EU បន្តផ្ដល់ការអនុគ្រោះពន្ធអ្វីៗគ្រប់យ៉ាង( EBA )ដល់កម្ពុជា
- ភ្នំពេញ
រាជធានីភ្នំពេញ ៖ ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានលើកឡើងថា ពេលនេះ ការអនុគ្រោះពន្ធ « អ្វីៗទាំងអស់ លើកលែងតែអាវុធ »…
រាជធានីភ្នំពេញ ៖ ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានលើកឡើងថា ពេលនេះ ការអនុគ្រោះពន្ធ « អ្វីៗទាំងអស់ លើកលែងតែអាវុធ » ឬហៅថាEBA សម្រាប់កម្ពុជានៅតែបន្តផ្ដល់ដដែល មិនទាន់កំណត់ជាក់លាក់ណាមួយនោះទេ ។
ក្នុងសន្និសីទមួយដែលធ្វើឡើងកាលពីល្ងាចថ្ងៃទី២៣ សីហា នៅសណ្ឋាគារ ឡឺ រ៉ូយ៉ាល់ លោក George Edgar ឯកអគ្គរដ្ឋទូតសហភាពអឺរ៉ុប បានថ្លែងថា ចំពោះEBA ដែលសហភាពអឺរ៉ុបផ្ដល់ជូនកម្ពុជានៅតែបន្តផ្ដល់ជូនដដែល មិនទាន់មានវិធានការណាមួយផ្ដាច់នៅឡើយទេ ។ លោកថា ៖« EBA មានន័យថា យើងអនុគ្រោះពន្ធគយទៅប្រទេសអភិវឌ្ឍន៍តិចតួច ដោយនាំចូលទំនិញទៅកាន់បណ្ដាប្រទេសសមាជិករបស់សហគមន៍អឺរ៉ុបដោយមិនគិតពន្ធ ក្នុងគោលបំណងចង់ឲ្យប្រទេសនោះមានការអភិ វឌ្ឍន៍សេដ្ឋកិច្ចរបស់គេឲ្យមានភាពប្រសើរឡើងតាមរយៈការផលិតផលទំនិញ ដើម្បីបម្រើដល់ការនាំចេញ និងធ្វើឲ្យប្រសើរឡើងនៃជីវភាពរបស់ប្រជាពលរដ្ឋប្រទេសនោះ » ។
លោកបន្ថែមថា កន្លងមកក្រុមការងាររបស់សហភាពអឺរ៉ុប ក៏បានមកជួបផ្ទាល់ជាមួយមន្ត្រី ជាន់ខ្ពស់នៃរាជរដ្ឋាភិបាលកម្ពុជាផងដែរ ដើម្បីជជែកពីការបន្តផ្ដល់EBA ឬក៏ត្រូវមានវិធានការយ៉ាងណានោះ។ ការមកដល់របស់សមាជិកសហភាពអឺរ៉ុបកាលពីពេលកន្លងទៅនេះ ដោយសារតែមើលឃើញថា មានបញ្ហាមួយចំនួននៅកម្ពុជា ទាំងនយោបាយ និងសិទ្ធិមនុស្ស ដូចនេះហើយទើបមកមើលឲ្យច្បាស់តែម្ដង ព្រោះកម្ម វិធីEBAដែលសហគមន៍អឺរ៉ុបផ្ដល់ជូនកម្ពុជានោះ ក៏មានភ្ជាប់ជាមួយលក្ខខណ្ឌទៅតាមអនុសញ្ញាសំខាន់ៗមួយចំនួន ជុំវិញបញ្ហាសិទ្ធិមនុស្សនិងលក្ខខណ្ឌការងារដែរ ។
លោកថ្លែងថា ៖« ដំណើរការនៃការសហការផ្ទាល់រវាងគណៈកម្មការអឺរ៉ុបជាមួយប្រទេសកម្ពុជានេះ គឺនៅកំពុងបន្តទៀត ដូច្នេះខ្ញុំអត់ចង់ទាយទុកមុនថាតើដំណើរការនេះ នឹងបញ្ចប់ដោយលទ្ធផលបែបណាទេ ក៏ប៉ុន្តែខ្ញុំសូមគូសបញ្ជាក់ថា បញ្ហាសិទ្ធិមនុស្ស គឺជាបញ្ហាដែលសហភាពអឺរ៉ុបទាំងមូលគិតគូរ យកចិត្តទុកដាក់ យ៉ាងខ្លាំង » ។
បើតាមលោក សោម អូន ប្រធានសម្ព័ន្ធ សហជីពជាតិកម្ពុជា បានលើកឡើងថាលោកនៅតែរំពឹងចំពោះការបន្ដផ្ដល់ជូនកម្ពុជានៅការលើកលែងពន្ធទំនិញគ្រប់យ៉ាង លើកលែងតែអាវុធ ដើម្បីឲ្យកម្ពុជាអាចមានសមត្ថភាពក្នុងការអភិវឌ្ឍសេដ្ឋកិច្ចឲ្យកាន់តែប្រសើរឡើង និងធ្វើឲ្យកម្រិតភាពរបស់ប្រជាពលរដ្ឋកម្ពុជាកាន់តែមានជីវភាពធូរធារ ។
សូមរំលឹកថា ការនាំចេញរបស់កម្ពុជាទៅកាន់ទីផ្សារអន្តរជាតិ មួយចំណែកធំត្រូវពឹងទៅលើទីផ្សារសហភាពអឺរ៉ុប និងចំនួនតូច ត្រូវពឹងលើទីផ្សារផ្សេងៗទៀត ។ ក្នុងនោះទំនិញសំខាន់សម្រាប់ការនាំចេញទៅកាន់ទីផ្សារសហភាពអឺរ៉ុប គឺផលិតផលសម្លៀកបំពាក់ និងស្បែកជើង ហើយបើសិនជាEBAនេះ ត្រូវបានបញ្ចប់នោះ កម្ពុជានឹងត្រូវខាតបង់ទឹកប្រាក់ប្រមាណពី៦០០ទៅ៧០០លានដុល្លារអាមេរិកក្នុងមួយឆ្នាំ ។ ទន្ទឹមនឹងនេះ វាក៏អាចធ្វើឲ្យប៉ះពាល់ដល់វិស័យកាត់ដេរទាំងមូលផងដែរ។ ចំណែកអ្នកដែលត្រូវប៉ះពាល់ធំនិងដំបូងគេនោះ គឺកម្មករកម្មការិនីដែលមានចំនួនជិត១លាននាក់ កំពុងបម្រើការនៅក្នុងវិស័យកាត់ដេរ និងវាយភ័ណ្ឌនេះតែម្ដង ។
លោក ព្រាប កុល នាយកប្រតិបត្តិ អង្គការតម្លាភាពកម្ពុជា បានឲ្យដឹងថា ៖« អឺរ៉ុបគេចង់ឲ្យកម្ពុជាគោរពសិទ្ធិមនុស្សឲ្យបានច្រើន ដូចនេះកម្ពុជាគួរតែកែប្រែឥរិយាបថ និងត្រូវធ្វើតាមអឺរ៉ុប ទើបគេបន្ដផ្ដល់ EBA ដល់កម្ពុជាកាន់តែយូរអង្វែង មុនពេលយើងអាចឈរនឹងដោយខ្លួនឯង »។
យោងតាមរបាយការណ៍អគ្គនាយកដ្ឋានសេវានាំចេញ នាំចូលនៃក្រសួងពាណិជ្ជកម្ម គិតត្រឹមរយៈពេលមួយឆមាសឆ្នាំ២០១៨ ការនាំចេញពីកម្ពុជាទៅទីផ្សារអន្តរជាតិ មានចំនួនសរុបជាង៥ពាន់លានដុល្លារអាមេរិក កើនឡើងប្រមាណ៥,៧០% បើធៀបនឹងរយៈពេលដូចគ្នានឹងឆ្នាំមុន ។ ក្នុងនោះ ទំនិញនាំចេញសំខាន់របស់កម្ពុជា រួមមាន ផលិតផលវាយនភ័ណ្ឌ សម្លៀកបំពាក់ ស្បែកជើង និងទីផ្សារបញ្ជាទិញធំគឺសហរដ្ឋអាមេរិក និងសហគមន៍អឺរ៉ុប ៕
ចែករំលែកព័តមាននេះ