រាជធានីភ្នំពេញ ៖ ស្របពេលប្រជាពលរដ្ឋកម្ពុជានៅតាមបណ្ដាខេត្តនានាកំពុងទទួលរងនូវគ្រោះទឹកជំនាន់ ដែលធ្វើឲ្យខាតបង់ផលដំណាំ និងទ្រព្យសម្បត្តិជាច្រើននោះ សមាគមមីក្រូហិរញ្ញវត្ថុកម្ពុជា ( CMA ) បានចេញសេចក្តីប្រកាសមួយជូនដល់សមាជិករបស់ខ្លួន…
រាជធានីភ្នំពេញ ៖ ស្របពេលប្រជាពលរដ្ឋកម្ពុជានៅតាមបណ្ដាខេត្តនានាកំពុងទទួលរងនូវគ្រោះទឹកជំនាន់ ដែលធ្វើឲ្យខាតបង់ផលដំណាំ និងទ្រព្យសម្បត្តិជាច្រើននោះ សមាគមមីក្រូហិរញ្ញវត្ថុកម្ពុជា ( CMA ) បានចេញសេចក្តីប្រកាសមួយជូនដល់សមាជិករបស់ខ្លួន ឲ្យបង្កើនការប្រុងប្រយ័ត្នចំពោះការផ្ដល់ឥណទានទៅអតិថិជន និងសូមឲ្យមានការយោគយល់ដល់អតិថិជនក្នុងការសងត្រលប់យឺតយ៉ាវផងដែរ ។
នៅក្នុងសេចក្តីប្រកាសព័ត៌មានមួយរបស់សមាគមមីក្រូហិរញ្ញវត្ថុកម្ពុជា ( CMA ) បានឲ្យដឹងថា ក្នុងពេលដែលប្រជាពលរដ្ឋតាមបណ្ដាខេត្តមួយចំនួនក្នុងប្រទេសកម្ពុជាកំពុងទទួលរងផលប៉ះពាល់នៃគ្រោះទឹកជំនាន់ សមាគមមីក្រូហិរញ្ញវត្ថុបានអំពាវនាវឲ្យសមាជិករបស់ខ្លួនបន្តតាមដាននូវស្ថានភាពដែលប៉ះពាល់ ព្រមទាំងត្រៀមលក្ខណសម្បត្តិចូលរួមក្នុងយន្តការសមស្រប ដើម្បីសម្រាលបន្ទុកបងប្អូនប្រជាពលរដ្ឋដែលទទួលរងប៉ះពាល់ធ្ងន់ធ្ងរដោយផ្ទាល់ពីគ្រោះធម្មជាតិដល់ជីវភាព និងផលរបររបស់ពួកគាត់។
នៅក្នុងសេចក្តីប្រកាសនោះដែរ សមាគមបានស្នើឲ្យសមាជិករបស់ខ្លួន បន្តផ្ដល់ឥណទានដោយប្រុងប្រយ័ត្ន ដោយពិនិត្យលទ្ធភាពសងជាក់ស្ដែង និងផ្ដល់យន្តការដោះស្រាយទន់ភ្លន់ចំពោះអតិថិជន ដែលរងផលប៉ះពាល់ធ្ងន់ធ្ងរពីគ្រោះទឹកជំនន់ ។ ម្យ៉ាងទៀត សមាជិកសមាគមទាំងអស់ ត្រូវបន្តតាមដានស្ថានភាពជាក់ស្ដែងនិងផលប៉ះពាល់នៃគ្រោះធម្មជាតិលើអតិថិជនគ្រឹះស្ថានមីក្រូហិរញ្ញវត្ថុ ដោយផ្ដល់ការគាំទ្រចាំបាច់ស្របតាមកាលៈទេសៈជាក់ស្ដែង និងរាយការណ៍មកសមាគមមីក្រូហិរញ្ញវត្ថុកម្ពុជា ឲ្យបានទាន់ពេលវេលា ។
ជាមួយគ្នានេះដែរ ធនាគារជាតិនៃកម្ពុជា និងក្រសួងសេដ្ឋកិច្ច និងហិរញ្ញវត្ថុ ក៏បានចេញសេចក្ដីថ្លែងការណ៍រួមមួយកាលពីថ្ងៃទី២៤ សីហា កន្លងមក ដោយអំពាវនាវដល់គ្រឹះស្ថានធនាគារ និងមីក្រូហិរញ្ញវត្ថុទាំងអស់បន្ដផ្តល់ឥណទានដោយប្រុងប្រ័ត្ន និងមានយន្ដការដោះស្រាយទន់ភ្លន់ចំពោះអតិថិជនដែលរងផលប៉ះពាល់ពីគ្រោះទឹកជំនន់ជាក់ស្ដែង ដើម្បីរក្សាស្ថិរភាព និងភាពរឹងមាំរបស់វិស័យហិរញ្ញវត្ថុ ។ សេចក្ដីថ្លែងការណ៍រួម ក៏បានអំពាវនាវឲ្យបន្ដពិនិត្យនិងវាយតម្លៃលទ្ធភាពសងរបស់ប្រជាកសិករដែលបានរងផលប៉ះពាល់ពីគ្រោះទឹកជំនន់សម្រាប់ជាមូលដ្ឋានក្នុងការបន្ធូបន្ថយរយៈពេលសង បន្ថយអត្រាការប្រាក់ ឬមិនយកការប្រាក់ក្នុងរយៈពេលណាមួយ និងមិនត្រូវរឹបអូសទ្រព្យសម្បត្តិរបស់ប្រជាកសិករ ព្រមទាំងផ្ដល់ដំណោះស្រាយសមស្របផ្សេងៗ និងបន្ដតាមដានស្ថានភាព និងផលប៉ះពាល់នៃគ្រោះទឹកជំនន់លើកសិករ និងផ្ដល់ការគាំទ្រចាំបាច់ស្របតាមកាលៈទេសៈជាក់ស្ដែង ។
ក្រសួងសេដ្ឋកិច្ចនិងហិរញ្ញវត្ថុ និងធនាគារជាតិនៃកម្ពុជា សង្ឃឹមនិងជឿជាក់ថា គ្រឹះស្ថានធនាគារ និងមីក្រូហិរញ្ញវត្ថុទាំងអស់ នឹងចូលរួមសហការក្នុងការជួយសម្រាលទុក្ខលំបាក និងសម្រាលសម្ពាធហិរញ្ញវត្ថុរបស់ប្រជាកសិករដែលទទួលរងផលប៉ះពាល់ពីគ្រោះទឹកជំនន់ជាក់ ស្ដែង ។
ការចេញសេចក្ដីប្រកាសរបស់សមាគមមីក្រូហិរញ្ញវត្ថុ និងសេចក្ដីថ្លែងការណ៍រួមនេះ បានធ្វើឡើង ក្រោយប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្ត្រី បានអំពាវនាវដល់បណ្ដាធនាគារ និងមីក្រូហិរញ្ញវត្ថុឯកជនទាំងអស់ មេត្តាយោគយល់ដល់ពលរដ្ឋដែលជាប់បំណុល ដោយសូមកុំរឹបអូសទ្រព្យសម្បត្តិរបស់ពួកគាត់ និងសូមឲ្យពន្យារពេលដល់ពួកគាត់ក្នុងការសងត្រលប់ទៅវិញ ។
សម្ដេចតេជោបានប្រកាសឲ្យធនាគារជាតិនៃកម្ពុជា និងក្រសួងសេដ្ឋកិច្ច និងហិរញ្ញវត្ថុ ធ្វើការជាមួយបណ្ដាមីក្រូហិរញ្ញវត្ថុទាំងឡាយ ដើម្បីអនុគ្រោះចំពោះប្រជាពលរដ្ឋដែលជួបប្រទះនឹងគ្រោះទឹកជំនាន់ និងមានការរងគ្រោះខូតខាត ដោយបន្ធូរបន្ថយសង ឬមិនយកការប្រាក់ក្នុងរយៈពេលណាមួយ ដើម្បីកាត់បន្ថយការលំបាក ព្រោះពេលនេះ ស្រូវនិងផលដំណាំផ្សេងទៀត ដែលប្រជាពលរដ្ឋធ្វើនោះបានខូតខាតទៅហើយ ដូច្នេះលទ្ធភាពក្នុងការសងត្រលប់ទៅវិញតាមការកំណត់ គឺពិតជាមិនអាចមាននោះទេ ។
សម្ដេចថ្លែងថា ៖« ក្នុងដំណាក់កាលនេះ សូមបណ្ដាមីក្រូហិរញ្ញវត្ថុទាំងអស់យោគយល់ កុំរឹបអូសទ្រព្យសម្បត្តិពួកគាត់ តែផ្ទុយទៅវិញ សូមឲ្យមានការយោគយល់អធ្យាស្រ័យដល់ពួកគាត់ ពន្យារពេលសង ថែមទាំងមិនយកការប្រាក់ »។យោងតាមរបាយការណ៍របស់ធនាគារជាតិនៃកម្ពុជា ក្នុងឆមាសទី១ឆ្នាំនេះ កម្ចីឥណទានរបស់គ្រឹះស្ថានធនាគារ និងមីក្រូហិរញ្ញវត្ថុដែលផ្ដល់ទៅប្រជាពលរដ្ឋទូទាំងប្រទេសមានប្រមាណ ៩០,៨ទ្រីលានរៀល ឬស្មើប្រមាណ២២ពាន់លានដុល្លារអាមេរិក ។
យោងតាមការិយាល័យឥណទានកម្ពុជា ក៏បានបង្ហាញដែរថា តំបន់ទីប្រជុំជនគឺជាកន្លែងប្រមូលផ្ដុំឥណទានច្រើនជាងគេ ក្នុងនោះមានដូចជា រាជធានីភ្នំពេញ, កំពង់ចាម, កណ្ដាល, ត្បូងឃ្មុំ, សៀមរាប និងខេត្តបាត់ដំបង ជាដើម៕
ចែករំលែកព័តមាននេះ