រាជធានីភ្នំពេញ ៖ កញ្ញាស៊ូ ដាណេ មុនពេលក្លាយជាតារាជះរស្មីក្នុងពិភពសិល្បៈចម្រៀងពោរពេញដោយសេចក្តីព្យាយាមជារៀងរាល់ថ្ងៃ។ តើនាងមានប្រវត្តិតស៊ូបែបណាខ្លះ ?
កញ្ញាស៊ូ ដាណេ ឈ្មោះពិតឆោម ច័ន្ទណេត អាយុ៣៤ឆ្នាំ មានបងប្អូនបង្កើតចំនួន៤នាក់ ប្រុស៣ ស្រី១ ក្នុងនោះនាងជាកូនពៅ ។ ឪពុករបស់ដាណេ ជាតន្ត្រីករ ។ បញ្ចប់ការសិក្សាត្រឹមថ្នាក់ទី១០នៅវិទ្យាល័យបាក់ទូក ស៊ូ ដាណេ ចូលហាត់រៀនសិល្បៈរបាំប្រជាប្រិយនៅមន្ទីរវប្បធម៌ និងវិចិត្រសិល្បៈរាជធានីភ្នំពេញនាឆ្នាំ២០០៤ ។ នាងបានចូលរៀននៅសាលាមធ្យមវិចិត្រសិល្បៈជិត២ឆ្នាំ និងរៀនជំនាញសិល្បៈនៅក្លឹបអឹមអេសអិល រួចទើបផ្លាស់ទៅមន្ទីរវប្បធម៌ និងវិចិត្រសិល្បៈវិញ ។
ឆ្លងកាត់ការហាត់រៀនសិល្បៈ ស៊ូ ដាណេ ចេះច្រើនទម្រង់ ដូចជាច្រៀងមហោរី រាំរបាំប្រជាប្រិយ និងបុរាណ ច្រៀងបាសាក់ និងស្មូត្រ ។ អ្នកនៅក្នុងសង្គមសិល្បៈកោតសរសើរតារាសម្បុរស្រអែមខ្មៅស្រស់រូបនេះថាជាតារាពោរពេញដោយសមត្ថភាពកម្ររកបាន ។
នាពេល ថ្មីៗកន្លងមករៀបរាប់ដំណើរជីវិតសិល្បៈក្នុងទឹកមុខស្រងូត ទាំងដកដង្ហើមធំ ស៊ូ ដាណេ ថា ការតស៊ូលើវិថីសិល្បៈនាងមិនខុសពីខ្សែជីវិតតស៊ូរបស់រៀមច្បងសិល្បៈថ្សេងទៀតទេ ។ ព្រោះតែស្រឡាញ់សិល្បៈកាលនៅវ័យក្មេងនាងលំបាកណាស់ ដ្បិតជីវភាពខ្វះខាត ហើយក្នុងស្ថានភាពបែបនេះម៉ាក់នាងខិតខំរកស៊ីចិញ្ចឹមកូនគ្រប់គ្នា ។ អ្វីដែលនាងចងចាំ កាលនៅហាត់សិល្បៈ គឺរាល់ព្រឹកជិះកង់ពីអគារប៊ូលឌិញទៅរៀនសិល្បៈនៅម្តុំក្តាន់ពីរជាប់ទីស្តីការគណៈរដ្ឋមន្ត្រី ។ ពេលខ្លះទាន់ម៉ោងពេលខ្លះយឺត។
ដាណេពោលថា «ពេលខ្លះកុហកលោកគ្រូអ្នកគ្រូថា កង់បែក ឬអ៊ីចេះអ៊ីចុះ ឲ្យតែបានហាត់សិល្បៈបុរាណព្រោះតែស្រឡាញ់ចង់ការពារចេញពីបេះដូងរហូតប៉ាន់ស្មានមិនបានពីទំហំទឹកចិត្តសិល្បៈមួយនេះ…» ។
ក្រោយពេលចេះចាំស្ទាត់ទាំងក្បាច់រាំ ទាំងការច្រៀង ស៊ូ ដាណេ បានឡើងសម្តែងជាប្រចាំក្នុងកម្មវិធីតន្ត្រីផ្សាយបន្តផ្ទាល់ «មន្តស្នេហ៍សំនៀង»របស់ទូរទស្សន៍ស៊ីធីអិន ។ នាងសម្តែងជាប្រចាំនៅទីនោះភាគច្រើនជាតួឯកដូចជាតួនាងទាវ សុវណ្ណតែងអន ជំទាវស្រែន តួនាងកង្រី ជាដើម ។
ឈានដល់ឆ្នាំ២០០៧ ស៊ូ ដាណេ សម្រេចចិត្តចាប់អាជីពជាតារាចម្រៀង ក្រោមការជំរុញលើកទឹកចិត្តពីលោកគ្រូអ្នកគ្រូ ក៏ដូចជាមិត្តរួមសិល្បៈ ដោយ ម្នាក់ៗ សុទ្ធតែនិយាយថា «ច្រៀងបាន ហើយសំឡេងទៀតសោតស្រដៀងអ្នកស្រីប៉ែន រ៉ន »។ ពីដំបូងអត់គិតថា ខ្លួនឯងអាចចេះច្រៀងទេ ក្រៅតែពីដឹងថាចូលចិត្តច្រៀងលេងបទពីដើមរបស់អ្នកស្រីរស់ សេរីសុទ្ឋា និងលោកស្រីប៉ែន រ៉ន ។ លុះមានអ្នកប្រាប់ថា នាងខ្ញុំច្រៀងល្អ កាច់ស្ទីលលោកស្រីប៉ែន រ៉ន បាន ក៏ខំហាត់រហូតចាប់មុខងារច្រៀងមួយទៀត» ។
វេទិកាសិល្បៈដែលស៊ូ ដាណេ ច្រៀងដំបូងនាងនៅចាំថា គឺប៉ុស្តិ៍ទូរទស្សន៍បាយ័ន និងទូរទស្សន៍ប៉ុស្តិ៍លេខ៣ រួចបន្តច្រៀងជាកិត្តិយសនៅកម្មវិធី«មន្តស្នេហ៍សំនៀង» ដោយច្រៀងផងដល់វគ្គសម្តែងរឿង ខ្លីៗ ក៏ចូលសម្តែងភ្លាម ។
លើសពីនេះដាណេធ្លាប់ច្រៀងបម្រើកងទ័ពទាំងជើងទឹកជើងគោកការពារព្រំដែន ដូចជាទៅដល់កោះពូលូវ៉ៃ កោះតាង និងកោះ ឆ្ងាយៗទៀតក្នុងកម្មវិធី«នាទីយុទ្ឋជន»របស់ទូរទស្សន៍បាយ័នដែលនាងមានមោទនភាព និងសំណាងបានស្គាល់តំបន់ឆ្ងាយៗរបស់កម្ពុជា ។
ចំពោះឱកាសច្រៀងនៅក្រៅប្រទេសឯណោះវិញ ស្រស់ស្រីស៊ូ ដាណេ បានទៅប្រទេសសិង្ហបុរីមុនគេ ក្រោយមកចេញទៅប្រទេសអូស្ត្រាលី។ ឆ្នាំ២០១៣នាងបានចេញទៅសហរដ្ឋអាមេរិករយៈពេល១០ខែច្រៀងផងរាំរបាំផង ពេលខ្លះស្មូត្រជូនលោកតាលោកយាយស្តាប់តាមការស្នើសុំក្នុងពិធីបុណ្យទាន ។
ក្រោយពេលត្រឡប់ពីអាមេរិកវិញ ស៊ូ ដាណេទៅបារាំង និងបន្តទៅអូស្ត្រាលីទៀត ។ បានឱកាសហោះឆ្លងដែនពីប្រទេសមួយទៅប្រទេសមួយ ស៊ូ ដាណេ និយាយថា«ខ្ញុំសូមថ្លែងអំណរគុណលោកគ្រូអ្នកគ្រូដែលបានជួយបង្ហាត់បង្រៀន ហើយពិតជារំភើបដែលអាចបង្ហាញរបាំ ចម្រៀង និងសិល្បៈខ្មែរលើឆាកអន្តរជាតិដែលជាបំណងដ៏ធំមួយរបស់នាងខ្ញុំ» ។
បច្ចុប្បន្ននេះកញ្ញាស៊ូ ដាណេ សន្សំលុយបានបើកហាងលក់គ្រឿងសមុទ្រ និងកាហ្វេធម្មជាតិនៅតាមបណ្តោយផ្លូវត្រសក់ផ្អែមក្បែរផ្សាសុីឡឹប រាជធានីភ្នំពេញ ។ វ័យច្រើនបន្តិចហើយ ភាពនៅលីវនឹងមិនបន្តទៀតទេនៅឆ្នាំក្រោយ សម្រាប់កញ្ញាស៊ូ ដាណេ ។ បុរសអាណិកជន គឺជាអ្នកដែលដឹកដៃនាងចូលរោងការ ។
បន្ទាប់ពីរៀបការរួចស៊ូ ដាណេ គ្រោងនឹងទៅរស់នៅអាមេរិកជាមួយស្វាមីមួយរយៈ ហើយពេលសន្សំបានប្រាក់បង្កើតមុខជំនួញហើយនោះនាងត្រឡប់មករស់នៅលើទឹកដីកំណើតវិញ ។ នាងស្រលាញ់មាតុភូមិមិនអាចចាកចោលជារាងរហូតបានឡើយ ៕
ចែករំលែកព័តមាននេះ