ខេត្តប៉ៃលិន ៖ បន្ទាប់ពីសារព័ត៌មានបានចុះផ្សាយថា បន្ទាយយោធាមួយកន្លែងកំពុងក្លាយទៅជាកំផែងការពារយ៉ាងរឹងមាំដល់ពួកអ្នកលេងល្បែងស៊ីសង ដោយបង្កើតសង្វៀនបញ្ជល់មាន់ ហើយដំណើរការយ៉ាងរលូនជិតមួយឆ្នាំទៅហើយនេះ ។ រហូតមកដល់ព្រឹកថ្ងៃទី២៥ ខែសីហា ឆ្នាំ២០១៨…
ខេត្តប៉ៃលិន ៖ បន្ទាប់ពីសារព័ត៌មានបានចុះផ្សាយថា បន្ទាយយោធាមួយកន្លែងកំពុងក្លាយទៅជាកំផែងការពារយ៉ាងរឹងមាំដល់ពួកអ្នកលេងល្បែងស៊ីសង ដោយបង្កើតសង្វៀនបញ្ជល់មាន់ ហើយដំណើរការយ៉ាងរលូនជិតមួយឆ្នាំទៅហើយនេះ ។ រហូតមកដល់ព្រឹកថ្ងៃទី២៥ ខែសីហា ឆ្នាំ២០១៨ ជួបជាមួយមន្ត្រីយោធាវរ:សេនាតូចលេខ៥៣៤ ដែលកំពុងស្នាក់នៅក្នុងបន្ទាយបានទទួលស្គាល់ថា ពួកគេបើកកន្លែងបញ្ជល់មាន់មែន តែលេងតិចតួចប៉ុណ្ណោះ បើសិនជាប៉ះពាល់ដល់សណ្តាប់ធ្នាប់សន្តិសុខសង្គមនឹងបញ្ឈប់ភ្លាមៗ។
សូមបញ្ជាក់ថា សង្វៀនបញ្ជល់មាន់ធំមួយកន្លែង ស្ថិតនៅក្នុងបន្ទាយយោធាក្នុងវរ:សេនាតូចលេខ៥៣៤ ក្នុងភូមិអូរកន្ធៀងវ៉ា ឃុំស្ទឹងត្រង់ ស្រុកសាលាក្រៅ បានជ្រកនៅក្នុងកំផែងបន្ទាយយោធាដ៏រឹងមាំ ដោយបើកដំណើរការជិត១ឆ្នាំមកហើយ។ ក្នុងមួយសប្ដាហ៍គេបើកទទួលអ្នកលេងចំនួន២ថ្ងៃ គឺនៅថ្ងៃពុធ និងថ្ងៃសៅរ៍ ។ អ្នកដែលញៀននឹងល្បែងបញ្ជល់មាន់នេះ មានរាប់រយនាក់ គ្រប់សមាសភាព ខណ:ពេលដល់ថ្ងៃណាត់ផ្គូរផ្គងមាន់ម្ដងៗ គឺនាំគ្នាបើករថយន្តមកពីតាមបណ្ដាស្រុកនានាទូទាំងខេត្ត និងមកពីខេត្តបាត់ដំបងក៏មានដែរ… ល្បីល្បាញណាស់។
ប្រភពព័ត៌មានបានឱ្យដឹងថា ប្រហែលជាទីតាំងសង្វៀនបញ្ជល់មាន់នេះ មានសុវត្ថិភាពល្អ មានភាពកក់ក្ដៅក្នុងការភ្នាល់ល្បែងស៊ីសងហើយ ព្រោះទីតាំងនេះហ៊ុំព័ទ្ធដោយកំផែងយោធាយ៉ាងរឹងមាំ ដែលសមត្ថកិច្ចជាច្រើនមិនអាចទៅរំខានក្នុងការលេងល្បែងមួយនេះ ។
ពាក់ព័ន្ធនឹងបញ្ហានេះ លោក សេង ស៊ីល ជានាយសេនាធិការនៃបន្ទាយយោធាវរ:សេនាតូចលេ៥៣៤ បានឱ្យដឹងថា ពិតជាមានការបើកលេងល្បែងបញ្ជល់មាន់នៅក្នុងបន្ទាយរបស់ខ្លួនមែន តែលេងតិចតួចប៉ុណ្ណោះ មិនធំដុំដូចជាការចុះផ្សាយនោះទេ ។ លោកបន្តទៀតថា ការលេងល្បែងនេះ គឺភាគច្រើនជាកូនទាហាននៅក្នុងបន្ទាយគេនាំគ្នាវ៉ាងមាន់លេងប៉ុណ្ណោះ មិនបានដាក់លុយកាក់អ្វីច្រើន ដូចការចោទប្រកាន់នោះទេ ហើយខាងលោកនឹងឱ្យបិទបញ្ឈប់លេងល្បែងមួយនេះ ប្រសិនបើប៉ះពាល់ធ្ងន់ធ្ងរ ។
ចែករំលែកព័តមាននេះ