ខេត្តរតនគិរី៖ ជនសង្ស័យម្នាក់លួចម៉ូតូគេទាំងព្រឹកត្រូវបានសមត្ថកិច្ចប៉ូលិសស្រុកកូនមុំដេញចាប់បានភ្លាមៗ ហេតុការណ៍នេះកើតឡើងកាលពីវេលាម៉ោង៨និង៣០នាទីព្រឹកថ្ងៃទី២៨ ខែសីហា ឆ្នាំ២០១៨ នៅចំណុចផ្ទះជនរងគ្រោះ ស្ថិតក្នុងភូមិ៣ ឃុំត្រពាំងក្រហម ស្រុកកូនមុំ។
ជនសង្ស័យខាងលើឈ្មោះលី ហេង ភេទប្រុស អាយុ១៩ឆ្នាំ មុខរបរកម្មករ មានទីលំនៅភូមិស្រែត្រែង ឃុំក្បាលដំរី ស្រុកសំបូរ ខេត្តក្រចេះ។ ចំណែកម្ចាស់ម៉ូតូរងគ្រោះឈ្មោះវ៉ា សុផុន ភេទស្រី អាយុ៤៣ឆ្នាំ មុខរបរកសិករ ទីលំនៅភូមិ៣ ឃុំត្រពាំងក្រហម ស្រុកកូនមុំ។
សមត្ថកិច្ចប៉ូលិសបានឱ្យដឹងថា បើតាមការៀបរាប់ពីស្ត្រីម្ចាស់ម៉ូតូបានរៀបរាប់ថា ម៉ូតូរបស់គាត់ម៉ាកឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ រតនគិរី១C-៨៣៤៤ ហើយនៅមុនពេលកើតហេតុ នោះគាត់បានចតម៉ូតូនៅមុខផ្ទះរួចដកសោចេញពីម៉ូតូយកមកទុកនៅលើគ្រែក្បែរម៉ូតូនោះ ដោយគាត់ជាប់រវល់បោកខោអាវនៅខាងក្រោយផ្ទះ រួចជនសង្ស័យចូលមកយកសោចាក់ម៉ូតូជិះចេញទៅ ក្រោយមកម្ចាស់ម៉ូតូបានឃើញទាន់ ហើយក៏ស្រែកឆោឡោដឹងដល់អ្នកជិតខាង និងទូរស័ព្ទប្តឹងសមត្ថកិច្ចប៉ូលិសកូនមុំដេញចាប់បានភ្លាមៗផងដែរ។
សមត្ថកិច្ចបានបន្តទៀតថា មុននឹងដេញចាប់បានជនសង្ស័យម្នាក់នេះ គឺសមត្ថកិច្ចបើកម៉ូតូ៤ទៅ៥គ្រឿងដេញពីក្រោយដែលមានចំងាយជិត១០គីឡូម៉ែត្រទើបចាប់បានជនសង្ស័យនៅចំណុចផ្លូវលំក្រាលគ្រួសក្រហម ក្នុងភូមិ៣ ឃុំស្រែអង្គ្រង ស្រុកកូនមុំ នៅវេលាម៉ោង៩ព្រឹកថ្ងៃដដែល។
ក្រោយពីសមត្ថកិច្ចចាប់បាន ជនសង្ស័យបានសារភាពប្រាប់សមត្ថកិច្ចថា ខ្លួនបានធ្វើសកម្មភាពនេះតែម្នាក់ឯងប៉ុណ្ណោះ ដោយមកស្នាក់នៅក្នុងស្រុកកូនមុំនេះ២ទៅ៣ខែ ហើយខ្លួនធ្លាប់ធ្វើសកម្មភាពលួចម៉ូតូប្រជាពលរដ្ឋក្នុងទឹកដីខេត្តក្រចេះជាច្រើនលើកមកហើយតែមិនដែលសមត្ថកិច្ចចាប់បាននោះទេ។
បច្ចុប្បន្នជនសង្ស័យត្រូវបានអធិការស្រុកកូនមុំដើម្បីកសាងសំណុំរឿងបញ្ជូនទៅតុលាការចាប់ការតាមច្បាប់ ៕
ចែករំលែកព័តមាននេះ