រាជធានីភ្នំពេញ ៖ បុរសជាសន្តិសុខក្លិបហ្គោលឡាញម្នាក់ ត្រូវបានសមត្ថកិច្ចចាប់ឃាត់ខ្លួនបន្ទាប់ពីស្រវឹងស្រាជោគជាំ ដើរស្រែកតាមផ្លូវ និងវាយកញ្ចក់កង់បីឥណ្ឌាមួយគ្រឿងដែលធ្វើដំណើរតាមដងផ្លូវបណ្តាលឲ្យបែក ខណៈពេលដែលបុរសចិត្តខ្លាំងរូបនោះដើរឆ្លងផ្លូវ ។ ហេតុការណ៍នេះកើតឡើង កាលពីវេលាម៉ោង៣និង៣០នាទីទៀបភ្លឺ ថ្ងៃទី២៨ ខែសីហា ឆ្នាំ២០១៨ត្រង់ចំណុចខាងមុនមន្ទីរពេទ្យសែនសុខ តាមបណ្ដោយផ្លូវ១៩៨៦កែង និងផ្លូវ១០១១ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
ជនបង្កមានឈ្មោះ ពេជ្រ ប៊ុន្ថា ភេទប្រុស អាយុ៣៣ឆ្នាំ ជាសន្តិសុខយាមក្លិបហ្គោលឡាញ ស្នាក់នៅបន្ទប់ជួលក្បែរកន្លែងកើតហេតុ ។ ចំណែកឯជនរងគ្រោះមានឈ្មោះ វ៉ា រី ភេទប្រុសអាយុ៣៣ឆ្នាំ ជាអ្នកបើកម៉ូតូកង់បី ស្នាក់នៅម្តុំពោធិ៍ចិនតុង ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញជនបង្កខាងលើ រួមទាំងបុរសពីរនាក់ផ្សេងទៀតបានធ្វើដំណើរថ្មើរជើង តាមបណ្ដោយផ្លូវ១៩៨៦ ក្នុងទិសដៅពីកើតទៅលិច និងក្នុងស្ថានភាពស្រវឹង ដោយបណ្តើរជនបង្កខាងលើ ។ លុះដើរមកដល់ចំណុចកើតហេតុជនបង្កខាងលើក៏បានដើរឆ្លងផ្លូវទៅផ្លូវម្ខាងទៀតតែម្នាក់ឯង ។ ហើយខណៈពេលដែលដើរឆ្លងបានពាក់កណ្ដាលផ្លូវក៏ស្រាប់តែមានម៉ូតូកង់បីឥណ្ឌាមួយគ្រឿងម៉ាកបាចា ពណ៍ស ពាក់ស្លាកលេខ ភ្នំពេញ 1HD-6332 បើកបរដោយបុរសម្នាក់ និងដឹងនារីម្នាក់ពីក្រោយ តាមបណ្តោយផ្លូវ១៩៨៦ ក្នុងទិសដៅពីកើតទៅលិច ។
ពេលនោះស្រាប់តែជនបង្កខាងលើបានឈប់នៅកណ្តាលផ្លូវ ហើយចង្អុលមុខជនរងគ្រោះស្រែកឲ្យឈប់កង់បី ។ បន្ទាន់មកជនរងគ្រោះក៏បានឈប់ម៉ូតូកង់បីចម្ងាយប្រមាណ១០ម៉ែត្រពីជនបង្កខាងលើ ។ ភ្លាមៗនោះស្រាប់តែជនបង្កខាងលើរត់សំដៅទៅវាយកញ្ចក់ម៉ូតូកង់បីរបស់ជនរងគ្រោះមួយដៃ បណ្ដោយឲ្យបែកស្រាំ ហើយក៏កើតជាឈ្លោះប្រកែកគ្នាយ៉ាងតឹងសរសៃក ហើយក៏ត្រូវប្រជាពលរដ្ឋដែលនៅក្បែរនោះជួយចាប់ឃាត់ និងបានរាយការជូនសមត្ថកិច្ចមូលដ្ឋានឲ្យជួយមកអន្តរាគមន៍ ។
បើតាមសម្តីពីជនរងគ្រោះបានឲ្យដឹងថា នៅមុនពេលកើតហេតុគាត់បានបើកម៉ូតូកង់បីរបស់គាត់ដឹកភ្ញៀវម្នាក់ ចេញមកពីខាងមុខក្លិបហ្គោលឡាញ បំណងដឹកទៅដាក់នៅម្តុំពោធិ៍ចិនតុង ។ លុះមកដល់ចំណុចកើតហេតុ ស្រាប់តែជនបង្កខាងលើឈប់នៅកណ្តាលផ្លូវ ហើយស្រែកឲ្យគាត់ឈប់ម៉ូតូកង់បី ហើយដោយគាត់ខ្លាចមានបញ្ហាក៏ព្រមឈប់ម៉ូតូកង់បីរបស់គាត់ ។ បន្ទាន់មកក៏ស្រាប់តែជនបង្កខាងលើស្ទុះមកវាយកញ្ចក់ម៉ូតូកង់បីរបស់គាត់ បណ្តាលឲ្យបែក ដោយចោទគាត់ថា បម្រុងបើកកង់បីបំបុករូបគេ ។
នៅចំពោះមុខសមត្ថកិច្ចជនបង្កខាងលើបានឆ្លើយសារភាពថា រូបគេពិតជាបានវាយបំបែកកញ្ចក់កង់បីរបស់ជនរងគ្រោះពិតប្រាកដមែន ព្រោះដោយមុនពេលកើតហេតុរូបគេទើបតែចេញមកពីកន្លែងធ្វើការ ហើយបម្រុងដើរទៅបន្ទប់ជួល ហើយខណៈពេលដែលគេដើរឆ្លងផ្លូវស្រាប់តែម៉ូតូកង់បីខាងលើបម្រុងបើកបំបុករូបគេ ហើយភ្លាមៗនោះរូបគេក៏បានវាយកញ្ចក់កង់បីខាងលើមួយដៃ ដើម្បីការពារខ្លួន ។
ក្រោយពេលកើតហេតុសមត្ថកិច្ចបាននាំជនរងគ្រោះទៅសាកសួរនាំ និងដាក់ពាក្យបណ្តឹងនៅប៉ុស្តិ៍នគរបាលរដ្ឋបាលភ្នំពេញថ្មី ។ ដោយឡែកជនបង្កខាងលើត្រូវបានសមត្ថកិច្ចប៉ុស្តិ៍នគរបាលរដ្ឋបាលភ្នំពេញថ្មីកសាងសំណុំរឿងបញ្ជូនខ្លួនទៅអធិការដ្ឋាននគរបាលខណ្ឌសែនសុខ ដើម្បីចាត់ការទៅតាមនីតិវិធី ៕
ចែករំលែកព័តមាននេះ