រាជធានីភ្នំពេញ ៖ ឈាមជ្រូកជាង៤០០គីឡូក្រាមដែលមានលាយលំជាមួយសារធាតុគីមីខុសច្បាប់ត្រូវបានកម្លាំងមន្ត្រីកុងត្រូលកំពង់ផែរអន្តរជាតិភ្នំពេញសហការជាមួយនគរបាលប៉ុស្តិ៍ច្បារអំពៅទី២ និងគណៈកម្មាធិការផ្សារចំនួន២ គឺបន្លែ និងផ្សារច្បារអំពៅធ្វើការដកហូតបានពីបុរសម្នាក់ដែលដឹកតាមរ៉ឺម៉កម៉ូតូយកមកធ្វើសកម្មភាពចែកចាយលក់បន្ត ដល់អាជីវករផ្សារទាំង២ខាងលើ ស្ថិតក្នុងសង្កាត់ច្បារអំពៅ២ ខណ្ឌច្បារំពៅ នាវេលាព្រឹកថ្ងៃទី២៤ ខែសីហា ឆ្នាំ២០១៨នេះ ។
ការដកហូតធ្វើឡើងដោយកម្លាំងមន្ត្រីកាំកុងត្រូលបានស្ទាក់ចាំចាប់តាំងពីម៉ោង៣ទាបភ្លឺ មកម្ល៉េះ លុះរហូតដល់ម៉ោង៥ព្រឹកថ្ងៃខែដដែល ទើបឃើញបុរសខាងលើឈ្មោះ សុខ បិន អាយុ៣៨ឆ្នាំ បានដឹកឈាមជ្រូកយកតាមរ៉ឺម៉កម៉ូតូមកធ្វើការចែកចាយនៅផ្សារទាំង២ក៏សម្រេចធ្វើការឃាត់ខ្លួនសួរនាំ និងពិនិត្យលើគុណភាពទំនិញតែម្តង ។
លោក សាន់ ប៉ូណា ប្រធានផ្សារបន្លែឲ្យដឹងថា ក្នុងការចុះពិនិត្យខាងលើនេះមន្ត្រីជំនាញកាំកុងត្រូលបានធ្វើការពិនិត្យមើលទៅលើឈាមជ្រូករបស់បុរសខាងលើក្រោយការពិនិត្យមើលតាមជំនាញយ៉ាងល្អិតល្អន់រួចមក ឃើញថា ឈាមជ្រូកទាំងនោះពិតជាមានលាយលំជាមួយសារធាតុគីមីខុសច្បាប់ប្រាកដមែន ដូច្នេះហើយមន្ត្រីកាំកុងត្រូលសម្រេចធ្វើការដកហូតឈាមជ្រូកទាំងអស់សរុប៤២០គីឡូក្រាម ធ្វើការដុតកម្ទេចចោលនៅហ្នឹងកន្លែងភ្លាមៗផងដែរ ។
ដោយឡែកចំពោះបុរសដែលដឹកឈាមជ្រូកយកមកចែកចាយខាងលើនេះមន្ត្រីជំនាញបានធ្វើកិច្ចសន្យាអប់រំណែនាំឲ្យបញ្ឈប់សកម្មភាពនេះបន្តទៀត បើមន្ត្រីរកឃើញថា បុគ្គលរូបនេះមានពាក់ព័ន្ធទៅនឹងបទល្មើសដដែលម្តងទៀតនឹងត្រូវចាត់វិធានការទៅតាមផ្លូវច្បាប់ជាក់ជាមិនខានឡើយ ដោយមិនមានករណីលើកលែងទៀតនោះទេ ។
យ៉ាងណាមិញ ជុំ វិញការបង្ក្រាបការចែកចាយឈាមជ្រូកលាយលំសារធាតុគីមីខាងលើនេះ គេនៅមិនទាន់ដឹងនៅឡើយទេថា បុរសជាអ្នកដឹកនាំមកចែកចាយលក់នោះដឹកយកមកពីទីកន្លែងណា ហើយមានមេកើយជាអ្នកណាឡើយ ខណៈមន្ត្រីជំនាញបានត្រឹមធ្វើកិច្ចសន្យាអប់រំ រួចសម្រេចដោះលែងទៅវិញ ។
គួររំលឹកថា កាលពីថ្ងៃទី១៤ ខែសីហា ឆ្នាំ២០១៨កន្លងទៅ មន្ត្រីជំនាញកាំកុងត្រូលក៏ធ្លាប់បានដកហូតឈាមជ្រូកលាយលំសារធាតុគីមីខុសច្បាប់ពីក្រុមអាជីវករផ្សារច្បារអំពៅចំនួន៤៣,៥គីឡូក្រាមផងដែរ ដែលកាលនោះមន្ត្រីជំនាញបានធ្វើការដុតបំផ្លាញចោលនៅហ្នឹងកន្លែងភ្លាមៗដូចគ្នាផងដែរ និងណែនាំឲ្យម្ចាស់អាជីវកម្មបញ្ឈប់ការលក់ដូរនូវរាល់ទំនិញណាដែលមានលាយលំសារធាតុគីមី ។
មន្ត្រីជំនាញកាំកុងត្រូលអំពាវនាវដល់ក្រុមអាជីវករលក់ដូរទាំងអស់ សូមបងប្អូនលក់ដូរតែទំនិញណាដែលមានគុណភាពល្អសម្រាប់បងប្អូនពលរដ្ឋទិញយកទៅបរិភោគជៀសវៀងការលក់ដូរទំនិញដែលមានលាយលំសារធាតុហាមឃាត់ខុសផ្ទុយនឹងច្បាប់ ព្រោះតែដើម្បីបំពេញផលចំណេញផ្ទាល់ខ្លួន ហើយមិនបានគិតពីផលអាក្រក់ដែលបានបំផ្លាញសុខភាពរបស់ពលរដ្ឋក្នុងសង្គមទូទៅរបស់យើងទាំងអស់គ្នាទៅវិញនោះ ៕
ចែករំលែកព័តមាននេះ