ខេត្តកំពង់ស្ពឺ ៖ បុរស០២នាក់ម្នាក់ស្លាប់ និងម្នាក់ទៀតរងរបួសធ្ងន់ បន្ទាប់ពីជនរងគ្រោះលើករន្ទាផ្សារដែកចៃដន្យដាក់ចំពីលើព្រីភ្លើង ទើបបណ្តាលឲ្យជួបហេតុការណ៍អាក្រក់បែបនេះ ។
ក្រោយកើតហេតុសមត្ថកិច្ចបានចុះធ្វើការត្រួតពិនិត្យ និងបំពេញឯកសារ ហើយប្រគល់សពឲ្យសាច់ញាតិរៀបចំធ្វើបុណ្យតាមប្រពៃណី ។
ករណីខ្សែភ្លើងឆក់ស្លាប់នេះកើតឡើង កាលពីវេលាម៉ោង៩និង៣៥នាទីព្រឹកថ្ងៃទី២៦ ខែសីហា ឆ្នាំ២០១៨ នៅចំណុចភូមិត្រពាំងជំរៅ ឃុំទួលអំពិល ស្រុកបសេដ្ឋ ខេត្តកំពង់ស្ពឺ ។
នគរបាលស្រុកបសេដ្ឋបានឲ្យដឹងថា ជនរងគ្រោះទាំង០២មានឈ្មោះ អ៊ូ សិត ភេទប្រុស អាយុ២៤ឆ្នាំ ស្រុកកំណើតភូមិកញ្ច្រប់ ឃុំព្រះនិពាន្ធ ស្រុកគងពិសី ខេត្តកំពង់ស្ពឺ ។ បច្ចុប្បន្ននៅភូមិ ត្រពាំងជំរៅ ឃុំទួលអំពិល ស្រុកបសេដ្ឋ ខេត្តកំពង់ស្ពឺ (ស្លាប់នៅនឹងកន្លែងកើតហេតុ) ។ ២- ឈ្មោះ វ៉ន លីម ភេទប្រុស អាយុ៣៧ឆ្នាំ ស្រុកកំណើត នៅភូមិត្នោត១ ឃុំត្នោត ស្រុកស្រីសន្ធរ ខេត្តកំពង់ចាម ។ បច្ចុប្បន្នរស់នៅភូមិត្រពាំងជំរៅ ឃុំទួលអំពិល ស្រុកបសេដ្ឋ ខេត្តកំពង់ស្ពឺ (រងរបួសធ្ងន់ បញ្ជូនទៅមន្ទីពេទ្យ) ។
ប្រភពបន្តថា មូលហេតុដែលបណ្តាលឲ្យជនរងគ្រោះជួបហេតុការអាក្រក់នេះ គឺអ្នកទាំង០២ត្រូវបានគេជួលមកផ្សារដែកដំបូលផ្ទះនៅចំណុចខាងលើ លុះពេលផ្សារអ្នកទាំងពីរខាងលើក៏បានលើកជើងបន្ទារដែក ដាក់បម្រុងឡើងផ្សារកន្លែងផ្សេងទៀត តែជាអកុសលក៏ដាក់ចំលើព្រីភ្លើង (បែក) បណ្តាលឲ្យឆ្លងចរន្តឆក់ភ្លាមៗទាំងពីរនាក់តែម្តង ។
ក្រោយកើតហេតុអ្នកជិតខាងបាននាំគ្នាជួយលើកយកជនរងគ្រោះម្នាក់ទៅកប់ក្នុងដីខ្សាច់ដើម្បីសង្គ្រោះដែរ តែនៅមិនអាចជួយបាន ដោយឡែកម្នាក់ទៀតត្រូវបញ្ជូនទៅសង្គ្រោះនៅមន្ទីរពេទ្យបង្អែកស្រុក ។បន្ទាប់ពីកើតហេតុសមត្ថកិច្ចបានចុះធ្វើកំណត់ហេតុ និងបានប្រគល់សពឲ្យក្រុមគ្រួសារទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ