រាជធានីភ្នំពេញ ៖ យុវជនជាជនសង្ស័យចំនួន២នាក់ ក្នុងចំណោមបក្ខពួក៤នាក់ ត្រូវបានកម្លាំង មានសមត្ថកិច្ចចាប់ឃាត់ខ្លួនក្រោយពីពួកគេជិះម៉ូតូចំនួន២គ្រឿង នាំគ្នាធ្វើសកម្មភាពឆក់ទូរស័ព្ទដៃម៉ាក Huawei មួយគ្រឿង ពីបុរសម្នាក់ដែលដាក់ក្នុងហោប៉ៅអាវបានសម្រេច។ ហើយនាំគ្នាជិះម៉ូតូរត់ទៅបុក ជាមួយនឹងម៉ូតូរ៉ឺម៉កកង់បីមួយគ្រឿងដួល ហើយបក្ខពួករបស់គេចំនួន២នាក់ទៀត ដែលជិះម៉ូតូបិទគូទ បានជិះរត់គេចខ្លួនបាត់ស្រមោលនោះ។
ករណីនេះដែរបានកើតឡើងកាលពីវេលាម៉ោង៤ និង២៥នាទី ល្ងាច ថ្ងៃទី២៦ ខែសីហា ឆ្នាំ២០១៨ នៅខាងមុខមន្ទីរពេទ្យកាល់ម៉ែត្រ ផ្លូវព្រះមុនីវង្ស ក្នុងសង្កាត់ស្រះចក ខណ្ឌដូនពេញ។ តាមប្រភពពីនគរបាលបានប្រាប់ឱ្យដឹងថា យុវជនជាជនសង្ស័យទាំង២នាក់ ដែលបានឃាត់ខ្លួនមានទី១-ឈ្មោះ សោភ័ណ្ឌ សីហា អាយុ១៧ឆ្នាំ មានមុខរបរមិនពិតប្រាកដ ស្នាក់នៅផ្ទះជួល ផ្លូវលេខ៧០ ក្នុងសង្កាត់ស្រះចក ខណ្ឌដូនពេញ និងទី២-ឈ្មោះ អ៊ី ប៊ុនថេង អាយុ ១៩ឆ្នាំ មុខរបរមិនពិតប្រាកដ ស្នាក់នៅផ្ទះជួលផ្លូវលំ ក្នុងសង្កាត់ទួលសង្កែ ខណ្ឌឫស្សីកែវ។
មុនពេលកើតហេតុបុរសជាជនរងគ្រោះបានជិះម៉ូតូមួយគ្រឿងតាមបណ្តោយផ្លូវព្រះមុនីវង្ស ក្នុងទិសដៅពីជើងទៅត្បូង ដោយទុកទូរស័ព្ទម៉ាក Huawei មួយគ្រឿង នៅក្នុងហោប៉ៅអាវខាងមុខ។ តាមប្រភពដដែលបានប្រាប់បន្តទៀតថា លុះមកដល់ចំណុចកើតហេតុខាងលើ ក៏ស្រាប់លេចមុខក្រុម ជនសង្ស័យចំនួន៤នាក់ជិះម៉ូតូចំនួន២គ្រឿង ជិះម៉ូតូមកអែប ហើយធ្វើសកម្មភាពឆក់យកទូរសព្ទដៃម៉ាក Huawei មួយគ្រឿពីក្នុងហោប៉ៅរបស់បុរសរងគ្រោះបានហើយក៏ព្យាយាមនាំគ្នាជិះរត់គេចខ្លួនតែម្តង។
ភ្លាមនោះបុរសជាជនរងគ្រោះក៏បានជិះម៉ូតូដេញតាមពួកគេដោយស្រែកថា <<ចោរៗ>> ឡើងរហូតទៅដល់ម្តុំខាងលិចវត្តភ្នំ ក្រុមជនសង្ស័យទាំង២នាក់ខាងលើ ដែលជិះម៉ូតូម៉ាកហុងដា C125 ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ ភ្នំពេញ ១HD-១៥១៩ មួយគ្រឿងទៅបុកនឹងម៉ូតូរ៉ឺម៉កង់បី មួយគ្រឿងដួល។ ស្របពេលនោះ កម្លាំងល្បាតមូលដ្ឋានក៏ជួយចាប់បានតែម្តង ចំណែកបក្ខពួករបស់ ពួកគេចំនួន២នាក់ទៀត ដែលជិះម៉ូតូបិទគូទនោះ បានរត់គេចខ្លួនបាត់ស្រមោលអស់។
ក្រោយពេលកើតហេតុ ទូរស័ព្ទដៃម៉ាក Huawei មួយគ្រឿងនោះត្រូវបានកម្លាំងនគរបាលប៉ុស្តិ៍ ស្រះចកធ្វើការប្រគល់ទៅឲ្យបុរសជនរងគ្រោះជាម្ចាស់វិញ។ ចំណែកឯក្រុមជនសង្ស័យទាំង ២នាក់ ត្រូវបានសមត្ថកិច្ចធ្វើការសាកសួរ និងកំណត់ហេតុ ដើម្បីបញ្ជួនទៅកាន់អធិការដ្ឋានខណ្ឌដូនពេញ ចាត់ការទៅតាមផ្ឡូវច្បាប់ជាបន្តទៀត៕
ចែករំលែកព័តមាននេះ