រាជធានីភ្នំពេញ ៖ រដ្ឋសភានីតិកាលទី៦ នឹងបើកសម័យប្រជុំជាលើកដំបូងក្រោមព្រះរាជាអធិបតីភាព ដ៏ខ្ពង់ខ្ពស់របស់ព្រះករុណា ព្រះបាទសម្តេចបរមនាថនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នាព្រឹកថ្ងៃទី៥…
រាជធានីភ្នំពេញ ៖ រដ្ឋសភានីតិកាលទី៦ នឹងបើកសម័យប្រជុំជាលើកដំបូងក្រោមព្រះរាជាអធិបតីភាព ដ៏ខ្ពង់ខ្ពស់របស់ព្រះករុណា ព្រះបាទសម្តេចបរមនាថនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នាព្រឹកថ្ងៃទី៥ ខែកញ្ញា ឆ្នាំ២០១៨។ នេះបើយោងតាមសេចក្តីជូនដំណឹង របស់អគ្គលេខាធិការដ្ឋាន នៃរដ្ឋសភាដែលបានផ្សព្វផ្សាយនារសៀលថ្ងៃទី២៧ ខែសីហា ឆ្នាំ២០១៨នេះ។
នៅក្នុងពិធីដ៏មហាឡោរឹក និងជាប្រវត្តិសាស្ត្រនេះ ឥស្សជនជាន់ខ្ពស់ អង្គទូតប្រចាំនៅ ព្រះរាជាណាចក្រកម្ពុជា និងតំណាងអង្គការក្រៅរដ្ឋាភិបាលមួយចំនួន ក៏ត្រូវបានអញ្ជើញឲ្យចូលរួម ជាកិត្តិយសផងដែរ។ បន្ទាប់ពីបើកសម័យប្រជុំជាលើកដំបូងនេះ សម័យប្រជុំលើកទី១នីតិកាលទី៦ នឹងផ្តើមការងារក្រោមអធិបតីភាពរបស់សម្តេច អគ្គមហាពញាចក្រី ហេង សំរិន ប្រធានរដ្ឋសភា និងសមាជិករដ្ឋសភាដើម្បីសម្រេច៖
ទី១-សម្រេចអំពីសុពលភាព នៃអណត្តិរបស់សមាជិកនីមួយៗ និងទី២- អនុម័តបទបញ្ជាផ្ទៃក្នុង នៃរដ្ឋសភានីតិកាលទី៦។ សេចក្តីជូនដំណឹងដដែលបញ្ជាក់ថា នៅព្រឹកថ្ងៃទី៦ ខែកញ្ញា ឆ្នាំ២០១៨ រដ្ឋសភាធ្វើការបោះឆ្នោតជ្រើសតាំងប្រធាន អនុប្រធានរដ្ឋសភា ប្រធាន អនុប្រធានគណៈកម្មការជំនាញទាំងអស់នៃរដ្ឋសភា និងផ្តល់សេចក្តីទុកចិត្ត ចំពោះរាជរដ្ឋាភិបាល៕
ចែករំលែកព័តមាននេះ