ខេត្តមណ្ឌលគិរី ៖ យោងតាមរបាយការណ៍របស់រដ្ឋបាលខេត្តមណ្ឌលគិរីបានឲ្យដឹងថា កាលពីថ្ងៃទី០៤ សីហា ២០១៨ ឯកឧត្តម ស្វាយ សំអ៊ាង អភិបាលខេត្តបាននាំយកថវិការចំនួន៦៨ ២០០ ០០០រៀល ជូនដល់រដ្ឋបាលខេត្តស្ទឹងត្រែង ដើម្បីទិញអង្ករចែកជូនប្រជាពលរដ្ឋដែលកំពុងរងគ្រោះដោយសារការជន់លិចផ្ទះសម្បែងក្នុងខេត្តស្ទឹងត្រែង ។
របាយការណ៍ដដែលបន្តថា នៅថ្ងៃទី០៧ សីហា ២០១៨ ថវិកាចំនួន៦០ ៨០០ ០០០ រៀល បន្ថែមទៀតត្រូវបានឯកឧត្តម ស្វាយ សំអ៊ាង នាំយកទៅជូនរដ្ឋបាលខេត្តក្រចេះ ដើម្បីបន្តទិញស្បៀងអាហារ ទុកចែកជូនប្រជាពលរដ្ឋក្នុងតំបន់រងគ្រោះដែលលិចលង់ ដោយទឹកទន្លេមេគង្គ ។
ឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរីឲ្យកោះសន្តិភាពដឹងថា «ដោយសាររដូវនេះជារដូវភ្លៀងធ្លាក់ជាប្រចាំ ធ្វើឲ្យមានខ្យល់កន្ត្រាក់ប៉ើងដំបូលផ្ទះប្រជាពលរដ្ឋចំនួន០៧ ខ្នង ប្រក់សង្ក័សី និង០២ខ្នង ធ្លាក់ពីលើជើងតាង និងប៉ើងដំបូលនៅស្រុកកែវសីមា និងស្រុកកោះញែក តែមិនមានមនុស្សរងរបួសឡើយ» ។ លោកឧត្តមសេនីយ៍ស្នងការបន្តថា «ក្នុងនាមថ្នាក់ដឹកនាំខេត្តយើងបានធ្វើការផ្សព្វផ្សាយដល់ ប្រជាពលរដ្ឋ ឲ្យមានការប្រុងប្រយ័ត្ន ខ្ពស់ចំពោះគ្រោះថ្នាក់ធម្មជាតិ ដែលអាចកើតឡើងជាយថាហេតុ ពិសេសប្រជាពលរដ្ឋដែលនៅជាប់ដងទន្លេស្រែពកឲ្យមានការប្រុងប្រយ័ត្នចំពោះទឹកជំនន់ និងបានឲ្យអាជ្ញាធរមូលដ្ឋានត្រៀមរកទីទួលសុវត្ថិភាព ដើម្បីសង្គ្រោះពេលមានគ្រោះមហន្តរាយ កើតឡើង ។ ចំពោះតំបន់ខ្ពង់រាប និងទីប្រជុំជនផ្សេងៗស្នើរឲ្យប្រុងប្រយ័ត្នចំពោះខ្យល់កន្ត្រាក់ និងផ្គររន្ទះ» ។
លោកស្នងការបញ្ជាក់ថា«ដើម្បីត្រៀមសង្គ្រោះប្រជាពលរដ្ឋពេលមានគ្រោះមហន្តរាយកើតឡើង ស្នងការនៃស្នងការដ្ឋាននគរបាលខេត្តបានត្រៀមកម្លាំងនគរបាលចំនួន២០០ នាក់ រថយន្តពេទ្យសង្គ្រោះ០១គ្រឿង រថយន្តនគរបាលចំនួន០៦ គ្រឿងត្រៀមជម្លៀសប្រជាពលរដ្ឋពេលមានគ្រោះមហន្តរាយកើតឡើង» ។
ទោះជាយ៉ាងណាគិតត្រឹមម៉ោង២នឹង៣០នាទីរសៀល ថ្ងៃទី២៤ សីហា ២០១៨ កោះសន្តិភាពមិនអាចសុំការបញ្ជាក់បន្ថែមពីឯកឧត្តម ស្វាយ សំអ៊ាង អភិបាលខេត្តមណ្ឌលគិរីបានទេ ជុំវិញវិធានការបម្រុងទុករបស់រដ្ឋបាលខេត្តលើការជួយសង្គ្រោះជនរងគ្រោះដែលជួបគ្រោះមហន្តរាយដោយសារធម្មជាតិដែលអាចកើតមានជាយថាហេតុ ៕
ចែករំលែកព័តមាននេះ