ខេត្តព្រៃវែង ៖ ព្រឹកថ្ងៃទី២៨ មេសា ២០១៣ ការិយាល័យផលិតកម្ម និងបសុព្យាបាលខេត្ត ដឹកនាំដោយលោកចិន វិសាល អនុប្រធានការិយាល័យផលិតកម្ម និងបសុព្យាបាលខេត្ត រួមសហការជាមួយមន្ត្រីជំនាញពេទ្យសត្វ ប្រចាំការតាមបណ្តាភូមិ-ឃុំ ក្នុងស្រុកព្រះស្តេចជាច្រើនរូបទៀតបានចូលរួមធ្វើកម្មវិធីចាក់វ៉ាក់សាំងសាទឹក សត្វគោ ក្របីជូនប្រជាពលរដ្ឋ ដែលស្ថិតនៅក្នុងឃុំរំចេក ស្រុកព្រះស្តេច ។
លោកចិន វិសាល អនុប្រធានការិយាល័យផលិតកម្ម និងបសុព្យាបាលខេត្ត បានប្រាប់អ្នកយកព័ត៌មានកោះសន្តិភាពថា ដោយមានការណែ នាំពីក្រសួង មន្ទីរ កសិកម្មខេត្ត និងដោយយោងលើស្ថានភាពជំងឺសត្វនាដើមឆ្នាំ២០១៣នេះ មានសភាពមិនល្អ និងដើម្បីជួយរំលែកទុក្ខលំបាករបស់បងប្អូនប្រជាកសិករ លោកបានដឹកនាំមន្ត្រីជំនាញពេទ្យសត្វជាច្រើនរូបចូលរួមជួយចាក់វ៉ាក់សាំង ការពារជំងឺផ្សេងៗដោយឥតគិតថ្លៃដូចជាជំងឺសាទឹក ជំងឺអុតក្តាមជាដើម ។
ការចាក់វ៉ាក់សាំងនេះ ដើម្បីការពារកុំឱ្យកើតមាន ឬឆ្លងជំងឺផ្សេងៗដល់សត្វគោ ក្របី ប្រជាពលរដ្ឋ ហើយធ្វើក្នុងគោលបំណងធ្វើឱ្យសត្វមានសុខភាពល្អ គេចផុតពីជំងឺឆ្លងផ្សេងៗ ពិសេសជំងឺសាទឹកដោយយើងចាក់ការពារជាមុន ប្រសើរជាងព្យាបាល បើទុកឱ្យសត្វគោ ក្របី វាឈឺហើយ ៕
ចែករំលែកព័តមាននេះ