ខេត្តកំពង់ស្ពឺ ៖ ព្រោះតែរឿងនំ៤កញ្ចប់សោះបណ្តាលអោយបុរសពិការម្នាក់រងនូវការកាប់ប្រហារជាច្រើនកាំបិតពីសំណាក់ជនដៃដល់មួយរូបដែលប៉ុនប៉ងសម្លាប់ដោយសារតែជនរងគ្រោះឃើញជនដៃដល់លួចនំរបស់ខ្លួនដែលដាក់លក់យកទៅអោយចៅរបស់ខ្លួន ។
ករណីកាប់ប្រហានេះកើតឡើងកាលពីវេលាម៉ោង០៧យប់ ថ្ងៃទី២៤ ខែសីហា ឆ្នាំ២០១៨ នៅភូមិតាមិញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ បង្កដោយជនសង្ស័យឈ្មោះ យ៉ុង កេន ភេទប្រុស អាយុ៦៧ឆ្នាំ ចំណែកជនរងគ្រោះឈ្មោះ សុខ ហុន ភេទប្រុស អាយុ៣៨ឆ្នាំ មានទីលំនៅកន្លែងកើតហេតុខាងលើ ។
លោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់បានប្រាប់ថា ជនរងគ្រោះបានរងនូវការកាប់ត្រូវចំនួន៦កាំបិតផ្គាក់ដោយសារតែជនដៃដល់ខឹងនឹងជនរងគ្រោះស្តីអោយរឿងលួចនំរបស់ខ្លួនយកទៅអោយចៅ ។
តាមការរៀបរាប់របស់សាច់ញាតិជនរងគ្រោះបានអោយសមត្ថកិច្ចដឹងថា កាលពីថ្ងៃទី២១ សីហា ជនដៃដល់បានមកផ្ទះជនរងគ្រោះដែលមានដាក់លក់នំ និងចាប់ហួយពេកនោះទំនងងជាអត់ឃើញមនុស្ស ជនដៃដល់បានលួយនំ៤កញ្ចប់ស្រាប់តែជនរងគ្រោះឃើញហើយស្តីអោយរបៀបលេងសើចថា «តាឯងលួចនំខ្ញុំប្រយ័ត្នខ្ញុំប្តឹងអោយប៉ូលិសចាប់ដាក់គុក» ។
ថាហើយជនរងគ្រោះក៏នៅផ្ទះដូចធម្មតា ហើយជនដៃដល់ក៏ចេញបាត់ទៅ ។ លុះមុនពេលកើតហេតុខណៈជនរងគ្រោះកំពុងនៅផ្ទះជុំប្រពន្ធដូចសព្វដង ស្រាប់យែលេចមុខជនដៃដល់ក្នុងដៃកាន់កាំបិតផ្គាប់បានមកកាប់ប្រហារលើជនរងគ្រោះ៦កាំបិតឃើញដូចច្នោះប្រពន្ធជនរងគ្រោះចូលទៅជួយក៏ត្រូវជនដៃដល់កាប់ត្រូវមួយកាំបិតផងដែរ បណ្ដាលអោយរងរបួសធ្ងន់ទាំង២នាក់ប្តីប្រពន្ធតែម្តង ។
ក្រោយបង្កជនសង្ស័យក៏ត្រូវបានប្រជាការពារ និងសមត្ថកិច្ចចូលទៅឃាត់ខ្លួន ស្រាប់តែជននេះបានកាប់មកលើសមត្ថកិច្ចទៀតផងតែសំណាងល្អរបូតកាំបិតចេញពីដងកុំអីមិនដឹងជារងរបួសមនុស្សប៉ុន្មាននាក់នោះទេ ។ ក្រោយបង្កសមត្ថកិច្ចបាននាំខ្លួនមករក្សាទុកបណ្តោះអាសន្ននៅអធិការដ្ឋាននគរបាលស្រុកដើម្បីកសាងសំណុំរឿងតាមនីតិវិធី ។
នៅចំពោះមុខសមត្ថកិច្ចជនសង្ស័យបាននិយាយថា មូលហេតុដែលខ្លួនកាប់ប្រហារជនរងគ្រោះដោយសារខឹងមានជាងខ្លួន ហើយម្យ៉ាងទៀតខ្លាចជនរងគ្រោះប្តឹងអោយសមតហ្ថកិច្ចឃាត់ខ្លួនរឿងលួចនំ៤កញ្ចប់កាលពីថ្ងៃទី២១ កន្លងមក ។ លើសពីនេះទៅទៀតជនដៃដល់បានប្រាប់សមត្ថកិច្ចថា ឱ្យបាញ់គាត់ចោលទៅ បើមិនបាញ់ចោលទេ គាត់នឹងសម្លាប់ខ្លួននៅក្នុុុុុុុងគុកជាក់ជាមិនខានឡើយ ៕
ចែករំលែកព័តមាននេះ