ប្រទេសជប៉ុន-កូរ៉េខាងជើង ៖ បើតាមក្រសួងការពារប្រទេសជប៉ុន ក្នុងរបាយការណ៍ប្រចាំឆ្នាំមួយបានចេញផ្សាយកាលពីថ្ងៃទី២៨ សីហា វាយតម្លៃថា កូរ៉េខាងជើងនៅតែជាការគំរាមកំហែងមួយសម្រាប់សន្តិសុខជប៉ុន ទោះបីមានការបញ្ឈប់សាកល្បងមីស៊ីលបាលីស្ទិក និងការសន្យារបស់មេដឹកនាំកូរ៉េខាងជើងលោកគីមជុង អ៊ុន…
ប្រទេសជប៉ុន-កូរ៉េខាងជើង ៖ បើតាមក្រសួងការពារប្រទេសជប៉ុន ក្នុងរបាយការណ៍ប្រចាំឆ្នាំមួយបានចេញផ្សាយកាលពីថ្ងៃទី២៨ សីហា វាយតម្លៃថា កូរ៉េខាងជើងនៅតែជាការគំរាមកំហែងមួយសម្រាប់សន្តិសុខជប៉ុន ទោះបីមានការបញ្ឈប់សាកល្បងមីស៊ីលបាលីស្ទិក និងការសន្យារបស់មេដឹកនាំកូរ៉េខាងជើងលោកគីមជុង អ៊ុន រំសាយនុយក្លេអ៊ែរនៅឧបទ្វីបកូរ៉េក្ដី។
តាមរបាយការណ៍នោះរបស់ជប៉ុន បានសរសេរឱ្យដឹងថា បណ្ដាសកម្មភាពយោធារបស់កូរ៉េខាងជើង តំណាងឲ្យការគំរាមកំហែងធ្ងន់ធ្ងរបំផុត ដែលប្រទេសយើងប្រឈមមុខ។របាយការណ៍ក៏គូសបញ្ជាក់ដែរពីបណ្ដាបញ្ហាសន្តិសុខ ទាក់ទិនដល់កម្លាំងយោធាដែលកាន់តែខ្លាំងទៅរបស់ចិននិងមហិច្ឆតាដែនដីរបស់ចិន។
ការចេញផ្សាយរបាយការណ៍នេះ កើតមានខណៈប្រធានាធិបតីអាមេរិកលោកដូណាល់ត្រាំ លុបចោលភ្លាមៗ កាលពីថ្ងៃទី២៤ សីហា ទស្សនកិច្ចរបស់រដ្ឋមន្ត្រីការបរទេសរបស់លោក គឺលោក MIKE POMPEO នៅកូរ៉េខាងជើង ដោយថា មកពីគ្មានការរីកចម្រើនលើបញ្ហារំសាយនុយក្លេអ៊ែរ។
ចាប់តាំងពីការជួបគ្នាកំពូលកាលពីថ្ងៃទី១២ មិថុនា រវាងលោកត្រាំ និងលោកគីមជុង អ៊ុនដែលសន្យារំសាយនុយក្លេអ៊ែរនៅឧបទ្វីបកូរ៉េមក នាយករដ្ឋមន្ត្រីជប៉ុនលោកស៊ីនហ្សូអាបេ បានថ្លែងថា ប្រទេសរបស់លោកនឹងពុំផ្លាស់ប្ដូរជំហរយោធារបស់ខ្លួនចំពោះក្រុងព្យុងយ៉ាងឡើយ បើដរាបណាពុំទាន់ឃើញវិធានការជាក់ស្ដែង អាចត្រួតពិនិត្យបាន និងពុំមានការប្រែក្រឡាស់ នៃការរំសាយនុយក្លេអ៊ែរកូរ៉េខាងជើងទេនោះ។
របាយការណ៍សរសេរទៀតថា យើងត្រូវតាមដានមើលកូរ៉េខាងជើងដោយដិតដល់ ដើម្បីឲ្យដឹងថា តើវិធានការណាខ្លះដែលគេបានចាត់ ដើម្បីបោះបង់ចោលកម្មវិធីនុយក្លេអ៊ែរ និងបាលីស្ទិក។
កាសែតវ៉ាស៊ីនតោនប៉ុស្តិ៍រាយការណ៍នាថ្ងៃទី២៧ សីហាថា លោកត្រាំលុបចោលទស្សនកិច្ចរបស់លោក POMPEO នៅកូរ៉េខាងជើង ក្រោយទទួលលិខិតប្រទូស្តរ៉ាយមួយពីអ្នកទទួលខុសត្រូវជាន់ខ្ពស់កូរ៉េខាងជើងមួយរូប។ ចំណែកសារព័ត៌មានផ្លូវការកូរ៉េខាងជើង ចោទប្រកាន់អាមេរិកថា លេងល្បែងមុខ២ ហើយប្រើឧបាយកលឧក្រិដ្ឋមួយដោយលុបចោលទស្សនកិច្ចនេះ៕
ចែករំលែកព័តមាននេះ