ខេត្តបាត់ដំបង ៖ បុរស២នាក់ហាក់មានវិបត្តិផ្លូវចិត្តប្រហាក់ប្រហែលគ្នា ហើយបានសម្រេចធ្វើអត្តឃាត ដោយប្រើវិធីសាស្ត្រចង.កសម្លាប់ខ្លួនដូចគ្នា ដែលកើតឡើងជាបន្តបន្ទាប់ក្នុងរយៈពេល២ថ្ងៃ តែបានកើតឡើងនៅក្នុងស្រុកផ្សេងគ្នា។
យោងតាមរបាយការណ៍របស់សមត្ថកិច្ចបានឲ្យដឹងថា បុរសម្នាក់ឈ្មោះកង គឹមហ៊ អាយុ២២ឆ្នាំ នៅភូមិម្រះព្រៅ ឃុំជ្រៃ ស្រុកមោងឬស្សី បានចងកសម្លាប់ខ្លួននៅវេលាម៉ោង៩ និង៣០នាទីយប់ថ្ងៃទី២៣ សីហា។ ជនរងគ្រោះប្រើប្រាស់ខ្សែគោចង.កខ្លួនឯង ជាប់នឹងធ្នឹមរោងគោខាងក្រោយផ្ទះ បណ្ដាលឱ្យស្លាប់ លុះក្រោយមក ទើបក្រុមគ្រួសារដឹង តែហួសពេលទៅហើយ។
បើតាមក្រុមគ្រួសារបានប្រាប់សមត្ថកិច្ចថា ជនរងគ្រោះមានជំងឺប្រចាំកាយរ៉ាំរ៉ៃច្រើនឆ្នាំហើយ ដែលមិនអាចធូរស្រាលបាន ។ ជនរងគ្រោះ ហាក់មានវិបត្តិគ្រប់បែបយ៉ាង គួបផ្សំនឹងជំងឺរាំរ៉ៃប្រចាំកាយផង ដែលជាហេតុនាំឱ្យជនរងគ្រោះរូបនេះ សម្រេចបញ្ចប់ជិវិតបែបនេះ ។
ដោយឡែក បុរសឈ្មោះផន សុផាត អាយុ៣៧ឆ្នាំ រស់នៅភូមិបវេល២ ឃុំវេលា ស្រុកបវេល ឯណោះវិញ ត្រូវសមត្ថកិច្ចរាយការណ៍ថា បានយកខ្សែចងស្បែកជើងចង.កខ្លួនឯងជាប់នឹងធ្នឹមរោងគោក្រោយផ្ទះដូចគ្នាបណ្ដាលឲ្យស្លាប់ នៅវេលាម៉ោង០៨ និង៣០នាទីព្រឹកថ្ងៃទី២៤ សីហា នេះ ។ សមត្ថកិច្ចដែលបានចុះទៅកាន់កន្លែងកើត ដើម្បីពិនិត្យបានស្រង់សំដីក្រុមគ្រួសារថា មួយរយៈចុងក្រោយនេះ ជនរងគ្រោះហាក់បង្ហាញពីការមិនសប្បាយចិត្ត ដែលគេសង្ស័យផ្ដើមចេញពីបញ្ហាគ្រួសារ។
បើតាមសាច់ញាតិថា ជនរងគ្រោះបានបែកបាក់ប្រពន្ធ ដែលទំនងការបែកបាក់នេះ គឺខាងប្រពន្ធជាអ្នកដើរចេញ (រត់ចោលប្ដី) ហើយចាប់ពីពេលនោះមក បុរសរូបនេះ ហាក់គ្មានលំនឹងក្នុងគ្រួសារ។ ពិសេស សម្រាប់អារម្មណ៍ខ្លួនឯងផ្ទាល់ ធ្វើឲ្យបុរសរូបនេះមានវិបត្តិផ្លូវចិត្ត រហូតសម្រេចចិត្តធ្វើអត្តឃាតបែបនេះតែម្ដង។
ចែករំលែកព័តមាននេះ