ខេត្តកំពង់ធំ ៖ ករណីក្មេងប្រុសម្នាក់លង់ទឹកស្លាប់បានបង្កឲ្យមានការភ្ញាក់ផ្អើលកាលពីវេលាម៉ោង០២និង៥៥នាទីរសៀល ថ្ងៃទី២៦ ខែសីហា ឆ្នាំ២០១៨ នៅចំណុចកន្លែងបង្ហៀរទឹក៦មករា ស្ថិតក្នុងភូមិក្បាលបី ឃុំទីពោ ស្រុកសន្ទុក ។
នគរបាលមូលដ្ឋានបានអោយដឹងថា សពជនរងគ្រោះឈ្មោះ ឌុច ចាន់តុលា ភេទប្រុស អាយុ ១៦ឆ្នាំ ជនជាតិខ្មែរ មុខរបរសិស្សថ្នាកទី៩ មានទីលំនៅភូមិក្តី សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ ។
នៅមុនពេលកើតហេតុជនរងគ្រោះឈ្មោះ ឌុច ចាន់តុលា បានមកលេងបង្ហៀរទឹក៦មករា ជាលក្ខណៈគ្រួសារជាមួយនឹងឪពុកឈ្មោះ ឌុច ផល្លី និងម្តាយឈ្មោះ ប៉ៃ សុភា ព្រមទាំបងប្អូនដទៃទៀត នៅពេលដែលកំពុងតែងូតទឹកលេងយ៉ាងសប្បាយនោះគេឃើញជនរងគ្រោះបានឡើងទៅលេងបង្ហៀរទឹកផ្នែកខាងលើផ្លូវឆ្លងកាត់ ស្រាប់តែជនរងគ្រោះបានរអិលជើងដួលធ្លាក់ចូលទៅល្បាក់ទឹកជ្រៅជាប់ខាងក្រោមបង្ហៀរទឹកលេចបាត់ទៅក្នុងទឹកក៏នាំគ្នារផ្អើលឆោឡោឡើងថា មានក្មេងលង់ទឹកហើយ ។
ឮដូច្នោះខាងក្រុមគ្រួសាររបស់ជនរងគ្រោះក៏ស្រែកសុំអោយបងប្អូនជួយមុជទឹករកកូនរបស់គាត់ផង ពេលនោះបងប្អូនប្រជាពលរដ្ឋប្រជាការពារភូមិ និងសមត្ថកិច្ចនគរបាលប៉ុស្តិ៍រដ្ឋបាលបាននាំគ្នាជួយមុជទឹករាវរកជនរងគ្រោះអស់រយ:ពេលប្រហែលជិតមួយម៉ោង ទើបប្រទះឃើញជនរងគ្រោះនៅបាតល្បាក់ទឹកជម្រៅប្រហែលជាងបីម៉ែត្រក៏នាំគ្នាលើកជនរងគ្រោះដាក់លើគ្រែនាំគ្នាធ្វើចលនាអោយតែមិនឃើញមានដង្ហើម សង្គ្រោះអស់ចិត្តទើបដឹងថា ជនរងគ្រោះបានផុតដង្ហើមស្លាប់បាត់ទៅហើយ ។
ខាងសមត្ថកិច្ចជំនាញបានធ្វើការពិនិត្យលើដងខ្លួនសពពុំឃើញមានស្លាកស្នាមអ្វីគួរអោយកត់សំគាល់ឡើយ បន្ទាប់ពីពិនិត្យចប់សព្វគ្រប់សមត្ថកិច្ចបានធ្វើកំណត់ហេតុប្រគល់សពជនរងគ្រោះជូនគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ