ខេត្តកំពង់ស្ពឺ ៖ ជនសង្ស័យ២នាក់ត្រូវបានកម្លាំងអធិការដ្ឋាននគរបាលស្រុកគងពិសីឃាត់ខ្លួន បន្ទាប់ពីពាក់ព័ន្ធករណីជួញដូរគ្រឿងញៀនខុសច្បាប់ ។ ក្រោយសមត្ថកិច្ចឃាត់ខ្លួនជនសង្ស័យទាំង២នាក់នេះ ក្រុមគ្រួសាររបស់ជនសង្ស័យបានសម្តែងនូវការខកចិត្តត្បិតបានប្រាប់កូនថាឱ្យខំរកកការងារត្រឹមត្រូវធ្វើ តែបែរជានាំគ្នាមកជួញដូរថ្នាំញៀនទៅវិញ។ ការឃាត់ខ្លួនជនសង្ស័យនេះធ្វើឡើងនៅវេលាម៉ោង១និង២០នាទីរសៀលថ្ងៃទី២៧ ខែសីហា ឆ្នាំ២០១៨ នៅចំណុចភូមិបល្ល័ង្គរាជា ឃុំស្នំក្រពើ ស្រុកគងពិសី ខេត្តកំពង់ស្ពឺ។
ប្រភពពីមន្ត្រីនគរបាលស្រុកមួយរូបបានប្រាប់ថា កម្លាំងអធិការនគរបាលស្រុកគងពិសី ដឹកនាំដោយ លោកវរសេនីយ៍ឯក ឃឹម សុផាន់ណារ៉ា អធិការនគរបាលស្រុក បានដឹកនាំកំលាំងចុះបង្ក្រាបមុខសញ្ញាសង្ស័យជួញដូរដោយខុសច្បាប់នូវសារធាតុញៀនបានចំនួន២នាក់ ៖ ម្នាក់ឈ្មោះ អេង តុលា ភេទប្រុស អាយុ២៨ឆ្នាំ នៅភូមិជង្រុក ឃុំជង្រុក ស្រុកគងពិសី មុខរបរ មិនពិតប្រាកដ និងម្នាក់ទៀតឈ្មោះ អ៊ុន កើត ភេទប្រុស អាយុ៣៦ឆ្នាំ នៅព្រៃរោង ឃុំជង្រុក ស្រុកគងពិសី មុខរបរ មិនពិតប្រាកដ។
ក្នុងចុះឃាត់ខ្លួនជនសង្ស័យទាំង២នាក់ខាងលើ សមត្ថកិច្ចដកហូតបានគ្រឿងញៀនប្រភេទម៉ាទឹកកកចំនួន៤កញ្ចប់ ម៉ូតូ១គ្រឿង និងទូរស័ព្ទដៃចំនួន៣គ្រឿង រួមនឹងឧបករណ៍ប្រើប្រាស់គ្រឿងញៀនមួយចំនួន។
បច្ចុប្បន្នជនសង្ស័យរួមនឹងវត្ថុតាងត្រូវបានកម្លាំងសមត្ថកិច្ចស្រុកកសាងសំណុំរឿងបញ្ជូនទៅការិយាល័យជំនាញខេត្តចាត់ការបន្តតាមនីតិវិធី៕
ចែករំលែកព័តមាននេះ