ខេត្តបន្ទាយមានជ័យ ៖ បុរសម្នាក់បានផឹកស្រាស្រវឹងដួលផ្កាប់មុខក្បាលចូលស្រះទឹក បណ្តាលឈ្លក់ទឹកលង់ស្លាប់។ ហេតុការណ៍បង្កឲ្យភ្ញាក់ផ្អើលនេះបានកើតឡើងនៅវេលាម៉ោង១១ និង៤៦នាទីព្រឹក ថ្ងៃទី២៤ ខែសីហា ឆ្នាំ២០១៨ នៅចម្ងាយប្រហែល១៨០ម៉ែត្រ ពីភូមិប៉ោយព្រីង ឃុំ-ស្រុកព្រះនេត្រព្រះ ខេត្តបន្ទាយមានជ័យមាន។ លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា៖ ជនរងគ្រោះឈ្មោះ ប៊ុន ចឹក ភេទប្រុស អាយុ៤០ឆ្នាំ នៅភូមិប៉ោយព្រីង ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាមានជ័យ។
មុនពេលកើតហេតុ ជនរងគ្រោះបានផឹកស្រាស្រវឹងហើយដើរលើខ្នងស្រះទឹកតាមវាលស្រែខាងលិចភូមិចម្ងាយប្រហែល១៨០ម៉ែត្រ បានដួលផ្កាប់មុខក្បាលលិចចូលក្នុងទឹកស្រះ ចំណែកជើងនៅលើគោកបណ្តាលឲ្យឈ្លក់ទឹកស្រះស្លាប់។ ឆ្លងតាមការបំភ្លឺរបស់ឈ្មោះ ម៉ៅ ចំរើន ភេទស្រី អាយុ៣៤ឆ្នាំ ភូមិនៅភូមិជាមួយគ្នាបានបញ្ជាក់ថា៖ នៅពេល ខ្លួនកំពុងតែអង្គុយស្ទូចត្រី បានឃើញជនរងគ្រោះឈ្មោះ ប៊ុន ចឹក ដើរលើខ្នងស្រះទឹក ហើយបានដួលធ្លាក់ពីលើ ខ្នងស្រះមកក្នុងទឹកវាលស្រែ ចម្ងាយពីខ្លួនប្រហែល ៣០ម៉ែត្រ ខ្លួនបានឲ្យឈ្មោះ គត់ សីហា ភេទប្រុស អាយុ១៤ឆ្នាំ នៅភូមិជាមួយរត់ទៅអូសជើងឡើងមកលើគោក រួចហើយឈ្មោះ សីហា បានមកដើរមកកន្លែងស្ទូចត្រីវិញ ខ្លួនបានសួរ សីហា ថា យ៉ាងម៉េចហើយ សីហាថាមិនស្លាប់ទេដឹងឃើញមាត់គាត់ម្ហបៗ។
ពេលនោះខ្លួនបានដើរទៅមើលឃើញ ប៊ុន ចឹក បានស្លាប់បាត់ទៅហើយ ហើយបានស្រែហៅបងប្អូនមកជួយ។ ឆ្លងតាមការបំភ្លឺឈ្មោះ ប្លុង រស់ ត្រូវជាម្តាយ ជនរងគ្រោះបានបញ្ជាក់ថា៖ កូនរបស់គាត់ឈ្មោះ ប៊ុន ចឹក នេះធ្លាប់មានជំងឺប្រកាច់ជាញឹកញាប់យូរណាស់មកហើយ ធ្លាប់ផឹកស្រាជាប់ជាប្រចាំ ដាច់បាយ ដាច់ទឹក ត្រូវបានលោកគ្រូពេទ្យហាមមិនឲ្យផឹកស្រាទេ ព្រោះខ្វះជាតិស្ករក្នុងខ្លួន ហើយការស្លាប់របស់កូនគាត់នេះគឺសង្ស័យស្រវឹងស្រាប្រកាច់ដួលក្នុងទឹកបណ្តាលឲ្យស្លាប់ដោយខ្លួនឯង។
តាមការសន្និដ្ឋានរបស់ក្រុមការងារគណៈកម្មាការត្រួតពិនិត្យលើខ្លួនប្រាណសព ពុំឃើញមានស្លាកស្នាម អ្វីគួរឲ្យកត់សម្គាល់ទេ ហើយការស្លាប់របស់ឈ្មោះ ប៊ុន ចឹក នេះ អាចបណ្តាលមកពីការផឹកស្រាច្រើនខ្វះជាតិស្ករ ក្នុងខ្លួនហើយប្រកាច់ដួលក្នុងទឹកបណ្តាលឲ្យស្លាប់ដោយខ្លួនឯង៕
ចែករំលែកព័តមាននេះ