ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ (Donald Trump) បាននិយាយកាលពីថ្ងៃសៅរ៍មកថា សហរដ្ឋអាមេរិកអាចនឹងសម្រេចបានកិច្ចព្រមព្រៀងពាណិជ្ជកម្មដ៏ធំមួយជាមួយនឹងប្រទេសម៉ិកស៊ិកក្នុងពេលឆាប់ៗ ខណៈដែលអ្នកចរចាពាណិជ្ជកម្មរបស់ម៉ិកស៊ិកឲ្យសញ្ញាថា ជិតដោះស្រាយបញ្ហាវិធានថាមពលនិងតម្រូវការអាមេរិកសម្រាប់កិច្ចព្រមព្រៀងពាណិជ្ជកម្មសេរីអាមេរិកខាងជើង…
ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ (Donald Trump) បាននិយាយកាលពីថ្ងៃសៅរ៍មកថា សហរដ្ឋអាមេរិកអាចនឹងសម្រេចបានកិច្ចព្រមព្រៀងពាណិជ្ជកម្មដ៏ធំមួយជាមួយនឹងប្រទេសម៉ិកស៊ិកក្នុងពេលឆាប់ៗ ខណៈដែលអ្នកចរចាពាណិជ្ជកម្មរបស់ម៉ិកស៊ិកឲ្យសញ្ញាថា ជិតដោះស្រាយបញ្ហាវិធានថាមពលនិងតម្រូវការអាមេរិកសម្រាប់កិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) ហើយ ។
លោក Jesus Seade ដែលនឹងក្លាយជាប្រធានអ្នកចរចាសម្រាប់រដ្ឋាភិបាលថ្មីរបស់ម៉ិកស៊ិក បានិយាយថា លោកនិងអ្នកតំណាងពាណិជ្ជកម្មអាមេរិក លោក Robert Lighthizer បានចរចាពីដំណើរការត្រួតពិនិត្យកំណត់ពេលច្បាស់លាស់ហើយ ។
គួរបញ្ជាក់ដែរថា ប្រទេសម៉ិកស៊ិក និងកាណាដា បានប្រឆាំងនឹងតម្រូវការអាមេរិកដែលទាមទារថា នឹងលុបកិច្ចព្រមព្រៀងនេះចោលលុះត្រាតែមានការចរចាឡើងវិញជារៀងរាល់៥ឆ្នាំម្តង ប៉ុន្តែលោក Seade បាននិយាយថា រូបលោកនិងលោក Lighthizer កាលពីសប្តាហ៍ មុនបានចាប់ផ្តើមពិភាក្សាពីវិធីថ្មីៗក្នុងការត្រួតពិនិត្យកិច្ចព្រមព្រៀងនេះឡើងវិញ ដែលផ្តល់ភាពប្រាកដប្រជាដល់ការវិនិយោគ ។
អ្នកនាំពាក្យម្នាក់របស់ការិយាល័យអ្នកតំណាងពាណិជ្ជកម្មអាមេរិក បានបដិសេធថា លោក Lighthizer មិនបានបន្ធូរគោលជំហររបស់លោកទាក់ទិននឹងការទាមទារពីអាមេរិកនេះឡើយ ។
លោក Seade បានបន្តទៀតថា វិធានសម្រាប់វិស័យយានយន្តត្រូវបានដោះស្រាយហើយ ប៉ុន្តែផ្នែកមួយចំនួនទៀតដូចជា ពេលវេលាកំពុងតែត្រូវបានពិភាក្សា ។ លោកបានបន្ថែមកាលពីថ្ងៃសៅរ៍ទៀតថា ភាគីទាំងសងខាង ក៏បានព្រមព្រៀងគ្នាច្រើនលើវិស័យថាមពល ក្រោមកិច្ចព្រមព្រៀងNAFTAដែរ ៕
ចែករំលែកព័តមាននេះ