រាជធានីភ្នំពេញ ៖ សពបុរសជាកម្មករសំណង់ម្នាក់ត្រូវបានប្រជាពលរដ្ឋប្រទះឃើញអណ្តែតទឹកស្រះ បន្ទាប់ពីបាត់ខ្លួនអស់រយៈពេល២ថ្ងៃ ។ ហេតុការណ៍នេះបង្កឲ្យមានការភ្ញាក់ផ្អើល កាលពីវេលាម៉ោង១២និង៣០ថ្ងៃត្រង់ថ្ងៃទី២៥ ខែសីហា ឆ្នាំ២០១៨ នៅក្នុងទឹកស្រះក្នុងដីឡូតិ៍គ្មានលេខមួយកន្លែង ស្ថិតនៅតាមផ្លូវលេខ១៨០០ ក្រុមទី៨ ភូមិខ១ សង្កាត់ ច្រាំងចំរេះទី២ខណ្ឌឬស្សីកែវ ។
សពបុរសខាងលើត្រូវបាននគរបាលឲ្យដឹងថា មានឈ្មោះ ជា ហ៊ន អាយុ៣១ឆ្នាំ មុខរបរកម្មករសំណង់ ស្នាក់នៅក្បែរកន្លែងកើតហេតុ និងមានស្រុកកំណើតនៅភូមិទឹកសិនខាងជើង ឃុំបឹងដោលស្រុកព្រះស្តេច ខេត្តព្រៃវែង ។
តាមស្ត្រីឈ្មោះ អឿន សៀន អាយុ៣២ឆ្នាំ ត្រូវជាប្រពន្ធ បានឲ្យដឹងថា ប្តីរបស់នាងបានបាត់ខ្លួនរយៈពេល២ថ្ងៃមកហើយ មិននឹកស្មានថា ស្លាប់ហើយត្រូវបានគេប្រទះឃើញអណ្តែតក្នុងទឹកស្រះបែបនេះ ។ ស្ត្រីជាប្រពន្ធបានបន្តទៀតថា នៅវេលាយប់ថ្ងៃទី២៣ ខែសីហា នាង និងប្តី បានអង្គុយហូបបាយ និងផឹកស្រាបៀរ ។ លុះនៅវេលាម៉ោងប្រមាណ១០យប់នាងក៏បានហៅឲ្យប្តីចូលដេក តែប្តីប្រាប់ឲ្យដេកមុន ។ នៅពេលនាងបានដេកលង់លក់មួយភាំងភ្ញាក់ឡើងមិនឃើញប្តីក៏បានដើររកនៅតាមមាត់ស្រះមិនឃើញ និងបានប្រាប់បងប្អូនជាកម្មករសំណង់ដូចគ្នាជួយដើររក នៅតែមិនឃើញ ស្រាប់តែនៅវេលាថ្ងៃត្រង់ទើបប្រទះឃើញសពអណ្តែតទឹក ក្នុងស្រះ ។
តាមព័ត៌មានឲ្យដឹងទៀតថា កន្លងមកបុរសជាកម្មកររូបនោះក៏បានធ្លាក់ទៅចាប់ត្រីនៅក្នុងស្រះនោះ ។ បន្ទាប់ពីភ្ញាក់ផ្អើលប្រទះឃើញសពនគរបាលមូលដ្ឋានបានទាក់ទងហៅនគរបាលជំនាញចុះទៅត្រួតពិនិត្យសព ។ តាមការត្រូតពិនិត្យសពពុំមានស្លាកស្នាមនោះទេ ។ នគរបាលក៏បានសន្និដ្ឋានថា សពបុរសរូបនោះស្លាប់ដោយសារតែលង់ទឹក ។ សពត្រូវបានក្រុមគ្រួសារនាំទៅស្រុកកំណើតធ្វើបុណ្យតាមប្រពៃណី ៕
ចែករំលែកព័តមាននេះ