រាជធានីភ្នំពេញ ៖ ហាងផឹកស៊ី KTV យីហោ «រិទ្ធីសប្បាយសប្បាយ» ត្រូវបានគណៈបញ្ជាការឯកភាពខណ្ឌពោធិ៍សែនជ័យចុះបិទផ្អាកអាជីវកម្មជាបណ្តោះអាសន្ន បន្ទាប់ពីមានបណ្ដឹងប្រជាពលរដ្ឋថា រំខានការដេកពួនរបស់ពួកគាត់ រាល់យប់ជារៀងរាល់ថ្ងៃ…
រាជធានីភ្នំពេញ ៖ ហាងផឹកស៊ី KTV យីហោ «រិទ្ធីសប្បាយសប្បាយ» ត្រូវបានគណៈបញ្ជាការឯកភាពខណ្ឌពោធិ៍សែនជ័យចុះបិទផ្អាកអាជីវកម្មជាបណ្តោះអាសន្ន បន្ទាប់ពីមានបណ្ដឹងប្រជាពលរដ្ឋថា រំខានការដេកពួនរបស់ពួកគាត់ រាល់យប់ជារៀងរាល់ថ្ងៃ ។ ហាងខារ៉ាអូខេ «KTV រិទ្ធីសប្បាយសប្បាយ»ខាងលើនោះ មានទីតាំងស្ថិតនៅតាមផ្លូវជាតិលេខ៣ កែងផ្លូវចូល ភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
ដែលត្រូវបានកម្លាំងសមត្ថកិច្ចខាងលើចុះបិទផ្អាកអាជីវកម្ម កាលពីវេលាម៉ោងម៉ោង១១ព្រឹកថ្ងៃទី២៦ ខែសីហា ឆ្នាំ២០១៨ ។
តាមប្រភពព័ត៌មានបានឲ្យដឹងថា ហាងផឹកស៊ីខារ៉ាអូខេខាងលើនេះ បានបង្កឲ្យមានសម្លេងលាន់ឮខ្លាំងៗរំខានការរស់នៅដេកពួនដល់អ្នកជិតខាងជារៀងរាល់យប់ ហើយត្រូវបានប្រជាពលរដ្ឋប្ដឹងសុំឲ្យជួយអន្តរាគមន៍បន្ទាន់ ។ បន្ទាប់មកទើបកម្លាំងគណៈបញ្ជាការឯកភាពខណ្ឌពោធិ៍សែនជ័យ សម្រេចចុះបិទផ្អាកអាជីវកម្មជាបណ្តោះអាសន្នសិន ។ ដោយបានដកហូត ឧបករណ៍បំពងសម្លេងគ្រឿងអេឡិចត្រូនិច ដែលជាសម្ភារខារ៉ាអូខេមួយចំនួន យកទៅរក្សាទុកផងដែរ ។
ប្រភពដដែលបានបន្តទៀតថា កន្លងមកអាជ្ញាធរខណ្ឌពោធិ៍សែនជ័យបានប្រមូលក្រុមអ្នកបើករកស៊ីបើកហាងផឹកស៊ីខារ៉ាអូខេបៀរហ្គាឌិន ក្លឹបឌីស្កូ ម៉ាស្សាកោសជប់ជាដើម ទៅចូលរួមប្រជុំណែនាំពីរបៀបរបបផ្សេងៗពាក់ព័ន្ធទៅនឹងវិន័យសណ្ដាប់ធ្នាប់ផ្សេងៗរាប់ទាំងការរំខានអ្នកជិតខាង ការដេញចាប់ម៉ូយបែបអនាធិបតេយ្យទៀតផង ។
ប៉ុន្តែក្រោយការប្រជុំរួចមកមានម្ចាស់ហាងខ្លះគោរព និងខ្លះទៀតល្មើសដែលត្រូវបានអាជ្ញាធរបិទអាជីវកម្មជាបន្តបន្ទាប់រួចមកហើយ ដោយឡែកហាង KTV មួយនេះបានរំខានអ្នកដ៏ទៃរាល់ថ្ងៃ ទើបត្រូវបានអាជ្ញាធរចុះបិទតែម្ដង ៕
ចែករំលែកព័តមាននេះ