ខេត្តកំពង់ស្ពឺ ៖ ជនដៃដល់ដែលបានកាប់២នាក់ប្តី-ប្រពន្ធនឹងកាំបិតផ្គាក់ បណ្តាលឱ្យរងរបួសធ្ងន់នៅស្រុក
ឱរ៉ាល់ ហើយត្រូវសមត្ថកិច្ចចាប់ខ្លួននោះ បានបោកក្បាលខ្លួនឯងស្លាប់បាត់ទៅហើយ កាលពីព្រឹកថ្ងៃទី២៦ ខែសីហា ។
ការបោកក្បាលនឹងជញ្ជាំងបន្ទប់ឃុំខ្លួននេះ ធ្វើឲ្យនគរបាលនឹកឃើញពាក្យដែលជនសង្ស័យនិយាយថា «បើចាប់គាត់ សូមបាញ់សម្លាប់គាត់ចោលទៅ បើមិនដូច្នេះទេ គាត់នឹងសម្លាប់ខ្លួននៅក្នុងគុក» ។
លោកវរសេនីយ៍ឯក សម សាក់ នាយការិយាល័យនគរបាលព្រហ្មទណ្ឌកម្រិតធ្ងន់ខេត្តបានឱ្យក្រុមអ្នកកាសែតឱ្យដឹងថា បុរសចំណាស់ជាជនដៃដល់ខាងលើ ត្រូវបាននគរបាលស្រុកឱរ៉ាល់បញ្ជូនមកការិយាល័យរបស់លោក ពីបទបង្កហិង្សាកាប់២នាក់ប្តីប្រពន្ធឲ្យរងរបួសធ្ងន់ ។
ពេលចាប់បញ្ជូនមកដល់២ទៅ៣ម៉ោង បុរសរូបនេះបានបោកក្បាលបណ្តាលឱ្យមានរបួសហូរឈាមតាមត្រចៀក ។ ពេលនោះលោកបានរាយការណ៍ទៅថ្នាក់លើ ហើយបានឱ្យមន្ត្រីរបស់លោកបញ្ជូនទៅព្យាបាលនៅមន្ទីរពេទ្យបង្អែកខេត្ត ប៉ុន្តែមកដល់ម៉ោង៨ព្រឹកថ្ងៃទី២៦ខែសីហា បុរសរូបនេះបានស្លាប់បាត់ទៅហើយ។
លោក អ៊ូ ផាត ព្រះរាជអាជ្ញារងអមសាលាដំបូងខេត្ត បានចូលរួមពិនិត្យសពបុរសខាងលើនិងមានប្រសាសន៍ឱ្យដឹងថា ជនដៃដល់រូបនេះទំនងតូចចិត្ត ព្រោះថាកន្លងមកក្រុមគ្រួសារជនរងគ្រោះតែងតែផ្តល់ជាលុយកាក់និងសម្ភារមិនសូវលស់ពេលទេឱ្យគាត់ដោយក្តីអាណិត ទើបបុរសរូបនេះបោកក្បាលបណ្តាលឱ្យរងរបួសធ្ងន់ និងបានស្លាប់ក្រោយពេលបញ្ជូនទៅសង្គ្រោះនៅមន្ទីរពេទ្យបង្អែកខេត្ត ។
បើតាមលោកវេជ្ជបណ្ឌិត សាំង ស្រេង និងលោកគ្រូពេទ្យប្រចាំការលោក ម៉ម វឿន បានសន្និដ្ឋានថា បុរសដែលស្លាប់នេះគឺមានរបួសក្បាលធ្ងន់ដោយសារបោកក្បាលបណ្តាលឱ្យដាច់សរសៃឈាមខួរក្បាលតាំងពីព្រឹកមកម្លេ៉ះ ។
គួររំលឹកថា កាលពីវេលាម៉ោង៧យប់ថ្ងៃទី២៤ ខែសីហា ឆ្នាំ២០១៨ មានករណីមនុស្សឃាតមិនបានសម្រេចមួយកើតឡើងនៅភូមិតាមិញ ឃុំសង្កែសាទប ស្រុកឱរ៉ាល់ បង្កដោយជនឈ្មោះ យ៉ុង កេន ភេទប្រុស អាយុ៦៧ឆ្នាំរស់នៅក្នុងភូមិ ឃុំ ខាងលើ បានយកកាំបិតផ្គាក់កាប់ជនរងគ្រោះឈ្មោះ សុខ ហុន ភេទប្រុសអាយុ៣៨ឆ្នាំ រស់នៅក្នុងភូមិឃុំជាមួយគ្នា ត្រូវចំនួន៦កាំបិត ។
លុះប្រពន្ធឈ្មោះ ញ៉ូញ យីម អាយុ៤២ឆ្នាំ ទៅជួយប្តី ជនសង្ស័យក៏បានកាប់ទៀតត្រូវក្បាលជាច្រើនកាំបិត បណ្ដាលឱ្យរងរបួសធ្ងន់ទាំង២នាក់ប្តីប្រពន្ធ និងត្រូវបានសាច់ញាតិនិងអ្នកភូមិជួយដឹកបញ្ជូនទៅព្យាបាលនៅឯរាជធានីភ្នំពេញ ។ចំណែកជនសង្ស័យត្រូវបានឃាត់ខ្លួនភ្លាមៗ បន្ទាប់ពីកើតហេតុនាំយកមកឃុំខ្លួនបណ្តោះអាសន្ននៅអធិការដ្ឋាននគរបាលស្រុក ដើម្បីកសាងសំណុំរឿងតាមនីតិវិធី ។
ករណីនេះកើតឡើងបណ្តាលមកពីជនសង្ស័យឈ្មោះ យ៉ុង កេន មានគំនិតច្រណែននឹងគ្រួសារជនរងគ្រោះដែលពិការតែរកសុីមានបានជាងខ្លួន ហើយបានលួចនំជនរងគ្រោះ៤កញ្ចប់ឱ្យចៅក៏មានការស្តីបន្ទោស និងព្រមានប្តឹងទើបកាប់តែម្តងទៅ ក្នុងគោលបំណងសម្លាប់បំបិទមាត់ ៕
ចែករំលែកព័តមាននេះ