រាជធានីភ្នំពេញ ៖ ក្នុងគោលបំណងចង់ឲ្យមានការអភិវឌ្ឍប្រទេសជាតិ តាមរយៈការរិះគន់ដើម្បីស្ថាបនាប្រធានគណបក្សយុវជនកម្ពុជា លោកពេជ្រ ស្រស់ បានប្រកាសទទួលយកមតិ រិះគន់ពីគ្រប់មជ្ឍដ្ឋានជាជាងការលាបពណ៌គ្នា ឬវាយប្រហារគ្នាទៅប្រាប់សម្តេចនាយករដ្ឋមន្ត្រី តាមរយៈ «ឧត្តមក្រុមប្រឹក្សាពិគ្រោះ និងផ្តល់យោបល់» ។
ការលើកឡើងរបស់មេបក្សយុវជននេះ បន្ទាប់ពីមានមតិមួយចំនួនបានរិះគន់លោកថា អ្នកយោបាយកាន់ជើងរាជរដ្ឋាភិបាល ដើម្បីផលប្រយោជន៍តែប៉ុណ្ណោះ ។
លោក ពេជ្រ ស្រស់ បានឲ្យដឹងនៅថ្ងៃទី២៨ សីហា ឆ្នាំ២០១៨ បានប្រកាសឲ្យអ្នកពូកែជេរពូកែរិះគន់ លាបពណ៌ ចូលរួមផ្តល់មតិតាមរយៈខមិនលើបណ្តាញសង្គម ឬផ្ញើសារផ្តល់គំនិតល្អៗបានជាតិ ដើម្បីលោកយកទៅប្រាប់នាយករដ្ឋមន្ត្រីផ្ទាល់តែម្តង ។ ប្រធានគណបក្សយុវជនរូបនេះបានបញ្ជាក់ថា «យើងកុំនៅប៉ូលចាស់ដដែលៗពេក យើងសុំកាត់បន្ថយការជេរនេះមកជាការផ្តល់យោបល់ឆ្ពោះទៅរកការអភិវឌ្ឍ ។ អស់លោកដែលពូកែជេរដែលដឹងថា ការអភិវឌ្ឍបែបណាអស់លោក គួរផ្តល់មតិតាម Comment តាមនេះថា ពេជ្រ ស្រស់ ជួយប្រាប់ចំណុចនេះទៅកាន់សម្តេចតេជោ ហ៊ុន សែនផង អស់លោកប្រើខ្ញុំមកក្រែងអស់លោកស្គាល់សម្តេចតេជោ ហ៊ុន សែន ទៅថា អាយ៉ង» ។
មេបក្សយុវជនក៏បានគូសបញ្ជាក់ទៅកាន់ក្រុមប្រឆាំងទៀតថា ៖«អស់លោកប្រើខ្ញុំមក អស់លោកមិនពេញចិត្តអ្វីនៅក្នុងសង្គម អស់លោកសរសេរមក ជៀសវាងការជេរអត់ប្រយោជន៍ ហើយខ្ញុំនឹងស៊ើបអង្កេតជាក់ស្តែង ។ នេះជាការចូលរួមអភិវឌ្ឍន៍សង្គមជាតិក្នុងនាមជាខ្មែរដូចគ្នា ។ ទង្វើរនេះផ្លាស់ប្តូរពីការជេរគ្នា ការលាបពណ៌គ្នាមករួមគ្នា អភិវឌ្ឍន៍មួយពិតប្រាកដ» ។ លោក ពេជ្រ ស្រស់ ក៏បានស្នើទៅកាន់ក្រុមប្រឆាំង ឬក្រុមអ្នករិះគន់បែបមកធ្វើការផ្តល់ យោបល់ក្នុងន័យស្ថាបនា កសាងប្រទេសឲ្យមានភាពជឿនលឿន និងធ្វើឲ្យជាតិខ្មែររឹងមាំ ព្រោះបរទេសមិនជួយខ្មែរជាជាងខ្មែរជួយគ្នានោះទេ ។ ប្រធានគណបក្សយុវជនកម្ពុជាក៏បានលើកឡើងថា យុវជនទាំងអស់គួរចូលរួមអភិវឌ្ឍន៍តាមរយៈទង្វើររបស់ខ្លួនបន្តិចម្នាក់ៗ និងប្រកាន់និន្នាការនយោបាយ និងជៀសវាងពឹងបរទេសមកជួយ ដើម្បីប្រយោជន៍ខ្លួន ។ យុវជន ឬអ្នកនយោបាយមិនគួរនិយាយពាក្យសំដីលាបពណ៌ ញុះញង់ ដើម្បីប្រយោជន៍ផ្ទាល់ឲ្យគេឈឺចាប់ទេ ។
លោកសង្កត់ធ្ងន់ថា «ក្នុងនាមយើងជាមនុស្ស ឬជាកញ្ចក់យើងត្រូវឲ្យគេឆ្លុះឲ្យឃើញនូវ កំហុសរបស់គេ ។ គេដឹកនាំទៅខុសគេត្រូវដឹងទង្វើរបស់គេ ។ សូមបងប្អូនចាំថា យើងបង្ខំគេ ទទួលកំហុសរបស់គេ ផ្ទុយទៅវិញ យើងត្រូវឲ្យគេរៀនទទួលកំហុសរបស់គេ ទាំងគេទទួលយកដោយខ្លួនគេ» ។ ជាមួយគ្នានោះដែរ លោក ពេជ្រ ស្រស់ ក៏បានលើកឡើងថា ការចូលរួមក្នុង«ឧត្តមក្រុមប្រឹក្សាពិគ្រោះ និងផ្តល់យោបល់» គឺជានយោបាយថ្មីមួយក្នុងន័យអភិវឌ្ឍន៍ និងស្ថាបនាប៉ុណ្ណោះ មិន មែនគណបក្សយុវជន ឬគណបក្សនយោបាយទាំងអស់នោះចូលរួមជាមួយបក្សប្រជាជនកម្ពុជានោះទេ» ។
លោកបន្ថែមថាការធ្វើបែបនេះ ដើម្បីចូលរួមក្នុងកិច្ចការរដ្ឋបាលសាធារណៈតាមរយៈស្វែងរកភស្តុងតាងពិតទៅបង្ហាញពីការពិតទៅកាន់អ្នកដឹកនាំប្រទេសក្នុងការកែទម្រង់ ដើម្បីប្រទេសរីកចម្រើន ។
មេបក្សយុវជនកម្ពុជាក៏បានលើកឡើងថា ការចូលរួមរបស់ប្រធានគណបក្សនយោបាយក្នុងឧត្តមក្រុមប្រឹក្សាពិគ្រោះ និងផ្តល់យោបល់នេះបង្ហាញពីការវិវត្តនយោបាយមួយបង្រួបបង្រួម ជាតិដែលជាគោលបំណងរបស់ព្រះបរមរតនៈកោដ្ឋចង់បាន ៕
ចែករំលែកព័តមាននេះ