រាជធានីភ្នំពេញ ៖ ទំហំពាណិជ្ជកម្មរវាងកម្ពុជា-ថៃ ក្នុងរយៈពេល៧ខែដើមឆ្នាំនេះ មានទឹកប្រាក់ជាង៤ពាន់លានដុល្លារ ខណៈដែលប្រមុខរាជរដ្ឋាភិបាលប្រទេសទាំងពីរបានសន្យារួមគ្នាថា នឹងបន្តជំរុញឱ្យកើនរហូតដល់១៥ពាន់លានដុល្លារនៅឆ្នាំ២០២០ ។
លោក ជីរ៉ាវុឍ សុវណ្ណាអាត អគ្គទីប្រឹក្សាពាណិជ្ជកម្មប្រចាំស្ថានទូតថៃនៅកម្ពុជា មានប្រសាសន៍ថា នៅក្នុងរយៈពេល៧ខែដើមឆ្នាំ២០១៨នេះ ទំហំពាណិជ្ជកម្មទ្វេភាគីរវាងកម្ពុជា -ថៃ ដែលអគ្គទីប្រឹក្សាពាណិជ្ជកម្មថៃទើបទទួលបានថ្មីៗនេះមានទឹកប្រាក់សរុបប្រមាណ៤.៦០០លានដុល្លារ ។ លោកសុវណ្ណាអាត បន្តថា ៖« តាមគោលដៅ និងទិសដៅរបស់រដ្ឋាភិបាលនៃប្រទេសទាំងពីរគឺបានកំណត់ថា នៅក្នុងឆ្នាំ២០២០ ប្រទេសយើងទាំងពីរ នឹងជំរុញឱ្យទំហំពាណិជ្ជកម្មទ្វេភាគីឲ្យកើនឡើងដល់រហូត១៥ពាន់លានដុល្លារ »។
មន្ត្រីអ្នកនាំពាក្យក្រសួងពាណិជ្ជកម្ម លោក ស៊ាង ថៃ បានមានប្រសាសន៍ថា ទំហំពាណិជ្ជ កម្មរវាងប្រទេសទាំងពីរកម្ពុជា-ថៃ ក្នុងរយៈពេល៧ខែដើមឆ្នាំនេះ វាប្រហាក់ប្រហែលគ្នា ឬ កើនឡើងតិចតួច បើធៀបនឹងរយៈពេលដូចគ្នានៃឆ្នាំមុន ។ ក្នុងនោះ លោកថា ភាគីទាំងសងខាងក៏បានទទួលស្គាល់ហើយថា ការនាំចូលទំនិញពីថៃមកកម្ពុជាច្រើនជាងពីកម្ពុជាទៅថៃ ។ យ៉ាងនេះក្ដី លោកស៊ាង ថៃ បញ្ជាក់ថា ៖« ខាងរដ្ឋមន្ត្រីខ្ញុំតែងតែស្នើឱ្យភាគីថៃជួយទិញផលិតផលពីកម្ពុជាឲ្យបានច្រើនជាងសព្វថ្ងៃនេះ »។
គួរបញ្ជាក់ថា ទំហំពាណិជ្ជកម្មកម្ពុជា-ថៃកាលពីឆ្នាំមុនសម្រេចបានជាង៦ពាន់លានដុល្លារ ក្នុងនោះថៃបាននាំចូលមកកម្ពុជាជាង៥ពាន់លានដុល្លារ តែកម្ពុជានាំចូលទៅប្រទេសថៃវិញ មានទឹកប្រាក់ប្រមាណតែ៩០០លានដុល្លារអាមេរិកប៉ុណ្ណោះ ។ ចំណែកផលិតផលដែលកម្ពុជានាំចេញទៅប្រទេសថៃភាគច្រើនជាកសិផល ដូចជា ពោត ដំឡូងមី សណ្តែក ជាដើម ខណៈប្រទេសថៃនាំចូលមកកម្ពុជាវិញ មានដូចជា គ្រឿង ចក្រ ឧបករណ៍អេឡិចត្រូនិក, ប្រេងឥន្ធនៈ, សម្ភារ សំណង់, គ្រឿងឧបភោគបរិភោគ គ្រឿងសម្អាង និងសម្ភារប្រើប្រាស់ក្នុងផ្ទះជាដើម ។
គួររំឭកថា ប្រមុខថ្នាក់ដឹកនាំនៃប្រទេសទាំងពីរកាលពីឆ្នាំ២០១៥ បានប្ដេជ្ញារួមគ្នាថា នឹងបង្កើនទំហំពាណិជ្ជកម្មទ្វេភាគីឲ្យកើនដល់១៥ពាន់លានដុល្លារនៅឆ្នាំ២០២០ ៕
ចែករំលែកព័តមាននេះ