ពុទ្ធោ! ឆេះសណ្ឋាគារមួយយ៉ាងរន្ធត់... ស្លាប់១៨នាក់

ពុទ្ធោ! ឆេះសណ្ឋាគារមួយយ៉ាងរន្ធត់… ស្លាប់១៨នាក់

ថ្ងៃទី ២៦ ខែ សីហា ឆ្នាំ ២០១៨

ម៉ោង ១៦:៣២

ប្រទេសចិន ៖ កាលពីព្រឹកថ្ងៃទី២៥ សីហា សណ្ឋាគារមួយនាភាគឦសានចិន ត្រូវភ្លើងឆាបឆេះ បណ្ដាលឲ្យមនុស្ស១៨នាក់ស្លាប់ ហើយ១៩នាក់ទៀតរងរបួស។

អគ្គិភ័យនេះកើតមាននាវេលាម៉ោង៤និង៣៦នាទីទៀបភ្លឺម៉ោងក្នុងស្រុក ក្នុងអគារសណ្ឋាគារមួយនៃទីក្រុងហាប៊ីន ទីប្រជុំជននៃខេត្តហៃឡុង យ៉ាងភាគឦសានចិន។

បើតាមទីភ្នាក់ងារព័ត៌មានចិនស៊ីនហួ បានរាយការណ៍ថា មនុស្ស១៨នាក់ស្លាប់ ហើយ១៩នាក់រងរបួសបញ្ជូនទៅមន្ទីរពេទ្យ។ ចំណែកទូរទស្សន៍ចិន CCTV បង្ហាញរូបភាពសណ្ឋាគាររងការបំផ្លាញ ជាមួយគ្រឹះដែកខូចខាត និងភ្លើងឆេះរោល ពិដានបាក់ ជញ្ជាំងរោលខ្មៅ រួចកញ្ចក់បែកធ្លាក់។ បណ្ដាអ្នករបួសគឺដោយសារពុលផ្សែង ឬរលាក។ រីឯការស៊ើបអង្កេតកំពុងធ្វើដើម្បីកំណត់ពីប្រភពនៃភ្លើង។

គួររំលឹកថា អគ្គិភ័យតែងកើតមានញឹកញាប់នៅចិន។ មនុស្ស១៨នាក់ស្លាប់ និង៥នាក់ទៀតរងរបួស កាលពីខែមេសា ឆ្នាំ២០១៨ ដោយសារភ្លើងឆាបឆេះហាងខារ៉ាអូខេមួយនាភាគខាងត្បូងចិន។ រួចកាលពីខែវិច្ឆិកា ឆ្នាំ២០១៧ ក៏មានអគ្គិភ័យមួយសម្លាប់មនុស្ស១៩នាក់ ហើយ៨នាក់រងរបួសក្នុងផ្ទះ សម្រាប់មនុស្សចាស់មួយ នាភាគខាងត្បូងក្រុងប៉េកាំង។ ចំណែកនាខែឧសភា ឆ្នាំ២០១៥វិញ ក៏មានមនុស្ស៣៨នាក់ស្លាប់ដោយសារភ្លើងឆាបឆេះផ្ទះសម្រាប់មនុស្សចាស់មួយនៅទីក្រុងពីញឌីញសាន ខេត្តហ៊ឺណាន់ភាគកណ្ដាលប្រទេស៕