រាជធានីភ្នំពេញ ៖ សំណុំរឿងចោរប្លន់ធនាគារកាលពីសប្តាហ៍មុន រហូតមកដល់ដើមសប្តាហ៍នេះ នៅតែមិនទាន់មានជនសង្ស័យណាម្នាក់ ត្រូវបានចាប់ខ្លួននោះទេ ។ ក្រោយពីកើតមានករណីចោរប្រដាប់អាវុធខ្លីគ្រប់ដៃមួយក្រុមសង្ស័យមានគ្នាពី៥ទៅ៦នាក់ ធ្វើសកម្មភាពចូលប្លន់ប្រាក់នៅក្នុងធនាគារ អអេចប៊ី…
រាជធានីភ្នំពេញ ៖ សំណុំរឿងចោរប្លន់ធនាគារកាលពីសប្តាហ៍មុន រហូតមកដល់ដើមសប្តាហ៍នេះ នៅតែមិនទាន់មានជនសង្ស័យណាម្នាក់ ត្រូវបានចាប់ខ្លួននោះទេ ។
ក្រោយពីកើតមានករណីចោរប្រដាប់អាវុធខ្លីគ្រប់ដៃមួយក្រុមសង្ស័យមានគ្នាពី៥ទៅ៦នាក់ ធ្វើសកម្មភាពចូលប្លន់ប្រាក់នៅក្នុងធនាគារ អអេចប៊ី ឥណ្តូឆៃណា សាខាម៉ៅសេទុង អស់ប្រាក់ជាង១០ម៉ឺនដុល្លារ និងបង្កឱ្យមានការភ្ញាក់ផ្អើលយ៉ាងខ្លាំង នៅកណ្តាលរាជធានីភ្នំពេញ ហើយក្រុមចោរទាំងនោះ បានរត់គេចខ្លួនបាត់ស្រមោលអស់ទាំងកណ្តាលថ្ងៃ កាលពីថ្ងៃទី២៣ សីហា មកដល់ពេលនេះ ហាក់បីដូចជាបាត់ស្ងាត់ឈឹងគ្មានពន្លឺអ្វីបន្តិចឡើយ តែក្រុមសមត្ថកិច្ចនៅតែបន្តចុះមកត្រួតពិនិត្យ និងស្រាវជ្រាវតាមរយៈកាមេរ៉ាសុវត្ថិភាព នៅក្នុងធនាគារ និងបរិវេណជុំវិញកន្លែងកើត
ហេតុ ។
ប្រភពព័ត៌មានពីសមត្ថកិច្ចមូលដ្ឋានមួយរូបបានឱ្យដឹងថា កម្លាំងសមត្ថកិច្ចកំពុងបន្តចុះទៅធ្វើការត្រួតពិនិត្យ និងស្រាវជ្រាវតាមរយៈកាមេរ៉ាសុវត្ថិភាព ដែលបានបំពាក់នៅក្នុងធនាគារ អអេចប៊ី ឥណ្តូឆៃណា
និងតាមផ្ទះប្រជាពលរដ្ឋដែលនៅក្បែរខាង ។ សកម្មភាពនេះ គឺដើម្បីធ្វើការស្រាវជ្រាវរកស្លាកស្នាម និងអត្ត
សញ្ញាណរបស់ក្រុមចោរប្លន់ប្រដាប់អាវុធមានគ្នាប្រមាណ៥ទៅ៦នាក់ ដែលមានមធ្យោបាយធ្វើដំណើរ ម៉ូតូយ៉ាម៉ាហា EXCITER ចំនួន២ទៅ៣គ្រឿង ។
ប្រភពដដែលបន្តថា កាលពីវេលាថ្ងៃត្រង់ថ្ងៃទី២៣ ខែសីហា ចោរមួយក្រុមមានគ្នាប្រមាណ៥ទៅ៦នាក់ ជិះម៉ូតូ២ទៅ៣គ្រឿង ប្រដាប់ដោយអាវុធខ្លី៣ទៅ៤ដើម បានសម្រុកចូលទៅក្នុងអគារធនាគារ អ អេច ប៊ី ឥណ្តូឆៃណា សាខាម៉ៅសេទុង ស្របពេលមិនមានមនុស្សច្រើន ព្រោះជាម៉ោងសម្រាក បុគ្គលិកភាគច្រើនចេញទៅរកហូបបាយ ។
បើតាមបុរសចំណាស់ម្នាក់ជាសន្តិសុខនិយាយថា មានបុគ្គលិកប្រមាណ៥ទៅ៦នាក់ប៉ុណ្ណោះនៅក្នុងអគារនិងអតិថិជនម្នាក់ ។ ពេលគាត់ឃើញពួកគេពាក់មួកដើរចូលក៏ប្រាប់ឱ្យដោះមួក ស្រាប់តែពួកគេចាប់ក្រៀកគាត់ចូលទៅខាងក្នុងធនាគារ និងចូលទៅភ្ជង់ក្រុមបុគ្គលិកយកលុយដាក់ក្នុងសាក់កាដូ រួចហើយក៏ឡើងជិះម៉ូតូរត់គេចខ្លួនបាត់ស្រមោលអស់ ។
តាមរយៈសកម្មភាពដែលថតបានដោយកាមេរ៉ាសុវត្ថិភាពបង្ហាញថា ក្រុមចោរទាំងនេះសុទ្ធតែជាចោរមានជំនាញទាំងអស់ និងហាក់បីដូចជាបានរៀបចំផែនការទុកជាមុនយ៉ាងល្អិតល្អន់ជាទីបំផុត ដែលម្នាក់ៗសុទ្ធតែស្លៀកពាក់ខោអាវវែងៗ ពាក់មួកសុវត្ថិភាព ពាក់ម៉ាស់ ពាក់ស្រោមដៃ និងមានទាំងសាក់កាដូជាប់ខ្លួនគ្រប់គ្នាផងដែរ ។ ចំណែកម៉ូតូរបស់ពួកគេវិញ គឺសុទ្ធតែជាប្រភេទម៉ូតូស៊េរីទំនើបថ្មីបំផុត ម៉ាកយ៉ាម៉ាហា EXCITER ជាភេទម៉ូតូប្រណាំង មានម៉ាស៊ីនកម្លាំងខ្លាំង ប្រើអំប្រ៊ីយ៉ា មានល្បឿនលឿន និងងាយស្រួលក្នុងការជិះគេចខ្លួន ក្រោយពីធ្វើសកម្មភាពរួចផងដែរ ។
ពាក់ព័ន្ធទៅនឹងករណីចោរប្លន់ធនាគារដ៏កក្រើកនេះដែរ បង្កឱ្យមានការភ្ញាក់ផ្អើលយ៉ាងខ្លាំងដល់មហាជនទូទៅ ក៏ដូចជាកម្លាំងមានសមត្ថកិច្ចគ្រប់ស្ថាប័ន ។នេះជាលើកទីមួយហើយនៅក្នុងប្រទេសកម្ពុជា ដែលមានករណីបែបនេះកើតឡើង ហើយក៏មិនមានការបញ្ជាក់អំពីព័ត៌មានណាមួយច្បាស់លាស់អំពីសំណាក់កម្លាំងមានសម្ថកិច្ច ក៏ដូចខាងធនាគារដែរ ដោយជំហានដំបូងពួកគាត់ខ្លះអះអាងថា ក្រុមចោរមានគ្នាចំនួន៣ទៅ៤នាក់ និងខ្លះទៀតថាមានគ្នាពី៤ទៅ៥នាក់ និងមួយចំនួនទៀតថា មានគ្នាពី៥ទៅ៦នាក់ ។
ចំណែកឯទឹកប្រាក់ដែលបាត់បង់ក៏មិនដឹងពីចំនួនប៉ុន្មានច្បាស់លាស់ដែរ ដោយគ្រាន់តែប្រាប់ថា មានជាង១០ម៉ឺនដុល្លារប៉ុណ្ណោះ ។ ឯមធ្យោបាយធ្វើដំណើរវិញ សមត្ថកិច្ចខ្លះអះអាងថា មានម៉ូតូចំនួន២គ្រឿង និងខ្លះទៀតថា៣គ្រឿង តែទោះបីជាយ៉ាងណាកម្លាំងមានសម្ថកិច្ចយ៉ាងច្រើនកំពុងដុតដៃដុតជើងក្នុងការស្រាវជ្រាវ ចំណែកឯធនាគារខាងលើក៏បានបិទទ្វារជាបណ្តោះអាសន្នផងដែរ ៕
ចែករំលែកព័តមាននេះ