«Daily Mail» បស់អង់គ្លេសផ្សាយថា តុលាការអាមេរិកបានចោទប្រកាន់នារីម្នាក់ដែលច្រានមិត្តភក្ដិឲ្យធ្លាក់ពីលើស្ពានរងរបួសធ្ងន់ អាចប្រឈមការជាប់ពន្ធនាគារ១ឆ្នាំ ក្រោយពីបានសារភាពថាមិត្តរបស់ខ្លួនប្រាប់ឲ្យជួយច្រានព្រោះខ្លាចមិនហ៊ានលោតខ្លួនឯង ។
រឿងរ៉ាវនៃការច្រានមិត្តឲ្យធ្លាក់ពីលើស្ពាននេះបានទទួលចំណាប់អារម្មណ៍ពីមហាជនទូទៅនៅលើពិភពលោក ។ នារីជនជាតិអាមេរិកនាងJordan Holgerson អាយុ១៦ឆ្នាំត្រូវមិត្តម្នាក់ច្រានឲ្យធ្លាក់ពីលើស្ពានឆ្លងទន្លេ«Lewis» ក្នុងរដ្ឋវ៉ាស៊ីនតោនសហរដ្ឋអាមេរិកបង្កឲ្យរបួសបាក់ឆ្អឹងជំនីរ កាលពីថ្ងៃទី៧ សីហា ២០១៨ ។
តុលាការប្ដឹងនាងTaylor Smith អាយុ១៨ឆ្នាំជាអ្នកបង្កហេតុ ពីបទធ្វើដោយប្រមាថបង្កឲ្យអ្នកផ្សេងរងរបួស ។ នារីបង្កហេតុនឹងប្រឈមមុខជាប់គុក១ឆ្នាំ និងត្រូវពិន័យប្រាក់ប្រហែល៥.០០០ដុល្លារ ។
នាងTaylor Smith បានទទួលការចោទប្រកាន់ ក្រោយពីបានសារភាពពីហេតុផលរុញនាង Holgersonថា «នារីរងគ្រោះបានសុំឲ្យខ្លួនច្រានព្រោះខ្លាចមិនហ៊ានលោតពីស្ពានមានកម្ពស់ប្រហែល២០ម៉ែត្រ» ។
ប្រភពដដែលនេះបានបញ្ជាក់ទៀតថាបច្ចុប្បន្នHolgerson អាចចេញពីមន្ទីរពេទ្យបាន និងត្រូវសម្រាកព្យាបាលនៅឯផ្ទះ ជាលើកដំបូងនាងបានបញ្ជាក់ថាខ្លួនចង់ឃើញមិត្តជាប់គុក ទទួលខុសត្រូវលើអ្វីដែលបានប្រព្រឹត្ត ៕
ចែករំលែកព័តមាននេះ