នាយករដ្ឋមន្ត្រី ព្រមានដល់អ្នកធ្លាប់ជាប់ពន្ធនាគារ…
- កណ្តាល
ខេត្តកណ្តាល ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានព្រមានដល់អ្នកធ្លាប់ជាប់ ពន្ធនា គារដែលគេដឹងថា សំដៅទៅលោក…
ខេត្តកណ្តាល ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានព្រមានដល់អ្នកធ្លាប់ជាប់ ពន្ធនា គារដែលគេដឹងថា សំដៅទៅលោក គឹម សុខ សូមកុំនិយាយផ្ដេសផ្ដាសហួសពីសិទ្ធិដែលកំណត់ដោយច្បាប់ បើមិនដូច្នោះទេអាចប្រឈមនឹងការជាប់ពន្ធនាគារបន្តទៀត ។
សម្តេចតេជោបានមានប្រសាសន៍បែបនេះ ក្នុងឱកាសអញ្ជើញជួបសំណេះសំណាលជាមួយកម្មករកម្មការិនីជិត២ម៉ឺននាក់ នៅស្រុកកៀនស្វាយ កាលពីថ្ងៃទី២៣ ខែសីហា ។
សម្ដេចតេជោបានថ្លែងថា «អ្នកដែលបានចេញពីគុកហើយ ក៏កុំព្រហើនពេកដែរ កុំស្មានថា គេមិនហ៊ានចាប់បញ្ចូលគុកវិញ ។ ច្បាប់នៅប្រទេសកម្ពុជាឬនៅលើពិភពលោក គេមិនបានហាមឃាត់ថា ជាប់គុកម្ដងរួចហើយ អត់ត្រូវជាប់គុកលើកទី២ ឬលើកទី៣ទេ ។ អត់មានច្បាប់ណាហាមឃាត់ទេ បើប៉ះពាល់ដល់ច្បាប់ ច្បាប់ចាប់ទៀត កាត់ទោសទៀត ជាប់គុកទៀត» ។
សម្ដេចតេជោបញ្ជាក់ថា ការប្រកាសបែបនេះមិនមែនបានន័យថា បិទមាត់អ្នកណាម្នាក់នោះទេ ពោលគឺគ្រាន់តែដាស់តឿនដល់អ្នករិះគន់ក៏ដូចជាអ្នកវិភាគទាំងឡាយ ដែលធ្លាប់និយាយផ្ដេសផ្ដាសប៉ះពាល់ដល់សិទ្ធិអ្នកដទៃ ។ សូមកុំបណ្ដោយការនិយាយតាមតែអំពើចិត្ត តាមតែអណ្តាតរបស់ខ្លួន ហើយហួសពីសិទ្ធិសេរីភាពដែលកំណត់ដោយច្បាប់ ប៉ះពាល់ដល់កេរ្តិ៍ឈ្មោះកិត្តិយសរបស់អ្នកដទៃឱ្យសោះ ។ បើមិនដូច្នោះទេ បុគ្គលទាំងនោះនឹងត្រូវដាក់ទោសដោយច្បាប់ជាបន្តបន្ទាប់ទៀតជាក់ជាមិនខាន ទោះបីធ្លាប់ជាប់ពន្ធនាគារ១០០ដងហើយ ក៏នៅតែជាប់បន្តទៀតដែរ ។
គួរកត់សម្គាល់ថា បន្ទាប់ពីលទ្ធផលផ្លូវការនៃការបោះឆ្នោតថ្នាក់ជាតិបង្ហាញថា គណបក្សប្រជាជនកម្ពុជាទទួលបានអាសនៈទាំង១២៥ នៅរដ្ឋសភា អ្នកទោសមួយចំនួនដែលមានទាំងអ្នកវិភាគ សកម្មជនដីធ្លី អ្នក កាសែត ត្រូវបានលើកលែងទោសនិងដោះលែងជាបន្តបន្ទាប់ ។ បើតាមប្រសាសន៍របស់សម្ដេចតេជោ អាចនឹងមានអ្នកទោសជាបន្តបន្ទាប់ទៀតនឹងត្រូវដោះលែងពីពន្ធនាគារនាពេលខាងមុខ ៕
ចែករំលែកព័តមាននេះ