រាជធានីភ្នំពេញ ៖ ជនជាតិវៀតណាមចំនួន៨នាក់ ត្រូវបានកម្លាំងនគរបាលនាយកដ្ឋានស៊ើបអង្កេតនិងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ ឃាត់ខ្លួនពីបទស្នាក់នៅខុសច្បាប់នៃព្រះរាជាណាចក្រ
កម្ពុជា ។
ការឃាត់ខ្លួជនជាតិវៀតណាមនេះ ធ្វើឡើងកាលពីវេលាម៉ោង៦ព្រឹកថ្ងៃទី២៣ សីហា នៅភូមិលូ សង្កាត់ស្វាយប៉ាក ខណ្ឌប្ញស្សីកែវ ដឹកនាំដោយលោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី និងមានការចូលរួមសម្របសម្រួលពីលោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ព្រមទាំងមានការសហកាជាមួយស្នងការដ្ឋាននគរបាលរាជធានីភ្នំពេញផងដែរ ។
តាមនគរបាលបានឱ្យដឹងថា នៅក្នុងការត្រួតពិនិត្យនេះ សមត្ថកិច្ចចម្រុះបានរកឃើញជនបរទេសចំនួន៥២នាក់ (ស្រី៣២នាក់) ជាជនជាតិវៀតណាម ក្នុងនោះចំនួន៤៤នាក់(ស្រី៣០នាក់) មានឯកសារប្រើប្រាស់ត្រឹមតាមច្បាប់អន្តោប្រវេសន៍ ។ ដោយឡែក ជនជាតិវៀតណាមចំនួន៨នាក់ (ស្រី២នាក់) បានលួចស្នាក់នៅនិងប្រកបរបរដោយខុសច្បាប់ គ្មានលិខិតឆ្លងដែន និងប្រើប្រាស់ឯកសារមិនត្រឹមត្រូវ ។
មន្ត្រីនគរបាលបានឱ្យដឹងថា ជនជាតិវៀតណាមទាំង៨នាក់ ត្រូវបាននាំទៅកាន់អគ្គនាយកដ្ឋានអន្តោប្រវេសន៍ ដើម្បីសាកសួរនិងពិនិត្យឯកសារតាមនីតិវិធី ។ គួរបញ្ជាក់ថា កាលពីថ្ងៃទី២១ ខែសីហា កន្លងទៅ នគរបាលក៏បានចុះត្រួតពិនិត្យនៅស្វាយប៉ាកនេះដែរ ដោយឃាត់ខ្លួនជនជាតិវៀតណាម៧នាក់ម្តងមកហើយ និងលើកនេះបាន៨នាក់ទៀត ៕
ចែករំលែកព័តមាននេះ