រាជធានីភ្នំពេញ ៖ ដូចការគ្រោងទុកសាលាដំបូងរាជធានីភ្នំពេញនៅព្រឹកថ្ងៃទី២៧ សីហានេះបានជម្រះករណីបុគ្គលិកអង្គការការពារសិទ្ធិមនុស្សអាហុកចំនួន៤រូប និងបុគ្គលិកគណៈកម្មាធិការជាតិរៀបចំការបោះឆ្នោតម្នាក់ ដែលត្រូវបានដោះលែងឲ្យនៅក្រៅឃុំ កាលពីពេលថ្មីៗ ។
សំណុំរឿងនេះ គឺមានជនជាប់ចោទចំនួន៥រូប គឺរួមមានលោកស្រី លីម មុន្នី លោក នី សុខា លោក ណៃ វ៉ង់ដា លោក យឺ សុខសាន និងលោកនី ចរិយា (មន្ត្រីគជប) ក៏ប៉ុន្តែនៅឯសវនាការព្រឹកមិញនេះ គឺមានតែជនជាប់ចោទ៣នាក់ បានមកដល់តុលាការព្រោះ លោកស្រីលឹម មុនីនិងលោកនី សុខា អវត្តមាន ។ នៅពេលសវនាការដំណើរការមេធាវីការពារជនជាប់ចោទបានស្នើដល់អង្គសវនាការលើកពេលជម្រះដោយសារ តែមិនមានវត្តមានសាក្សី និងជនជាប់ចោទផ្សេងទៀត ។
ក្រោយដំណើរការបានប្រមាណ៣០នាទី ប្រធានក្រុមប្រឹក្សាជំនុំជម្រះបានសម្រេចប្រកាសពន្យាពេលអង្គសវនាការរហូតដល់ខែក្រោយ ។
គួររម្លឹកថា សំណុំរឿងពាក់ព័ន្ធនឹងបុគ្គលិកអាហុក៤រូប និងមន្ត្រីគជប មួយរូប គឺពួកគាត់ត្រូវបានចាប់ខ្លួន និងចោទប្រកាន់ពីបទ «សូកប៉ាន់សាក្សី និងសមគំនិតសូកប៉ាន់សាក្សី» បន្ទាប់បែកធ្លាយរឿងស្នេហារបស់អតីតមេដឹកនាំអតីតគណបក្សសង្គ្រោះជាតិ លោក កឹម សុខា និងកញ្ញាខុម ចាន់តារាទីហៅស្រីមុំ ។
ជនជាប់ចោទត្រូវបានចោទលោកស្រី លឹម មុនី លោក ណៃ វ៉ង់ដា លោក នី សុខា លោក យី សុខសាន ត្រូវបានចោទប្រកាន់បទសូកប៉ាន់សាក្សី និងលោក នី ចរិយាបទសមគំនិត កំឡុងខែមិនា និងខែមេសា ឆ្នាំ២០១៦ តាមមាត្រា៥៤៨នៃក្រមព្រហ្ម និងបានឃុំខ្លួន កាលពីថ្ងៃទី២ ខែឧសភា បន្ទាប់អង្គភាពប្រឆាំងអំពើពុករលួយចាប់ខ្លួន ៕
ចែករំលែកព័តមាននេះ