ខេត្តត្បូងឃ្មុំ ៖ នៅលើដងផ្លូវជាតិលេខ៧ ក្នុងសង្កាត់សួង ក្រុងសួង គេបានសង្កេតឃើញមានព្រះសង្ឃដល់ទៅរាប់រយអង្គដោយបាននិមន្តបិណ្ឌបាតពីកន្លែងមួយទៅកន្លែងមួយ កាត់មុខផ្ទះរបស់ប្រជា
ពលរដ្ឋ ក្មេងចាស់ប្រុសស្រី នាព្រឹកថ្ងៃទី២៧ សីហា ២០១៨ ។ ហើយក៏ជាការប្រោសព្រុំនៅតាមដងផ្លូវ
សូមឲ្យមានសុវត្ថិភាព ក្នុងការធ្វើដំណើរទៅវិញទៅមកនោះ ។
អ្នកស្រី លឹម ខិណា អាយុ៤៨ឆ្នាំ នៅភូមិជើងឡង សង្កាត់សួង ប្រាប់ថា មុននឹងព្រះសង្ឃនិមន្តបិណ្ឌ
បាតនេះ គឺបានផ្សព្វផ្សាយជាច្រើនលើកច្រើនសារ ដើម្បីឲ្យពលរដ្ឋរស់នៅក្នុងសង្កាត់សួង ក្រុងសួងបានដឹង និងឮគ្រប់ៗគ្នា ។ ជាមួយនោះរូបគាត់ និងប្តីព្រមទាំងសាច់ញាតិ បានរៀបចំនំនេក អាហារ ទឹកបរិសុទ្ធជាច្រើន ដើម្បីនឹងត្រៀមរាប់បាតនៅព្រឹកថ្ងៃទី២៧ សីហានេះ ព្រោះគាត់ពិតមានជាក្តីសប្បាយរីករាយ ហើយក៏សូមឧទ្ទិសបុណ្យកុសលនេះឲ្យបានទៅដល់ម្តាយបង្កើត និងម្តាយក្មេក ដែលបានចែកឋានទៅហើយនោះ និងសូមឲ្យបានសុខសាន្តនៅឋានបរលោក ។
អ្នកស្រី លឹម ខិណា ប្រាប់បន្តថា ព្រះសង្ឃដែលបាននិមន្តបិណ្ឌបាត កាត់តាមុខផ្ទះរបស់គាត់នេះ មាន
ចំនួនរហូតដល់ទៅ២៤០អង្គ ដោយបាននិមន្តមកពីវត្តវិហារទន្ទឹម ក្រុងសួង ដែលនេះជាលើកទី១ ហើយ
នៅក្នុងឆ្នាំ២០១៨ ។ ក្នុងនាមរូបគាត់ជាពុទ្ធសាសនិកមួយរូប សូមឲ្យពលរដ្ឋដ៏ទៃទៀតដែលមានអ្នកខ្លះប្រព្រឹត្តិនូវទង្វើរអាក្រក់ប្រាសចាកសីលធម៌មិនគប្បី មេត្តាសូមងាកមករងផ្លូវព្រះពុទ្ធ ដើម្បីសាងខ្លួនជាមនុស្សល្អក្នុងសង្គម ។ ដូនតារបស់គាត់តែងនាំគ្នាគោរពតាមឱវាទព្រះពុទ្ធ ជាច្រើនជំនាន់មកហើយលុះមកដល់ម្តាយ និងកូនព្រមទាំងកូនៗ នូវតែប្រកាន់ខ្ជាប់ខ្ជួនដដែល ដោយឥតងាករេឡើយ ។
ព្រះសោមវេទី អ៊ឹម សុភក្តិ អនុគណក្រុងសួង និងជាព្រះចៅអធិការវត្តវិហារទន្ទឹមមានថេរដីកាឲ្យដឹងថា
ព្រះសង្ឃដែលបាននិមន្តបិណ្ឌបាត នៅតាមដងផ្លូវខាងលើនេះមានចំនួន២៤០អង្គ ចេញពីវត្តរបស់ព្រះ
អង្គនៅក្នុងពេលដែលចូលព្រះវស្សា ។ ព្រោះថា កន្លងមកនេះមានពុទ្ធបរិស័ទខ្លះ មិនបានអញ្ចើញមក
វត្ត ដើម្បីធ្វើបុណ្យដោយសារ តែមានកិច្ចការរវល់នៅផ្ទះ ហេតុដូច្នេះហើយ ទើបគណៈកម្មការវត្ត
បានស្រុះស្រួលមតិគ្នា ដោយបានឲ្យព្រះសង្ឃបាននិមន្តបិណ្ឌបាត ដល់ទៅ០២លើក រួមទាំងនៅព្រឹក
ថ្ងៃទី២៧ សីហានេះ ។
ព្រះចៅអធិការវត្តវិហារទន្ទឹមមានថេរដីកាបន្តថា ការដែលព្រះសង្ឃនិមន្តទៅដល់ផ្ទះបែបនេះមានភាព
ងាយស្រួល ដើម្បីឲ្យពុទ្ធបរិស័យងាយធ្វើបុណ្យដាក់ទាន ។ មួយផ្នែកទៀតក៏ត្រូវបានព្រះសង្ឃប្រោសព្រុំនៅតាមដងផ្លូវនានា ដើម្បីឲ្យមានសេចក្តីសុខសាន្ត ក្នុងការធ្វើដំណើរទៅវិញទៅមក និងក៏សូមឲ្យពលរដ្ឋនៅក្រុងសួង និងខេត្តត្បូងឃ្មុំទាំងមូល សូមឲ្យមានសេចក្តីសុខសាន្តគ្រប់ៗគ្នាផងដែរ ៕
ចែករំលែកព័តមាននេះ