រាជធានីភ្នំពេញ ៖ រថយន្តធន់តូចម៉ាក KIA មួយគ្រឿងបានក្រពឹតផ្នែកខាងមុខរងការខូចខាតយ៉ាងខ្លាំង ខណៈដែលម្ចាស់ចតទុកចោលហើយ ត្រូវបានរថយន្តដឹកសាំងធន់ធំមួយគ្រឿងដែលមានចំណុះរហូតទៅដល់ចំនួន១ម៉ឺនលីត្រ បានបើកគេចពីរថយន្តមួយគ្រឿងរ៉េចង្កូតទៅកៀរកៀបជាប់ទៅនឹងខឿនចិញ្ចើមផ្លូវ និងបន្តទៅបុករថយន្តពីរបាំងមួយគ្រឿងទៀតដែលកំពុងតែបើកខាងមុខផងដែរនោះ ។…
រាជធានីភ្នំពេញ ៖ រថយន្តធន់តូចម៉ាក KIA មួយគ្រឿងបានក្រពឹតផ្នែកខាងមុខរងការខូចខាតយ៉ាងខ្លាំង ខណៈដែលម្ចាស់ចតទុកចោលហើយ ត្រូវបានរថយន្តដឹកសាំងធន់ធំមួយគ្រឿងដែលមានចំណុះរហូតទៅដល់ចំនួន១ម៉ឺនលីត្រ បានបើកគេចពីរថយន្តមួយគ្រឿងរ៉េចង្កូតទៅកៀរកៀបជាប់ទៅនឹងខឿនចិញ្ចើមផ្លូវ និងបន្តទៅបុករថយន្តពីរបាំងមួយគ្រឿងទៀតដែលកំពុងតែបើកខាងមុខផងដែរនោះ ។
ករណីគ្រោះថ្នាក់ចរាចរណ៍នេះដែរបានកើតឡើងនៅវេលាម៉ោង១២និង១៥នាទីថ្ងៃត្រង់ ថ្ងៃទី២៨ ខែ សីហា ឆ្នាំ២០១៨ នៅចំណុចផ្លូវលេខ៣៧០ កែងនឹងផ្លូវត្រសក់ផ្អែម (ផ្លូវលេខ៦៣) ក្នុងសង្កាត់បឹងកេងកងទី១ ខណ្ឌចំការមន ។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុរថយន្តដឹកសាំងម៉ាក ពណ៌ស ពាក់ផ្លាកលេខ ភ្នំពេញ ៣B-៧១០៥ មួយគ្រឿង ដែលមានផ្ទុកសាំងចំណុះ១ម៉ឺនលីត្រពេញក្នុងស៊ីទែននោះដែលបើកបរដោយបុរសម្នាក់ឈ្មោះ ស៊ឹង ទូច បានបើកតាមបណ្តោយផ្លូវលេខ៣៧០ក្នុងទិសដៅពីកើតទៅលិចលុះមកដល់ចំណុចកើតហេតុខាងលើក៏ស្រាប់តែមានរថយន្តស៊េរីទំនើបម៉ាក RANG ROVER មួយគ្រឿងបើកមកបត់ខាងមុខ ។
ពេលនោះបុរសអ្នកបើកបររថយន្តដឹកសាំងក៏បានបួងចង្កូតទៅខាងស្តាំដៃទៅកៀររថយន្តធន់តូចម៉ាក KIA ពណ៌ទឹកប្រាក់ ពាក់ផ្លាកលេខ ភ្នំពេញ ២AP-៣៩៩០ មួយគ្រឿង ដែលម្ចាស់ចតទុកនៅស្ងៀមទៅកៀបជាប់ជាមួយនឹងខឿនចិញ្ចើមផ្លូវបណ្តាលអោយក្រពឹតផ្នែកខាងមុខរងការខូចខាតយ៉ាងដំណំតែម្តង ។
តាមប្រភពដដែលបានប្រាប់បន្តទៀតថា មិនតែប៉ុណ្ណោះរថយន្តដឹកសាំងមួយគ្រឿងខាងលើនេះមិនបានឈប់ភ្លាមនោះទេ ដោយបានបន្តជ្រុលទៅបុករថយន្តពីរបាំង ពណ៌ប្រផេះ ពាក់ផ្លាកលេខ ភ្នំពេញ ២AL-៤៩៧៨ មួយគ្រឿងទៀត ដែលកំពុងតែបើកស្របទិសគ្នាខាងមុខបណ្តាលអោយក្រពឹតបន្ថែម ទៀតផងដែរ ។
ពាក់ព័ន្ធទៅនឹងករណីគ្រោះថ្នាក់ចរាចរណ៍បុករះរថយន្តទាំងពីរគ្រឿងជាបន្តបន្ទាប់គ្នានេះដែរគឺកើតឡើងដោយសារតែអ្នកបើកបររថយន្តដឹកសាំងបង្កមួយគ្រឿងនេះបើកបរដោយខ្វះការប្រុងប្រយ័ត្ន និង មិនមែនដោយសារតែរថយន្តខាងលើដាច់ហ្វ្រាំងជាន់មិនស៊ីនោះឡើយ ។
ក្រោយពេលកើតហេតុ កម្លាំងមានសម្ថកិច្ចមូលដ្ឋាន និងនគរបាលចរាចរណ៍ខណ្ឌចំការមនក៏បានចុះមកដល់កន្លែងកើតហេតុខាងលើហើយក៏តម្រូវអោយភាគីទាំងអស់ធ្វើការដោះស្រាយគ្នា ដោយភាគីខាងតំណាងក្រុមហ៊ុនខាងរថយន្តដឹកសាំងបង្កបានចូលខ្លួនមកធ្វើការដោះស្រាយគ្នា និងយល់ព្រមយករថយន្តម៉ាក KIA និង រថយន្តពីរបាំងដែលរងការខូចខាតទាំងពីរគ្រឿងទៅធ្វើការជួសជុលអោយជាការបញ្ចប់រឿងនៅនឹងកន្លែងកើតហេតុភ្លាមផងដែរ ៕
ចែករំលែកព័តមាននេះ