ចេញបញ្ជាហើយឲ្យសមត្ថកិច្ចពាក់ព័ន្ធតាមចាប់ជនល្មើសប្លន់ធនាគារ RHB ឲ្យបាន
- ភ្នំពេញ
រាជធានីភ្នំពេញ ៖ លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ នៅព្រឹកថ្ងៃទី២៤ ខែសីហា ឆ្នាំ២០១៨…
រាជធានីភ្នំពេញ ៖ លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ នៅព្រឹកថ្ងៃទី២៤ ខែសីហា ឆ្នាំ២០១៨ នេះបានបើកកិច្ចប្រជុំជាបន្ទាន់មួយដើម្បីទប់ស្កាត់ និងពិនិត្យបញ្ហាសន្ដិសុខឡើងវិញ ក្រោយមានអំពើប្លន់ប្រដាប់អាវុធកណ្តាលថ្ងៃត្រង់ ក្នុងរាជធានីភ្នំពេញនៅថ្ងៃម្សិលមិញ ។ កិច្ចប្រជុំបន្ទាន់នេះមានការចូលរួមពីនាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ, មេបញ្ជាការរងកងរាជអាវុធហត្ថរាជធានី និងអភិបាលខណ្ឌទាំង១២ផងដែរ ។
លោក ឃួង ស្រេង បានលើកឡើងថា តាមបណ្តាខណ្ឌត្រូវមានអ្នកប្រចាំបញ្ជាក្នុងគោលដៅចេញអន្តរាគមន៍ភ្លាមៗ នៅពេលមានកើតហេតុការណ៍ណាមួយជាយថាហេតុឲ្យបានទាន់ពេលបំផុត ។ លោកអភិបាលរាជធានីភ្នំពេញសមត្ថកិច្ចទាំងអស់មិនត្រូវបន្ទោសគ្នាទៅវិញមក ដាក់បន្ទុកលើកស្ថាប័នណាមួយនោះទេ គឺត្រូវរួមសហការគ្នា ការពារសន្តិសុខសុវត្ថិភាពជូនប្រជាពលរដ្ឋ អាជីវករ ដែលប្រកបអាជីវកម្ម ក្នុងរាជធានីភ្នំពេញ ដែលជាកាតព្វកិច្ចរបស់យើងទាំងអស់ ដែលជាកងកម្លាំងមានសមត្ថកិច្ច ។
ក្នុងកិច្ចប្រជុំនោះលោក ឃួង ស្រេង អភិបាលរាជធានីភ្នំពេញបានបញ្ជារឲ្យសមត្ថកិច្ចពាក់ព័ន្ធខិតខំ និងពន្លឿនក្នុងការស៊ើបអង្កេត តាមចាប់ខ្លួនជនល្មើសប្លន់ធនាគារឲ្យបានក្នុងពេលឆាប់ៗនេះ ។
គួររំលឹកថា ថ្ងៃទី២៣ ខែសីហា ម្សិលមិញនេះមានចោរប្រដាប់អាវុធមួយក្រុមមានគ្នាប្រមាណ៥នាក់ បានចូលប្លន់ធនាគារមួយទាំងកណ្ដាលថ្ងៃត្រង់ស្ថិតនៅតាមបណ្ដោយផ្លូវម៉ៅសេទុង ខណ្ឌចំការមន ដោយយកអស់ទឹកប្រាក់ប្រមាណជាង១០ម៉ឺនដុល្លារ ។ ខណៈពេលនេះកម្លាំងសមត្ថកិច្ចជំនាញបាននឹងកំពុងសហការគ្នាស្រាវជ្រាវយ៉ាងយកចិត្ដទុកដាក់បំផុតដើម្បីតាមចាប់ខ្លួនជនសង្ស័យមកផ្ដន្ទាទោសតាមច្បាប់ ៕
ចែករំលែកព័តមាននេះ