ខេត្តពោធិ៍សាត់ ៖ ជ្រូកកណ្ដុរជាពូជជ្រូកចូលចិត្តរស់នៅក្នុងព្រៃ តែវាខុសពីជ្រូកព្រៃ វាមានរូបរាងតូចៗនិងជាសត្វងាយចិញ្ចឹម ព្រមទាំងឈ្នះជំងឺផ្សេងៗ ។ ចំណីរបស់វាដូចជា បាយ បបរ និងបន្លែផ្លែឈើជាដើម ។ ដោយសារវាជាពូជសត្វងាយចិញ្ចឹម មន្ត្រីជាន់ខ្ពស់ក្រសួងបរិស្ថាន បានលើកទឹកចិត្តឲ្យប្រជាពលរដ្ឋរស់នៅតំបន់ភ្នំចូលរួមចិញ្ចឹមឲ្យបានផុសផុលដើម្បីបង្កើនចំណូលជីវភាពគ្រួសារ ។
ក្នុងឱកាសចុះពិនិត្យការចិញ្ចឹមជ្រូកកណ្ដុរ(ពូជជ្រូកជនជាតិ)នៅស្នាក់ការដែនជម្រកសត្វព្រៃភ្នំឱរ៉ាល់ដែលមានមូលដ្ឋាននៅខេត្តពោធិ៍សាត់ កាលពីថ្ងៃទី២១ សីហា កន្លងមក រដ្ឋមន្ត្រីក្រសួងបរិស្ថាន លោក សាយ សំអាល់ បានជំរុញ និងលើកទឹកចិត្តដល់ប្រជាពលរដ្ឋក្នុងការចូលរួមចិញ្ចឹមជ្រូកប្រភេទនេះ និងសត្វមាន់ឲ្យបានផុលផុសដើម្បីបង្កើនចំណូលសម្រាប់ជីវភាពគ្រួសារ ។ លោករដ្ឋមន្ត្រី ថ្លែងថា ៖« ការចិញ្ចឹមសត្វជ្រូកកណ្តុរ និងសត្វមាន់ ដែលទាំងនេះគឺជាផ្នែកមួយសម្រាប់ជីវភាពប្រជាពលរដ្ឋនៅក្នុងតំបន់នេះ។ មិនតែប៉ុណ្ណោះ អាចយកទៅផ្គត់ផ្គង់ទីផ្សារនៅក្នុងស្រុកថែមទៀត »។
លោករដ្ឋមន្ត្រី ក៏បានស្នើដល់គ្រប់ផ្នែកពាក់ព័ន្ធទាំងអស់ ត្រូវយកចិត្តទុកដាក់ឱ្យបានខ្ពស់ ជាពិសេសពិនិត្យនិងសិក្សាបន្ថែមទៀតលើជំនាញ និងបច្ចេកទេសក្នុងការចិញ្ចឹមសត្វទាំងនេះឲ្យមានសុខភាពល្អ និងទទួលបានទិន្នផលខ្ពស់ ។
អគ្គនាយកនៃអគ្គនាយកដ្ឋានសហគមន៍មូលដ្ឋាន លោកខៀវ បូរិន បានឱ្យដឹងថា គោលបំណងនៃការបង្កើតមជ្ឈមណ្ឌលចិញ្ចឹមជ្រូកកណ្តុរនេះឡើង គឺដើម្បីផលិតកូនជ្រូកចែកជូនប្រជាកសិករនៅក្នុងសហគមន៍តំបន់ការពារធម្មជាតិ ដែលនេះជាគោលដៅរបស់ក្រសួងបរិស្ថាន ។ លោកអគ្គនាយកបន្តថា ៖« បន្ទាប់ពីទទួលបានគោលការណ៍ក្រោយសន្និតបាតក្រសួងបរិស្ថានកាលពីឆ្នាំ២០១៧មក អគ្គនាយកដ្ឋានសហគមន៍មូលដ្ឋាន បានបង្កើតកសិដ្ឋានចិញ្ចឹមជ្រូកពូជនេះបាន២កន្លែងទាំងនៅទីនេះ និងមួយកន្លែងទៀតនៅក្នុងខេត្តមណ្ឌលគិរី ដែលជាសហគមន៍តំបន់ការពារធម្មជាតិ » ។
លោកបន្ដថា ៖«ចាប់តាំងពីពេលនោះមក យើងបានជំរុញ និងលើកទឹកចិត្តប្រជាពលរដ្ឋឱ្យចិញ្ចឹមជ្រូក ដែលអាចពឹងពាក់លើចំណីក្នុង ស្រុក និងការរីកលូតលាស់តាមលក្ខណៈធម្មជាតិ។ មិនតែប៉ុណ្ណោះអាចយកទៅផ្គត់ផ្គង់ទីផ្សារក្នុងស្រុកក្នុងការរកប្រាក់ចំណូលសម្រាប់ជីវភាពថែមទៀត » ។ មជ្ឈមណ្ឌលចិញ្ចឹមជ្រូកកណ្តុរនៃដែនជម្រកសត្វព្រៃភ្នំឱរ៉ាល់ មានទីតាំងនៅភូមិសាស្ត្រខេត្តពោធិ៍សាត់ មានផ្ទៃដីសរុបចំនួន៣ហិកតា ។
សូមបញ្ជាក់ថា នៅក្នុងការចុះពិនិត្យមជ្ឈមណ្ឌលចិញ្ចឹមជ្រូកកណ្តុរ និងជួបសំណេះសំណាលជាមួយមន្ត្រីបរិស្ថានខេត្តនោះ លោករដ្ឋមន្ត្រី សាយ សំអាល់ ក៏បានអញ្ជើញដាំកូនឈើជានិមិត្តរូបក្នុងដែនជម្រកសត្វព្រៃភ្នំឱរ៉ាល់ផងដែរ ៕
ចែករំលែកព័តមាននេះ