អីយ៉ា! ពុទ្ធ សំបូរ គួរឱ្យសរសើរទៀតហើយ

ថ្ងៃទី ២៦ ខែ សីហា ឆ្នាំ ២០១៨

ម៉ោង ១៣:០៩

រាជធានីភ្នំពេញ ៖ គួរឱ្យសរសើរទៀតហើយ បន្ទាប់ពីកីឡាករវ័យក្មេង លោក ពុទ្ធ សំបូរ ដែលត្រូវគេស្គាល់ថា មកពីក្លិបពុទ្ធសេរីវង្សខណ្ឌពោធិ៍សែនជ័យ បានបញ្ចប់ការប្រកួតដណ្ដើមជើងឯកនៅប៉ុស្ដិ៍លេខ៥ ហើយដណ្ដើមបានកៅអីទៅកាន់វគ្គ៨នាក់ដែលជាតំណែងកាន់តែកៀកនឹងការប្រកួតយកពានដែលជាក្ដីស្រម៉ៃរបស់អ្នកចូលរួមប្រកួតគ្រប់រូប។

នេះជាការប្រកួតក្នុងព្រឹត្តិការណ៍ជ្រើសរើសជើងក្នុងប្រភេទទម្ងន់៦០គីឡូក្រាម TV5 Boxing Knock Out Series By K-Cement ដែលមានបេក្ខជនសរុប៣២រូបចូលរួមប្រកួតជម្រុះចាញ់ធ្លាក់ៗ។ ការប្រកួតដែលធ្វើឡើងនៅសង្វៀនប៉ុស្ដិ៍លេខ៥នៅព្រែកកំពិស កាលពីថ្ងៃទី២៤ សីហា នោះ គឺជាការប្រកួតដណ្ដើមកៅអី៨នាក់រវាង កីឡាករ ពុទ្ធ សំបូរ និងកីឡាករ ណាម ម៉ូរ៉ាក់ មកពីក្លិបពន្លឺសាមគ្គីខេត្តបាត់ដំបង ដែលគេស្គាល់តាំងពីការប្រកួតកាលពីរដូវកាលមុនមកម្ល៉េះៗថា ជាជើងខ្លាំងម្នាក់។

អ្នកទាំងពីរបានឡើងប៉ះគ្នា បន្ទាប់ពីបានឡើងប្រកួតក្នុងវគ្គ៣២រូបយក១៦នាក់ ហើយបានឈ្នះដូចគ្នា ទើបមានឈ្មោះចាប់គូឡើងប្រកួតជម្រុះពី១៦នាក់ យក៨នាក់ដើម្បីឱ្យកំណត់ជោកវាសនាថា ត្រូវទៅប្រកួតបន្ត ឬបញ្ឈប់ត្រឹមហ្នឹង។

យ៉ាងណាមិញ ក្រោយការប្រកួតយ៉ាងស្វិតស្វាញ គេកត់សម្គាល់ថា កីឡាករល្អម្នាក់ គឺបង្គោលខៀវ ពុទ្ធ សំបូរ បានទទួលជ័យជម្នះ ដោយអាចយកឈ្នះគូប្រកួតដល់ពិន្ទុ ហើយដណ្ដើមបានកៅអី៨នាក់ដូចការចង់បាន បើទោះជាបានធ្វើឱ្យកីឡាករម្នាក់ផ្សេងទៀត គឺគូភាគីមានអារម្មណ៍ស្រងាកចិត្តនឹងការហាលអាវរបស់ខ្លួន។

ក្រោយបញ្ចប់ការប្រកួតនេះ គឺមានន័យថា កីឡាករដែលបានឡើងទៅ៨នាក់ទាំងអស់ នឹងជិតដល់ថ្ងៃបន្តប្រកួតជម្រុះគ្នាយក៤នាក់ហើយ ដើម្បីឆ្ពោះទៅរកម្ចាស់ជើងឯក ដែលមានសិទ្ធិកាន់ពាន និងប្រាក់លានចំណាត់ថ្នាក់ទាំង៣ចុងក្រោយ៕