ទីបំផុត កម្ពុជាដណ្ដើមបានមេដាយមាស ក្នុងព្រឹត្តិការណ៍កីឡាអាស៊ី Asian Games លើកទី១៨ នៅប្រទេសឥណ្ឌូណេស៊ី ហើយក៏ជាមេដាយដំបូងរបស់អត្តពលិកកម្ពុជានាឆ្នាំនេះផងដែរ ដែលដណ្ដើមបានដោយកីឡាការិនីកូនកាត់ខ្មែរ-អាមេរិក ខាន់ ចេសា បន្ទាប់ពីកញ្ញាបានយកឈ្នះកីឡាការិនីអារ៉ាប់រួម Alhinaai Mahra ក្នុងវគ្គផ្ដាច់ព្រ័ត្រ ប្រភេទកីឡាជឺជិតស៊ូ លើវិញ្ញាសាទម្ងន់ក្រោម៤៩គីឡូក្រាម នាល្ងាចថ្ងៃសុក្រម្សិលមិញ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្មដឹកនាំក្រុមអត្តពលិកកម្ពុជាចូលរួមប្រកួតក្នុងព្រឹត្តិការណ៍នេះ បានឲ្យដឹងពីប្រទេសឥណ្ឌូណេស៊ីថា នេះគឺជាមោទនភាពថ្មីមួយទៀត សម្រាប់គ្រួសារកីឡាជាតិកម្ពុជា ដែលដណ្ដើមបានមេដាយមាសក្នុងព្រឹត្តិការណ៍កីឡាប្រចាំទ្វីបអាស៊ី ៤ឆ្នាំម្ដងនេះ ហើយក៏ជាមេដាយមាសទី២ ក្នុងប្រវត្តិសាស្ដ្រផងដែរ បន្ទាប់ពីវីរកីឡាការិនី ស៊ន សៀវម៉ី ដែលដណ្ដើមបានមេដាយមាសលើកដំបូង ក្នុងការប្រកួតកីឡា Asian Games លើកទី១៧ នៅប្រទេសកូរ៉េខាងត្បូងកាលពីឆ្នាំ២០១៤ ។
គួរបញ្ជាក់ថា ទម្រាំបើកទំព័រប្រវត្តិសាស្ដ្រដណ្ដើមបានមេដាយមាសជូនជាតិ ក្នុងនាមប្រភេទកីឡាថ្មី ដែលទើបបានចូលរួមប្រកួតកីឡាអាស៊ីលើកដំបូងក្នុងឆ្នាំ២០១៨នេះ ខាន់ ចេសា បានឆ្លងកាត់ការប្រកួត៦លើក ។
ក្នុងនោះប្រកួតទី១ឈ្នះកីឡាការិនីថៃ១០០-០ពិន្ទុ, ប្រកួតទី២ ឈ្នះកីឡាការិនីចិនដោយស្វ័យប្រវត្តិ បន្ទាប់ពីកីឡាការិនីចិនបោះបង់ការប្រកួត, ប្រកួតទី៣ ឈ្នះពិន្ទុដាច់លើកីឡាការិនីអ៊ីរ៉ង់, ប្រកួតទី៤ ឈ្នះកីឡាការិនីហ្វីលីពីនក្នុងវគ្គពាក់កណ្ដាលផ្ដាច់ព្រ័ត្រ ១០០-០ពិន្ទុ និងចុងក្រោយផ្ដួលកីឡាការិនីអារ៉ាប់រួម ដណ្ដើមយកមេដាយមាសតែម្ដង៕
ចែករំលែកព័តមាននេះ