ប្រទេសអូស្ត្រាលី ៖ គិតមកត្រឹមថ្ងៃអាទិត្យ ទី២៦ សីហា ២០១៨នេះ កម្ពុជាដណ្ដើមបានមេដាយចំនួន៣គ្រឿងហើយ ក្នុងនោះមេដាយមាសចំនួន២គ្រឿ និងមេដាយសំរឹទ្ធ១គ្រឿង ធ្វើឱ្យកម្ពុជាឈរនៅលេខរៀងទី១៦ ក្នុងតារាងនាំមុខប្រទេសវៀតណាម។
បើតាមលោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្មដឹកនាំប្រតិភូកីឡាទៅចូលរួមប្រកួតនៅក្នុងព្រឹត្តិការកីឡាទ្វីបអាស៊ីនៅទីក្រុងហ្សាការតា ប្រទេសឥណ្ឌូនេស៊ី បានឱ្យដឹងថា សម្រាប់មេដាយទាំង៣គ្រឿងដែលកម្ពុជាដណ្ដើមបានមកនេះ គឺកីឡាករម៉ូតូទឹក សាលី អូមើត ដណ្ដើមបានមេដាយមាស១គ្រឿងពីព្រឹត្តិការណ៍កីឡាអាស៊ីហ្គេម (Asian Games) កាលពីព្រឹកថ្ងៃទី២៥ កន្លងមកនេះ ដែលការប្រកួតនេះធ្វើឡើងនៅឆ្នេរសមុទ្រ Ancol Beach ប្រទេសឥណ្ឌូនេស៊ី។
លោក វ៉ាត់ ចំរើន បន្តថា កីឡាករម៉ូតូទឹក សាលី អូមើត មុននឹងឈានទៅដល់ការដណ្ដើមបានមេដាយមាស ត្រូវឆ្លងកាត់ការប្រកួតយ៉ាងស្វិតស្វាញតាំងពីថ្ងៃទី២៣ មកម្ល៉េះ ដោយមានកីឡាករ៩នាក់ចូលរួម។ សម្រាប់ការប្រកួតជុំទី១ កីឡាករកម្ពុជាដែលមានអាយុ២៦ឆ្នាំរូបនេះ ធ្វើបានល្អមែនទែន រហូតមានឱកាសនាំមុខគេនៅក្នុងជុំទី៣និងទី៤ ជាបន្តទៀត រហូតដណ្ដើមបានមេដាយមាសជាប្រវត្តិសាស្ត្រពីព្រឹត្តិការណ៍កីឡាអាស៊ីមួយនេះ។ ម្យ៉ាងវិញទៀតមេដាយមាសដែលគេដណ្ដើមបាននាពេលនេះលើវិញ្ញាសា Ski Modifield។
ចំណែកមេដាយសំរឹទ្ធ១គ្រឿងទៀត ក៏បានឈ្នះពីការប្រកួតកាលពីព្រឹកថ្ងៃទី២៥ ខែសីហា ជាមួយគ្នានេះដែរ លើវិញ្ញាសា Runabout 1100 Stock រកបានដោយកីឡាសាលី អូមើត។ គួរំលឹកផងដែរកម្ពុជា បានបំបែកកំណត់ត្រា៦៤ឆ្នាំមុន បន្ទាប់ពីកីឡាម៉ូតូទឹកកម្ពុជាដណ្ដើមបានមេដាយមាស១គ្រឿងទៀត។
រីឯមេដាយមាស១គ្រឿងទៀត គឺបានមកពីការប្រកួតកីឡា Jiu-Jitsu ដោយកីឡាការិនីកូនខ្មែរ- កាត់អាមេរិក ខាន់ ចេសា បន្ទាប់ពីនាងបានប្រកួតយកឈ្នះកីឡាការិនីមកពីអារ៉ាប់រួមឈ្មោះAlhinaai Mahraនៅវគ្គផ្ដាច់ព្រ័ត្រជាមួយនឹងលទ្ធផលពិន្ទុ១០០ទល់និង០៕
ចែករំលែកព័តមាននេះ