ខេត្តកំពង់ឆ្នាំង ៖ រហូតមកដល់ព្រឹកថ្ងៃទី២៤ ខែសីហា នគរបាលការិយាល័យព្រហ្មទណ្ឌកម្រិតស្រាលខេត្ត នៅមិនទាន់បញ្ជូនជនសង្ស័យចំនួន៣នាក់ពាក់ព័ន្ធនឹងការលួចក្របីទៅកាន់សាលាដំបូងនៅឡើយទេ ដោយប្រាប់ថាកំពុងសាកសួរនៅឡើយ ។
លោក ពេជ រ៉ី នាយការិយាល័យនគរបាលព្រហ្មទណ្ឌកម្រិតស្រាលខេត្ត បានឲ្យដឹងថា នៅព្រឹកថ្ងៃទី២៤ ខែសីហា ជនសង្ស័យចំនួន៣នាក់ ពាក់ព័ន្ធនឹងករណីលួចក្របីពីខេត្តពោធិ៍សាត់ ហើយត្រូវសមត្ថកិច្ចចាប់បាននៅស្រុកទឹកផុស ខេត្តកំពង់ឆ្នាំង នៅមិនទាន់បញ្ជូនទៅសាលាដំបូងនៅឡើយទេ គឺកំពុងសាកសួរ ។
ទោះជាយ៉ាងនេះក្តី លោកបញ្ជាក់ថា មន្ត្រីជំនាញបានសុំពន្យារពេលនៃការសាកសួរទៅកាន់តុលាការតាមនីតិវិធីរួចហើយដែរ ។
សូមរំឭកថា ជនសង្ស័យជាមុខសញ្ញាលួចក្របីចំនួន៣នាក់ ត្រូវនគរបាលស្រុកទឹកផុសស្ទាក់ចាប់បានកាលពីវេលាម៉ោង៣និង៣០នាទីរសៀលថ្ងៃទី២២ ខែសីហា នៅចំណុចភ្នំក្រញាញ់ ក្នុងភូមិដំណាក់អំពិល ឃុំក្តុលសែនជ័យ ស្រុកទឹកផុស ខណៈពួកគេកំពុងដឹកក្របីចំនួន៤ក្បាល ដែលលួចបានពីខេត្តពោធិ៍សាត់ ឆ្លងកាត់ទឹកដីខេត្តកំពង់ឆ្នាំង ។ ជនសង្ស័យទាំង៣នាក់នេះមាន ៖
១-ឈ្មោះ រឿន វី ភេទប្រុស អាយុ៥៣ឆ្នាំ មានទីលំនៅភូមិថ្មគោល ឃុំចោមចៅ ខណ្ឌដង្កោ រាជធានីភ្នំពេញ
២-ឈ្មោះ ហ៊ីម លី ភេទប្រុស អាយុ៣៥ឆ្នាំ ជាខ្មែរអ៊ិស្លាម រស់នៅភូមិត្បែងប្រគាប ឃុំកញ្ជរ ស្រុកកណ្តៀង ខេត្តពោធិ៍សាត់ និង៣-ឈ្មោះ អូន គុន ភេទប្រុស រស់នៅភូមិពោធិ៍ ឃុំស្រែស្តុក ស្រុកកណ្តៀង ខេត្តពោធិ៍សាត់ ។
ចំពោះវត្ថុតាងដែលរឹបអូសមាន ក្របីចំនួន៤ក្បាល(ញី៣ក្បាល) និងម៉ូតូម៉ាកហុងដាសេ១២៥ ចំនួន២គ្រឿង ។ តាមការបញ្ជាក់របស់សមត្ថកិច្ចនគរបាលបានឲ្យដឹងថា ជនសង្ស័យទាំង៣នាក់ជាមុខសញ្ញា
ចាស់ ធ្លាប់លួចគោក្របីនៅពោធិ៍សាត់ និងខេត្តកំពង់ឆ្នាំង ហើយត្រូវសមត្ថកិច្ចចាប់បានដាក់ពន្ធនាគារ
ជាច្រើនលើក រហូតមានរូបថតដាក់តាំងនៅស្នងការដ្ឋាននគរបាលខេត្តទៀតផង ៕
ចែករំលែកព័តមាននេះ