ខេត្តសៀមរាប ៖ នាថ្ងៃទី២៦ ខែសីហា ឆ្នាំ២០១៨ កម្លាំងការិយាល័យជំនាញអាវុធគ្រឿងផ្ទុះ និងជាតិពុល នៃស្នងការដ្ឋាននគរបាលខេត្ត ដឹកនាំដោយលោកវរៈសេនីយ៍ឯក ឆេត ញ៉ា នាយការិយាល័យបានចាត់តាំងកម្លាំង ចុះធ្វើការត្រួតពិនិត្យឃ្លាំងផ្ទុករំសេវគ្រឿងផ្ទុះការដ្ឋានផលិតថ្ម អង្គរផ្លែន របស់ថៃ និងខ្មែរ ស្ថិតនៅចំណុចភ្នំព្រៃបាំង ក្នុងភូមិគោកដូង ឃុំគោកដូង ស្រុកអង្គរជុំ ខេត្តសៀមរាប។
លោកវរៈសេនីយ៍ឯក ឆេត ញ៉ា នាយការិយាល័យ បានមានប្រសាសន៍ថា ដោយអនុវត្តតាមការណែនាំពីសំណាក់លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្ត ដើម្បីបង្កើនការគ្រប់គ្រង់រំសេវគ្រឿងផ្ទុះ ដើម្បីរក្សាបាននូវសន្តិសុខ សុវត្ថិភាព ជូនប្រជាពលរដ្ឋនាថ្ងៃនេះ ក្នុងការចុះត្រួតពិនិត្យផងដែរនោះ កម្លាំងយើងក៏បានធ្វើការណែនាំដល់ម្ចាស់ការដ្ឋាន ឱ្យគាត់បានយល់អំពីហានិភ័យ នៃរំសេវគ្រឿងផ្ទុះ និងឱ្យពួកគាត់រៀបចំទុកដាក់រំសេវគ្រឿងផ្ទុះនៅក្នុងឃ្លាំង ឱ្យបានត្រឹមត្រូវ ទៅតាមលក្ខណៈបច្ចេកទេសក្រោយពីការណែនាំរបស់សមត្ថកិច្ចយើង។
ក្នុងនោះដែរលោក ជា សុភក្តិ ម្ចាស់ការដ្ឋានខាងកម្ពុជា ក៏ដូចជាអ្នកគ្រប់គ្រងថៃ-ខ្មែរ ក៏បានទទួលយល់ព្រមអនុវត្តតាមការណែនាំ របស់សមត្ថកិច្ចជំនាញយើង ដើម្បីចុះក្នុងសៀវភៅតាមដានគ្រប់គ្រង ក្នុងការស្តុករំសេវការចំណូលការចំណាយ ប្រើប្រាស់រំសេវ ដើម្បីធានាបាននូវសន្តិសុខ សុវត្ថិភាព ឱ្យបានកាន់តែល្អប្រសើរបន្ថែមទៀងផងដែរ៕
ចែករំលែកព័តមាននេះ