ខេត្តបន្ទាយមានជ័យ ៖ បុរសវ័យចំណាស់ម្នាក់បានដើរបាត់ពីផ្ទះមួយយប់ដោយសាច់ញាតិរកមិនឃើញ លុះព្រឹកឡើងទើបប្រទះឃើញសពដេកស្លាប់នៅឯវាលក្នុងទឹកតាមផ្លូវគោយន្ត និងផ្លូវរទេះចម្ងាយ៧០ម៉ែត្រខាងលិចភូមិខ្ញែ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ កាលពីវេលាម៉ោង៦ព្រឹកថ្ងៃទី២៦ សីហា ឆ្នាំ២០១៨ ។
លោកវរសេនីយ៍ឯកមាស ប្ញទ្ធី អធិការនគរបាលស្រុកព្រះនេត្រព្រះបានឲ្យដឹងថា ជនរងគ្រោះដែលស្លាប់ឈ្មោះសុខ ភាត់ ភេទប្រុស អាយុ៥៤ឆ្នាំ ជាសោធននិវត្តន៍ (នៅស្រុកក្រឡាញ់ ខេត្តសៀមរាប) គ្មានប្រពន្ធកូន មករស់នៅជាមួយប្អូនស្រីបង្កើតឈ្មោះផល ប៉ុល អាយុ៤៨ឆ្នាំ នៅភូមិខ្ញែរ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ ជាច្រើនឆ្នាំមកហើយ។
ប្រភពព័ត៌មានបានឱ្យដឹងថា នៅវេលាម៉ោង៩យប់ថ្ងៃទី២៥ ខែសីហា ឆ្នាំ២០១៨ ជនរងគ្រោះបានដើរបាត់ចេញពីរផ្ទះមិនដឹងទៅទីណាទេ ពេលនោះប្អូនស្រីបង្កើតឈ្មោះ ប៉ុល ផល បានដើររកដែរ តែរកមិនឃើញ ដោយយប់ជ្រៅពេកក៏ឈប់រកត្រឡប់មកសម្រាកវិញ។ លុះដល់វេលាម៉ោង៦ព្រឹកថ្ងៃទី២៦ សីហា ២០១៨ ឈ្មោះ ហឺន បោប ភេទប្រុស អាយុ៥៨ឆ្នាំ ជាប្អូនថ្លៃរបស់ជនរងគ្រោះ និងត្រូវជាប្ដីរបស់ស្ត្រីឈ្មោះផល
ប៉ុល បានចេញដើររកបន្តទៀតតាមកន្លែងដែលជនរងគ្រោះធ្លាប់ទៅក៏ប្រទះឃើញសពជនរងគ្រោះដេកស្លាប់នៅវាលស្រែខាងលិចភូមិខ្ញែរចំងាយប្រហែល៧០០ម៉ែត្រ ក្នុងទឹកតាមផ្លូវគោយន្តនិងផ្លូវរទេះទឹកមានជំរៅ៥០សង្ទីម៉ែត្រ។
លោកអធិការបានបញ្ជាក់ថា បើតាមការបញ្ជាក់ពីក្រុមគ្រួសារបានឱ្យដឹងថា ជនរងគ្រោះមានជំងឺសរសៃប្រសាទរយៈពេលប្រហែល១០ឆ្នាំមកហើយ និងតែងតែដើរពាសវាលពាសកាលដាច់បាយដាច់ទឹក ពេលបាត់ម្ដងៗប្អូនស្រីតែងតែដើររកឃើញនាំយកមកផ្ទះវិញជារៀងរាល់លើក។
តាមការសន្និដ្ឋានរបស់ក្រុមគណៈកម្មការក្រោយពីបានធ្វើការពិនិត្យលើខ្លួនប្រាណសព ពុំឃើញមានស្លាក
ស្នាមអ្វីគួរអោយកត់សំគាល់នោះទេ ដូច្នេះការស្លាប់របស់ជនរងគ្រោះគឺដោយសារខ្យល់គរបណ្តាលឱ្យដួលទៅក្នុងទឹកហើយឈ្លក់ទឹកស្លាប់ដោយខ្លួនឯង មិនជាប់ពាក់ព័ន្ធនឹងអំពើឃាតកម្មអ្វីនោះទេ ។ ក្រោយការពិនិត្យ សពត្រូវបានប្រគល់ជូនក្រុមគ្រួសារដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ