ខេត្តកំពត ៖ ផ្លូវជាតិលេខ៣ កំពត-ភ្នំពេញ និងកំពត-ខេត្តព្រះសីហនុ បានរងការខូចខាតយ៉ាងធ្ងន់ដោយនឹកស្មានមិនដល់ ។ ផ្លូវជាតិលេខ៣ ចាប់ពីព្រំប្រទល់ខេត្តតាកែវ ចំណុចផ្លូវបំបែកគុស ឆ្ពោះទៅផ្លូវលេខ៣១ តាមផ្លូវតានី ស្រុកអង្គរជ័យ រហូតឆ្លងចូលផ្លូវលេខ៣៣ ចេញពីស្រុកកំពង់ត្រាច ឆ្លងកាត់ខេត្តកែប បានរងការខូចខាតយ៉ាងធ្ងន់ជាច្រើនកន្លែង ។ រីឯចេញពីផ្លូវបំបែកគុស មកកាត់ស្រុកឈូក រហូតដល់ទីរួមខេត្តកំពត និងចេញពីក្រុងកំពតរហូតទៅដល់វាលរេញ ព្រំប្រទល់ខេត្តព្រះសីហនុ ក៏រងការខូចខាតយ៉ាងធ្ងន់ដែរ។
ប្រភពព័ត៌មានមួយចំនួនបានរិះគន់ទៅលើក្រុមហ៊ុន ដែលដេញថ្លៃធ្វើផ្លូវកន្លងមកនេះថា ធ្វើអត់ស្តង់ដារបច្ចេកទេសត្រឹមត្រូវ ទើបផ្លូវជាតិប៉ុន្មានខ្សែដែលឆ្លងកាត់ខេត្តកំពតនេះ រងការខូចខាតយ៉ាងដំណំដូចនេះ ។
ប្រភពខ្លះទៀតបានរិះគន់ថា មកពីរថយន្តផ្ទុកទំនិញលើសចំណុះទើបបណ្តាលឱ្យផ្លូវខូចដូច្នេះ ហើយគួបផ្សំនឹងឆ្នាំនេះភ្លៀងធ្លាក់ជាប់ទៀត ទើបបណ្តាលឱ្យផ្លូវដែលទើបនឹងកសាងហើយថ្មីៗ ត្រូវរថយន្តដឹកធ្ងន់ហួសចំណុះឆ្លងកាត់ជាញឹកញាប់ផងនោះ ក៏បណ្តាលឱ្យផ្លូវដាច់ជាបន្តបន្ទាប់ ។ នៅក្នុងនោះដែរ ពេលខូចតិចតួចជួសជុលមិនកើតដោយសារតែមានភ្លៀងធ្លាក់ជាប់រហូត ទើបបណ្តាលឱ្យខូចខាតកាន់តែខ្លាំងឡើងៗ រហូតដល់ពេលនេះគឺផ្លូវជាតិស្ទើរក្លាយជាផ្លូវឌឿងហែមទៅហើយ ។
ចំណុចនៃការខូចខាតផ្លូវជាតិលេខ៣នេះដែរមានប្រភពព័ត៌មានមួយចំនួនបានផ្តល់ការវិភាគឱ្យឃើញពីផលប៉ះពាល់ខ្លះៗ ក្នុងកំឡុងខែកក្កដា ខណៈមានគ្រោះទឹកជំនន់បានកាត់ផ្តាច់ផ្លូវជាតិលេខ៤ជាច្រើនកន្លែង ហើយមិនអាចធ្វើចរាចរណ៍ដឹកទំនិញបាន គឺផ្លូវជាតិលេខ៤បានផ្អាកការធ្វើចរាចរណ៍ ហើយរថយន្តដឹកទំនិញធំៗត្រូវបង្វែរមកធ្វើចរាចរណ៍តាមផ្លូវជាតិលេខ៣មួយរយៈវិញផងនោះ ទើបបណ្តាលឱ្យផ្លូវដែលទើបនឹងកសាងថ្មីនេះរងការខូចខាតយ៉ាងធ្ងន់ដូច្នេះ ។
ការខូចខាតផ្លូវខាងលើនេះដែរ កាលពីពាក់កណ្តាលខែកក្កដា ឆ្នាំ២០១៨កន្លងមក លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានដឹកនាំប្រតិភូក្រសួងចុះពិនិត្យផ្ទាល់ ដើម្បីសិក្សាពីការខូចខាតនេះ និងឱ្យក្រុមហ៊ុនចិនធ្វើការជួសជុលជាបណ្តោះអាសន្ននៅមុនការបោះឆ្នោតជ្រើសតាំងតំណា ងរាស្ត្រនីតិកាលទី៦ កន្លងមក ។
ជុំវិញការស្តារជាថ្មីផ្លូវជាតិលេខ៣នេះ លោក ពេជ្រ រដ្ឋា អនុប្រធានមន្ទីរសាធារណការនិងដឹកជញ្ជូនខេត្ត បានឱ្យដឹងថា ការស្តារនិងកសាងថ្មីនូវផ្លូវជាតិលេខ៣នេះ ជាបន្ទុកទទួលខុសត្រូវរបស់ក្រសួងដែលត្រូវទទួលធ្វើ ។ ផ្លូវជាតិលេខ៣ចាប់ពីផ្លូវបំបែកគុសមកដល់ក្រុងកំពត ត្រូវបានក្រុមហ៊ុនចិនដេញថ្លៃធ្វើមួយចំណែក ។ រីឯមួយផ្នែកទៀតចាប់ពីក្រុងកំពត រហូតទៅដល់ផ្លូវបំបែកវាលរេញ ព្រំប្រទល់ខេត្តព្រះសីហនុ គឺក្រុមហ៊ុនចិនមួយផ្សេងទៀតជាអ្នកដេញថ្លៃធ្វើ ។
លោកបន្តថា ការស្តារឡើងវិញផ្លូវជាតិលេខ៣ ដែលក្រុមហ៊ុនចិនធានាធ្វើនេះគឺធ្វើនៅខែតុលា ឆ្នាំ២០១៨ខាងមុខនេះ ។ លោក ពេជ្រ រដ្ឋា ក៏បានបញ្ជាក់ផងដែរថា មុននឹងស្តារផ្លូវនេះឡើងវិញ ក្រុមហ៊ុនចិនដែលដេញថ្លៃបាននោះត្រូវជួសជុលជាបណ្តោះអាសន្ន ដើម្បីបង្កការងាយស្រួលដល់យានយន្តគ្រប់ប្រភេទធ្វើចរាចរណ៍ផងដែរ ប៉ុន្តែដោយសារគ្រោះធម្មជាតិមិនអំណោយផល គឺភ្លៀងធ្លាក់ជាប់រហូតទើបក្រុមហ៊ុនដែលត្រូវធ្វើផ្លូវនោះត្រូវអាក់ខានមិនបានជួសជុល បណ្តាលឱ្យផ្លូវកាន់តែខូចធ្ងន់ទៅៗ ៕
ចែករំលែកព័តមាននេះ