ជារឿងនឹកស្មានមិនដល់សោះតែម្តង ដែលលោកខាន់ ជេមស៍ តារាចម្រៀងលំដាប់ជួរមុខនៅផលិតកម្មសាន់ដេរ គ្រាន់តែមានឱកាសហោះដល់ដែនដីអាមេរិកភ្លាមមានការពេញចិត្តជាពន់ពេកជាមួយអ្នកអាណិកជនខ្មែរនៅទីនោះ។ លើសពីនេះទៅទៀតគ្រាន់តែឡើងសម្តែងបានប៉ុន្មានលើកអ្នកទិញសំបុត្រចូលទស្សនាពេញៗសាលសម្តែង ខ្លះសុំថតរូបជាមួយលោកជេមន៍ផងដែរ។
គេពិតជាមិនទាន់ភ្លេចឡើយនៅបទចម្រៀងល្បីៗរបស់លោកកាលនៅផលិតកម្ម Rock ដូចជាបទ «របាំចងស្នេហ៍» បទ «បុប្ផាក្រពុំ» និងបទ «ស្នេហ៍អូនជានិច្ច» ដែលរុញច្រានវិថីសិល្បៈចម្រៀងរបស់លោកបានហក់ឡើងរហូតក្លាយជាតារាចម្រៀងមួយដួងពេញនិយមចាប់ពេលនោះមក។ ម្ល៉ោះហើយក្រោយឆ្លងទៅដល់អាមេរិកជាលើកទី២ លោកនៅតែត្រូវបានបងប្អូននៅទីនោះសំណូមពរច្រៀងរាំកំដរអារម្មណ៍នូវបទទាំងនោះមិនដែលខកខាន។
ម្ចាស់បទ «សម្រែកបេះដូង» ដែលល្បីមុនគេលោកជេមស៍ធ្លាប់បានទៅអាមេរិកម្តងរួចហើយកាលពីឆ្នាំ២០១១ ដោយសំឡេងគាំទ្ររបស់លើកទី១ លាន់ឭមិនធម្មតា។ លុះដំណើរលើកទី២ ទៅដល់ភ្លាមប្រជាប្រិយភាពរបស់លោកនៅតែឈរត្រដែតអត់បាត់ទៅណាធ្វើឱ្យលោកជេមស៍ផ្ទាល់ពិតជាមានមោទនភាពខ្លាំង ដោយសារតែការឱ្យតម្លៃលោកស្របពេលនៅឆ្ងាយពីមាតុភូមិបែបនេះ។
លោក ខាន់ ជេមស៍ នឹងត្រូវច្រៀងចំនួន១៥លើកទៀត ពោលគឺនឹងត្រូវច្រៀងស្ទើរគ្រប់រដ្ឋទាំងអស់ ក្នុងសហរដ្ឋអាមេរិកក្នុងរយៈពេល២ខែនេះ ។ កម្មវិធីធំ ដែលលោកនឹងត្រូវច្រៀង គឺនៅថ្ងៃបុណ្យភ្ជុំធំ នៅវត្ត «ខន្តីរាម» នៃរដ្ឋ ហ្វរីដា ហើយក្រោយបញ្ចប់ការច្រៀងរួចលោកនឹងត្រឡប់មកស្រុកខ្មែរវិញនៅថ្ងៃទី០៥ ខែ វិច្ឆិកា ឆ្នាំ ២០១៨នេះ ។
លោកខាន់ ជេមស៍ ក្រៅពីច្រៀងតាមកញ្ចក់ទូរទស្សន៍ ក៏លោកបានចំណាយពេលវេលាច្រៀងដោយមិនគិតប្រាក់កម្រៃតាមកម្មវិធីមនុស្សធម៌មួយចំនួន តាមសាកលវិទ្យាល័យ ឬតាមតន្ត្រីធំៗរបស់ទូរទស្សន៍។ ទាំងអស់នេះជាការចូលរួមមួយល្អសម្រាប់អ្នកសិល្បៈល្បីឈ្មោះក្នុងកិច្ចការសង្គម។
ចែករំលែកព័តមាននេះ