ខេត្តសៀមរាប ៖ កម្លាំងការិយាល័យនគរបាលប្រឆាំងគ្រឿងញៀននៃស្នងការនគរបាលខេត្ត បានចុះបង្ក្រាបពីបទរក្សាទុកនិងជួញដូរដោយខុសច្បាប់នូវសារធាតុញៀនក្នុងលំនៅដ្ឋានមួយ រហូតឈានដល់ការឃាត់ខ្លួនបានជនសង្ស័យចំនួន៣នាក់ ដើម្បីយកមកសួរនាំនៅការិយាល័យជំនាញ និងរៀបចំកសាងសំណុំរឿងបញ្ជូនបន្តទៅតុលាការខេត្តចាត់ការទៅតាមនិតិវិធីច្បាប់។ ហេតុការណ៍ឃាត់ខ្លួនជនសង្ស័យជួញដូរគ្រឿងញៀននេះបានធ្វើឡើងកាលពីវេលាម៉ោង៨ថ្ងៃទី២៥ ខែសីហា ឆ្នាំ ២០១៨ ស្ថិតនៅភូមិក្រួស សង្កាត់ស្វាយដង្គំ ក្រុងសៀមរាប ខេត្តសៀមរាប។
តាមប្រភពពីមន្ត្រីនគរបាលគ្រឿងញៀនខេត្តបានឱ្យដឹងថា ជនសង្ស័យដែលត្រូវសមត្ថកិច្ចឃាត់ខ្លួនបានចំនួន៣នាក់រួមមាន ១-ឈ្មោះ ឆាត់ វណ្ណារ៉ា ភេទប្រុស អាយុ៣៣ឆ្នាំ មុខរបរមិនពិតប្រាកដ ទីលំនៅភូមិក្រួស សង្កាត់ស្វាយដង្គំ ក្រុងសៀមរាប ខេត្តសៀមរាប (ជាអ្នករក្សាទុកនិងជួញដូរ ព្រមទាំងមានសារធាតុញៀនក្នុងខ្លួន) ២-ឈ្មោះ អួរ ពេជ្រ ភេទប្រុស អាយុ២៥ឆ្នាំ មុខរបរមិនពិតប្រាកដ ទីលំនៅភូមិក្រួស សង្កាត់ស្វាយដង្គំ ក្រុងសៀមរាប ខេត្ត សៀមរាប (ជាអ្នកជួញដូរ និងមានសារធាតុញៀនក្នុងខ្លួន) និង៣-ឈ្មោះ ចែម សុខច័ន្ទ ហៅ បាល់ ភេទប្រុស អាយុ៣២ឆ្នាំ មុខរបរមិនពិតប្រាកដ មានទីលំនៅភូមិតាគង់ សង្កាត់សំបួរ ក្រុងសៀមរាប ខេត្តសៀមរាប (ជាអ្នកជួញដូរ និងមានសារធាតុញៀនក្នុងខ្លួន)។
ក្រោយការឃាត់ខ្លួនជនសង្ស័យទាំង៣នាក់ ក្នុងនោះកម្លាំងជំនាញបានដកហូតបានវត្ថុតាងនៅក្នុងផ្ទះជនសង្ស័យរួមមាន ម្សៅមេតំហ្វេតាមីនប្រភេទទឹកកកចំនួន១កញ្ចប់ ឧបករណ៍ប្រើប្រាស់ សំភារៈសម្រាប់វេចខ្ចប់គ្រឿងញៀនមូយចំនួន និងទូរស័ព្ទដៃ៧គ្រឿង ។
បច្ចុប្បន្ន ជនសង្ស័យរួមនឹងវត្ថុតាងត្រូវបានកម្លាំងជំនាញរៀបចំកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់តាមផ្លូវច្បាប់៕
ចែករំលែកព័តមាននេះ