រាជធានីភ្នំពេញ ៖ ឈាមជ្រូកជាង៤០០គីឡូក្រាម ដែលមានលាយឡំជាមួយសារធាតុគីមី បានត្រូវមន្ត្រីកាំកុងត្រូលកំពង់ផែអន្តរជាតិភ្នំពេញ សហការជាមួយនគរបាលប៉ុស្តិ៍ច្បារអំពៅទី២ និងគណៈកម្មការផ្សារចំនួន២ គឺផ្សារបន្លែ និងផ្សារច្បារអំពៅ ដកហូតពីបុរសម្នាក់ដែលដឹកតាមរ៉ឺម៉កម៉ូតូយកមកចែកចាយលក់បន្តដល់អាជីវករផ្សារទាំង២ខាងលើ…
រាជធានីភ្នំពេញ ៖ ឈាមជ្រូកជាង៤០០គីឡូក្រាម ដែលមានលាយឡំជាមួយសារធាតុគីមី បានត្រូវមន្ត្រីកាំកុងត្រូលកំពង់ផែអន្តរជាតិភ្នំពេញ សហការជាមួយនគរបាលប៉ុស្តិ៍ច្បារអំពៅទី២ និងគណៈកម្មការផ្សារចំនួន២ គឺផ្សារបន្លែ និងផ្សារច្បារអំពៅ ដកហូតពីបុរសម្នាក់ដែលដឹកតាមរ៉ឺម៉កម៉ូតូយកមកចែកចាយលក់បន្តដល់អាជីវករផ្សារទាំង២ខាងលើ ស្ថិតក្នុងសង្កាត់ច្បារអំពៅទី២ ខណ្ឌច្បារំពៅ កាលពីព្រឹកថ្ងៃទី២៤ ខែ សីហា។
សូមបញ្ជាក់ថា មន្ត្រីកាំកុងត្រូលបានស្ទាក់ចាំចាប់ តាំងពីម៉ោង៣រំលងអធ្រាត្រមកម្ល៉េះ ប៉ុន្តែរហូតដល់ម៉ោង៥ព្រឹក ទើបឃើញបុរសឈ្មេាះ សុខ បិន អាយុ៣៨ឆ្នាំ ដឹកឈាមជ្រូកតាមរ៉ឺម៉កម៉ូតូ មកធ្វើការចែកចាយនៅផ្សារទាំង២ ក៏សម្រេចឃាត់សួរនាំ និងពិនិត្យគុណភាពទំនិញ ។
លោក សាន់ ប៉ូណា ប្រធានផ្សារបន្លែឱ្យដឹងថា ក្រោយពីមន្ត្រីកាំកុងត្រូលបានធ្វើការពិនិត្យមើលឈាមជ្រូករបស់បុរសខាងលើតាមជំនាញយ៉ាងល្អិតល្អន់រួចមកឃើញថា ឈាមជ្រូកទាំងនោះ ពិតជាមានលាយឡំជា មួយសារធាតុគីមីខុសច្បាប់ប្រាកដមែន ។ ដូច្នេះហើយ ទើបសម្រេចធ្វើការដកហូតឈាមជ្រូកទាំងអស់សរុប៤២០គីឡូក្រាម យកទៅដុតកម្ទេចចោលនៅនឹងកន្លែងតែម្តង ។
ដោយឡែក ចំពោះបុរសដែលដឹកឈាមជ្រូកយកមកចែកចាយនេះ មន្ត្រីជំនាញបានធ្វើកិច្ចសន្យាអប់រំណែ នាំឱ្យបញ្ឈប់សកម្មភាពនេះបន្តទៀត ។ ប្រសិនបើរកឃើញថា បុគ្គលរូបនេះមានពាក់ព័ន្ធនឹងបទល្មើសដដែលម្តងទៀត នឹងចាត់វិធានការទៅតាមផ្លូវច្បាប់ដោយមិនមានករណីលើកលែងទៀតទេ ។
ជំុវិញការបង្ក្រាបការចែកចាយឈាមជ្រូកមានលាយឡំសារធាតុគីមីនេះ គេនៅមិនទាន់ដឹងនៅឡើយទេថា តើបុរសជាអ្នកដឹកយកមកចែកចាយនោះ ដឹកយកមកពីទីកន្លែងណា ហើយមានមេកោយជាអ្នកណាឡើយ ។ រីឯមន្ត្រីជំនាញបានត្រឹមតែធ្វើកិច្ចសន្យាអប់រំ រួចសម្រេចដោះលែងទៅវិញ ដោយទុកឱ្យអ្នកផលិតបានរួចខ្លួនបន្តផលិតតទៅទៀត ហើយអ្នកចែកចាយផ្សេងទៀតក៏នៅតែរកស៊ីបាន ។
គួររំឭកថា កាលពីថ្ងៃទី១៤ ខែសីហាកន្លងទៅ មន្ត្រីកាំកុងត្រូលធ្លាប់បានដកហូតឈាមជ្រូកមានលាយឡំសារធាតុគីមីពីក្រុមអាជីវករនៅផ្សារច្បារអំពៅចំនួន៤៣,៥គីឡូក្រាមផងដែរ ដែលកាលនេាះ មន្ត្រីជំនាញបានធ្វើការដុតបំផ្លាញចោលនៅនឹងកន្លែងភ្លាមៗដូចគ្នា និងណែនាំឲ្យម្ចាស់អាជីវកម្មបញ្ឈប់ការលក់ដូរទំនិញណាដែលមានលាយសារធាតុគីមី ។
មន្ត្រីកាំកុងត្រូល បានអំពាវនាវដល់ក្រុមអាជីវករទាំងអស់ សូមបងប្អូនលក់ដូរតែទំនិញណាដែលមានគុណភាពល្អសម្រាប់ប្រជាពលរដ្ឋទិញយកទៅបរិភោគ ចៀសវាងការលក់ដូរទំនិញដែលមានលាយសារធាតុហាមឃាត់ខុសនឹងច្បាប់ ព្រេាះតែដើម្បីបំពេញផលចំណេញផ្ទាល់ខ្លួនរបស់បងប្អូន ហើយមិនគិតពីផលអាក្រក់ដែលបានបំផ្លាញសុខភាពរបស់ពលរដ្ឋក្នុងសង្គមទូទៅរបស់យើងទាំងអស់គ្នាទៅវិញនោះ ។
ចង់ដឹងណាស់ ហេតុអីមិននាំទៅចាប់ដល់ទីតាំងផលិត? ចាប់តែអ្នកស៊ីឈ្នួលដឹក ដោយទុកទីតាំងផលិតគ្រាន់ទៅសួរសុខទុក្ខមែនទេ?
ចែករំលែកព័តមាននេះ