ជប៉ុនចាប់ដៃគូជាមួយថៃ អភិវឌ្ឍន៍រូងភ្នំថាំលួង
ទីក្រុងបាកក ៖ ទីក្រុង Tamuraរបស់ប្រទេសជប៉ុន បានចូលរួមក្នុងគម្រោងរួមគ្នាមួយ ជាមួយនឹងស្រុក Pongpha របស់ខេត្តឈៀងរ៉ៃ ដើម្បីអភិវឌ្ឍន៍រូងភ្នំថាំលួង (Tham…
ទីក្រុងបាកក ៖ ទីក្រុង Tamuraរបស់ប្រទេសជប៉ុន បានចូលរួមក្នុងគម្រោងរួមគ្នាមួយ ជាមួយនឹងស្រុក Pongpha របស់ខេត្តឈៀងរ៉ៃ ដើម្បីអភិវឌ្ឍន៍រូងភ្នំថាំលួង (Tham Luang) ទីដែលក្មេងៗក្រុមកីឡាករថៃ និងគ្រូបង្វឹករបស់គេជាប់រយៈពេលជាច្រើនថ្ងៃកាលពីខែមុននោះ ឲ្យក្លាយជាកន្លែងទេសចរណ៍ថ្មីមួយដ៏ទាក់ទាញនិងមានស្តង់ដាសុវត្ថិភាពល្អប្រសើរ ។
ការចុះហត្ថលេខាលើកិច្ចសហប្រតិបត្តិការរួមគ្នានេះ បានធ្វើឡើងកាលពីថ្ងៃពុធសប្ដាហ៍មុន ។ ចំណែកព័ត៌មានលម្អិតស្តីពីការអភិវឌ្ឍគម្រោងនេះ នឹងត្រូវបានពិភាក្សាបន្ថែមទៀត ដើម្បីឲ្យស្របតាមលក្ខខណ្ឌនានា ។
លោក Jinichi Honda អភិបាលក្រុង Tamura ក្នុងខេត្ត Fukushima បាននិយាយថាទីក្រុងរបស់លោកមានរូងភ្នំល្បីពីរគឺ Abukuma និង Irimizu ។ រូងភ្នំទាំងពីរនេះ បានទាក់ទាញអ្នកទេសចរចំនួន៣សែននាក់ក្នុងមួយឆ្នាំៗ ប៉ុន្តែចំនួននេះបានធ្លាក់ចុះដល់ត្រឹម២សែននាក់ បន្ទាប់ពីព្យុះហ្វូគូស៊ីម៉ា និងគ្រោះមហន្តរាយនុយក្លេអ៊ែរក្នុងឆ្នាំ២០១១ ។
លោក Honda បាននិយាយថា ក្រុង Tamura ចង់ជួយអភិវឌ្ឍន៍វិស័យទេសចរណ៍នៅក្នុងតំបន់ Pongpha រួមទាំងរូងភ្នំដ៏ល្បីល្បាញ ដែលកីឡាបាល់ទាត់១៣នាក់ជាប់ក្នុងទីនោះរយៈពេលយ៉ាងយូរកាលពីមួយខែមុន ។ ការអភិវឌ្ឍនេះនឹងប្រើប្រាស់គំរូគ្រប់ គ្រងរូងភ្នំរបស់ជប៉ុន ។
លោកបានមានប្រសាសន៍ថា ៖« រូងភ្នំ Tham Luang មានសក្តានុពលខ្ពស់ ដែលត្រូវធ្វើជាកន្លែងទេសចរណ៍ថ្មី ប៉ុន្តែវាត្រូវការកែលម្អផ្លូវដើរ តុបតែងដោយភ្លើងបំភ្លឺ ប្រព័ន្ធរោទិ៍ សុវត្ថិភាព និងការគ្រប់គ្រងសុវត្ថិភាព »។
បន្ថែមពីលើនេះ រូងភ្នំរបស់ថៃមួយនេះ នឹងមានបំពាក់ភ្លើងសេរ៉ាម៉ិច ដើម្បីបង្កើនសោភ័ណភាព និងសុវត្ថិភាព ។ ភាគីទាំងពីរនឹងត្រូវធ្វើការជាមួយគ្នាបន្ថែមទៀត ដើម្បីឲ្យគ្រប់លក្ខខណ្ឌរបស់សហគមន៍ក្នុងតំបន់ ៕
ចែករំលែកព័តមាននេះ