ខេត្តព្រៃវែង ៖ រថយន្តយីឌុបចំនួន១១គ្រឿង ត្រូវបានក្រុមជញ្ជីងចល័ត របស់ក្រសួងសាធារណៈការ និងដឹកជញ្ជូន ចាប់ផាកពិន័យ ដោយសារតែរថយន្តទាំងនោះដឹកលើសទម្ងន់ដែលច្បាប់អនុញ្ញាត។ សកម្មភាពឆ្មក់ចុះចាប់រថយន្តដឹកលើសទម្ងន់នេះ បានចាប់ធ្វើឡើងរយៈពេល៣ម៉ោង គឺចាប់ពីម៉ោង២រសៀល រហូតដល់ម៉ោង៥ល្ងាច ថ្ងៃទី២៧ ខែសីហានេះ នៅលើកំណាត់ផ្លូវជាតិលេខ១ ត្រង់ចំណុចភូមិព្រៃខ្លា ឃុំកំពង់សឹង្ហ ស្រុកព្រះស្តេច ខេត្តព្រៃវែង។
មន្ត្រីជំនាញដែលចុះប្រតិបត្តិការនេះ បានប្រាប់ឲ្យដឹងថា ក្នុងរយៈពេល៣ម៉ោងនេះ ក្រុមជញ្ជីងចល័តចាប់រថយន្តយីឌុបធំៗបានចំនួន១៤គ្រឿង ក្នុងនោះក្រោយពីថ្លឹងទម្ងន់រួចរកឃើញថា មានរថយន្តដឹកខ្សាច់ និងរថយន្តដឹកថ្មចំនួន១២គ្រឿង បានដឹកលើសទម្ងន់ ចំណែករថយន្ត២គ្រឿងផ្សេងទៀត ពុំបានដឹកលើសទម្ងន់ទេ ហើយមន្ត្រីជំនាញក៏បានអនុញ្ញាតឲ្យបន្តដំណើរទៅមុខ ដោយមិនបានឃាត់ទុក ឬផាកពិន័យអ្វីទេ។
ដោយឡែករថយន្តដែលដឹកលើសទម្ងន់១២គ្រឿង ក្នុងនោះលើសទាបបំផុត៧តោន និងខ្ពស់បំផុត ២៥តោន ត្រូវបានមន្ត្រីជំនាញហៅម្ចាស់រថយន្តឲ្យធ្វើកិច្ចសន្យា និងបង់ផាកពិន័យទៅតាមផ្លូវច្បាប់ ព្រមទាំងកាយទម្លាក់ខ្សាច់ និងថ្មចេញពីរថយន្ត លែងឲ្យលើសទម្ងន់ ទើបអនុញ្ញាតឲ្យយករថយន្តចេញ ទៅវិញបាន។
គួរបញ្ជាក់ផងដែរថា សកម្មភាពឆ្មក់ចេញចាប់រថយន្តដឹកលើសទម្ងន់ទាំងនេះ ក៏ទទួលបានការគាំទ្រយ៉ាងខ្លាំងផងដែរ ពីសំណាក់បងប្អូនប្រជាពលរដ្ឋ ព្រោះក្រុមរថយន្តទាំងនោះ មិនត្រឹមតែដឹកលើសទម្ងន់នោះទេ គឺគេដាក់ខ្សាច់ និងថ្មហៀរៗទ្រុង ពេលរត់នៅលើដងផ្លូវតែងតែជ្រុះខ្សាច់ ថ្មនៅតាមដងផ្លូវ ធ្វើឲ្យអ្នកដំណើរដែលបើកតាមក្រោយមានការព្រួយបារម្ភជាខ្លាំង គឺខ្លាចធ្លាក់មកត្រូវពួកគាត់ បណ្តាលឲ្យមានគ្រោះថ្នាក់ជាយថាហេតុ៕
https://www.youtube.com/watch?v=BILmWtIfj0E
ចែករំលែកព័តមាននេះ