចង់ដាំដើមទំពាំងបារាំងបានមកកុម្ម៉ង់ទិញកូនទំពាំងបារាំងពីកសិករកាន់តែច្រើន ។
លោក ឈិន សាវ៉េត ជាកសិករដាំទំពាំងបារាំងនៅភូមិឃុំខាងលើបានបញ្ជាក់ថា ៖ មកដល់ពេលនេះទំពាំងបារាំងរបស់គាត់នៅមិនទាន់ប្រមូលផលលក់ចេញទៅទីផ្សារនៅឡើយទេ បើទោះជាពេលនេះដើមទំពាំងបារាំងក្នុងចម្ការរបស់គាត់បែកគុម្ព និងមានដើមខ្ពស់ៗល្អយ៉ាងណាក្តី គឺទុកឲ្យវាបែកគុម្ពធំជាងនេះនឹងទទួលបានទំពាំងធំថ្លោសជាងនេះ និងម្យ៉ាងវិញទៀតវានៅមិនទាន់គ្រប់អាយុដែលត្រូវប្រមូលផលនៅឡើយដែរ។
យ៉ាងនេះក្តីលោកបានបញ្ជាក់ថា បច្ចុប្បន្ននេះមានអតិថិជនបានមកកុម្ម៉ង់ទិញកូនដើមទំពាំងបារាំងពីម្ដាយគាត់នឹងគាត់យ៉ាងច្រើន តិចណាស់ក្នុងម្នាក់ពី២ទៅ៣ពាន់កូនដែរ ដោយក្នុងកូនទំពាំងបារាំង១ដើមថ្លៃ១ ពាន់រៀល ចំណែកឯគ្រាប់ពូជយកមកបណ្តុះ គឺយកគ្រាប់ពូជពីប្រទេសថៃ ។
បច្ចុប្បន្នគាត់បណ្តុះកូនដើមទំពាំងបារាំងមិនទាន់ឲ្យអ្នកទិញនោះទេ ។ ដោយសារសព្វថ្ងៃមានភ្លៀងខ្លាំងពេក ធ្វើឲ្យការបណ្តុះដើមទំពាំងបារាំងជួបការលំបាកធ្វើឲ្យការបណ្តុះដើមទំពាំងបារាំងឲ្យអតិថិជនមិនទាន់ តាមតម្រូវការ ។
សូមរំលឹកដែរថា តាមការបញ្ជាក់របស់លោក ឈុន សាវ៉េត ជាមួយនឹងការបង្ហាញឯកសារបានឲ្យដឹងថា ពូជទំពាំងបារាំងនេះបាននាំចូលពីប្រទេសថៃ ហើយបច្ចុប្បន្ននៅឯខេត្តប៉ៃលិនមានចម្ការធំៗ ហើយអ្នកដាំកំពុងទទួលបានជោគជ័យ ។ ដើមទំពាំងបារាំង ឬដើមតាថុកទេសនេះមានឈ្មោះ បច្ចេកទេស គឺ ASPARAQUS ជាប្រភេទបន្លែដែលគ្មានសារធាតុជាតិពុល គ្មានជាតិអាស៊ីត គ្មានសារធាតុខ្លាញ់ ដូចទំពាំងស្រុកទេ ប៉ុន្តែទំពាំងបារាំងជាប្រភេទចំណីអាហារ ដែលផ្ទុកសារធាតុ និងវីតាមីន អាចថែទាំសុខភាពបានល្អនេះ បើយោងតាមឯកសាររបស់សហគមន៍កសិកម្មខេត្តប៉ៃលិន ។ ដើមទំពាំងបារាំងនេះ គឺអាចជាបន្លែហូបស្រស់ក៏ជាបន្លែសម្រាប់ ឆា ស្ល នឹងស្ងោរក៏បាន ៕
ចែករំលែកព័តមាននេះ